“গোৱালপাৰাৰ কথা ভাবিলে দাঢ়ি, টুপীৰ কথা মনলৈ আহে”, মন্ত্ৰী সিংহলৰ বিতৰ্কিত মন্তব্যক সমালোচনা আমিনুল ইছলামৰ

ৰাভা হাছং স্বায়ত্তশাসিত পৰিষদৰ নিৰ্বাচনক লৈ অব্যাহত আছে ব্যাপক প্ৰচাৰ অভিযান । বুধবাৰে বিজেপিৰ এখন প্ৰচাৰ সভাত মন্ত্ৰী অশোক সিংহলে কৰা মন্তব্যক লৈ সৃষ্টি হৈছে প্ৰতিক্ৰিয়াৰ । গোৱালপাৰাৰ দাৰিদুৰি অঞ্চলত এনডিএ সমৰ্থিত প্ৰাৰ্থী জোনালী ৰাভাৰ হৈ প্ৰচাৰ চলোৱাৰ সময়তে এটা বিশেষ সম্প্ৰদায়ক লক্ষ্য কৰি তীৰ্যক মন্তব্য কৰে মন্ত্ৰী সিংহলে ।

ভাষণৰ মাজতে মন্ত্ৰীগৰাকীয়ে কয়, “যেতিয়া আমি গোৱালপাৰাৰ কথা ভাবো, তেতিয়া কেৱল টুপী, দাঢ়ি আৰু পায়জামাই মনলৈ আহে ।” তেওঁ লগতে কয়, “এটা সম্প্ৰদায়ে গোৱালপাৰাক ধ্বংস কৰিছে ।” জনসাধাৰণক একত্ৰিত হৈ যুঁজ দিবলৈও তেওঁ আহ্বান জনায় । বিৰোধী কংগ্ৰেছক সমালোচনা কৰি তেওঁ কয় যে কংগ্ৰেছক ভোট দিবলৈ কোনো কাৰণেই নাই । কংগ্ৰেছে একো আনকি খাবলৈও নোহোৱা হৈছে বুলি কটাক্ষ মন্ত্ৰীগৰাকীৰ ।

ইফালে মন্ত্ৰী সিংহলৰ এই মন্তব্য সন্দৰ্ভত প্ৰতিক্ৰিয়া ব্যক্ত কৰিছে ধিং সমষ্টিৰ এ আই ইউ ডি এফৰ বিধায়ক আমিনুল ইছলামে । তেওঁ কয় যে মন্ত্ৰী সিংহলৰ এই মন্তব্যই মুছলমান সমাজৰ লগতে স্থানীয় লোকৰ আবেগত আঘাত হানিছে । বিধায়ক ইছলামে লগতে কয় যে ধৰ্মীয় নীতি পালন আন সম্প্ৰদায়ৰ কাৰোবাৰ বাবে মনোযোগৰ বিষয় হ’ব নালাগে ।

বিধায়ক আমিনুল ইছলামে মন্ত্ৰী সিংহলক নিবনুৱা সমস্যা, বন্ধ হৈ যোৱা উদ্যোগৰ পুনৰুদ্ধাৰ, গুৱাহাটী মহানগৰী পৰিস্কাৰকৰণ আদি বিষয়ৰ ওপৰত গুৰুত্ব আৰোপ কৰিবলৈ আহ্বান জনায় । এনে মন্তব্যৰে মন্ত্ৰী সিংহলে অসমৰ সম্প্ৰীতি বিনষ্ট কৰিব খোজা বুলিও মন্তব্য কৰে বিধায়কগৰাকীয়ে ।

অসমৰ ঐক্য আৰু সহাৱস্থানৰ পৰম্পৰাক পুনৰ দোঁহাৰি কৰি ইছলামে এই কথাত গুৰুত্ব আৰোপ কৰে যে ৰাজ্যখন সদায় শংকৰ-আজানৰ (হিন্দু-মুছলমানৰ সম্প্ৰীতিৰ প্ৰতীক) দেশ হৈ আহিছে । তেওঁ কয় যে সম্প্ৰদায়সমূহৰ মাজত বিভাজন সৃষ্টিৰ যিকোনো প্ৰচেষ্টা কেতিয়াও সফল নহয় । ইয়াৰ উপৰিও তেওঁ সিংঘলক অনা-অসমীয়া বুলি সমালোচনা কৰি দাবী কৰে যে ৰাজস্থান বা হাৰিয়ানাৰ কোনোবা এজন লোকে মন্ত্ৰী হিচাপে অঞ্চলটোৰ সাম্প্ৰদায়িক শান্তিৰ ক্ষেত্ৰত হস্তক্ষেপ কৰিব নালাগে ।