আৰক্ষী নে গুণ্ডা? OC ভাৰ্গৱ বৰবৰাৰ এটাৰ পাছত আনটো কুকীৰ্তি পোহৰলৈ!

গুৱাহাটীৰ ৰাজপথত যুৱকক প্ৰহাৰ। তাৰ পাছতে খোল খাইছে OC ভাৰ্গৱ বৰবৰাৰ মুখা। পোহৰলৈ আহিছে ভাৰ্গৱ বৰবৰাৰ এটাৰ পাছত আনটো কুকীৰ্তি। ভাৰ্গৱ বৰবৰাৰ বিৰুদ্ধে বিস্ফোৰক অভিযোগ এটা পৰিয়ালৰ। গোৱালপাৰাৰ এজন যুৱকক ভাৰ্গৱ বৰবৰাই হত্যা কৰাৰ অভিযোগ। ৯ বছৰ পূৰ্বে গোৱালপাৰাত কি কৰি আহিছিল ভাৰ্গৱ বৰবৰাই?

জ্ঞানদীপক ৰাজপথতে অমানুষিক নিৰ্যাতন চলোৱা নিলম্বিত OC ভাৰ্গৱৰ যেন কাহিনীৰ অন্ত নাই! সুবিধা পালেই ৰাজহুৱা স্থানত দাদাগিৰি চলোৱাৰ অভিযোগ আছে ভাৰ্গৱ বৰবৰাৰ বিৰুদ্ধে। ৩০ অক্টোবৰৰ দিনা দীঘলীপুখুৰীৰ পাৰত গছ কটাৰ বিৰোধিতাৰে প্ৰতিবাদত বহা ছাত্ৰ ছাত্ৰীৰ ওপৰত বীৰত্ব দেখুৱাইছিল এইজন আৰক্ষী বিষয়াই। সামাজিক মাধ্যমতো ভাইৰেল হৈছিল সেই দৃশ্য।

ইয়াৰ উপৰিও ভাৰ্গৱ বৰবৰাৰ ইতিহাসত আছে আন ক’লা অধ্যায়। পূৰ্বেও কুকীৰ্তিৰে কুখ্যাতি অৰ্জন কৰিছিল ফাঁচীবজাৰত খাকীত দাগ লগোৱা এইগৰাকী ভাৰ্গৱ বৰবৰাই। ৯ বছৰ পূৰ্বে আন এক কু-কাণ্ড সংঘটিত কৰি থৈছিল শেহতীয়াকৈ পাণবজাৰ থানাৰ নিলম্বিত OC ভাৰ্গৱ বৰবৰাই। গোৱালপাৰাৰ এজন যুৱকক ভাৰ্গৱ বৰবৰাই হত্যা কৰাৰ অভিযোগ। ভাৰ্গৱ বৰবৰাৰ সেই কাণ্ডক লৈ মুখ খুলিছে ২০১৫ পৰা চকুপানীৰে বাট নেদেখা হোৱা এটি দুৰ্ভগীয়া পৰিয়ালে।

লগতে পঢ়ক:  ‘সাধাৰণ নাগৰিকৰ বিৰুদ্ধে আৰক্ষীয়ে অপ্ৰয়োজনীয় শক্তি প্ৰয়োগ কৰাৰ উচিত নহয়’, ফাঁচী বজাৰৰ ঘটনাকলৈ আৰু কি ক’লে মুখ্যমন্ত্ৰীয়ে…?

ঘটনা আছিল ২০১৫ চনৰ। সেই সময়ত গোৱালপাৰা চহৰ আৰক্ষীৰ ভাৰপ্ৰাপ্ত বিষয়াৰূপে কৰ্মৰত আছিল ভাৰ্গৱ বৰবৰা। গোৱালপাৰা চহৰ আৰক্ষীৰ তদানীন্তন ভাৰপ্ৰাপ্ত বিষয়া ভাৰ্গৱ বৰবৰাই সুৰাসক্ত অৱস্থাত চহৰৰ পাহাৰতোলীৰ লোহিত কাছাৰী নামৰ যুৱক এজনক আটক কৰিছিল। তাৰ পাছত যুৱকজনক গোৱালপাৰা টাউন আৰক্ষীৰ লকআপত ভৰাই থৈ নিশা মাৰপিট কৰাৰ অভিযোগ উত্থাপন হৈছিল। ইয়াৰ পাছতহে আৰম্ভ হৈছিল আচল কাহিনী। পুৱা ৰহস্যজনকভাৱে ব্ৰহ্মপুত্ৰৰ পাৰত উদ্ধাৰ হৈছিল লোহিত কাছাৰী নামৰ যুৱকজনৰ মৃতদেহ।

পৰৱৰ্তী সময়ত ভাৰ্গৱ বৰবৰাই লোহিতক হত্যা কৰি নদীৰ কাষত পেলাই দিয়াৰ অভিযোগ উত্থাপন কৰে পৰিয়ালৰ লগতে ৰাইজে । ভাৰ্গৱ বৰবৰাৰ বৰ্বৰতাৰ বিৰুদ্ধে অভিযোগ উত্থাপন কৰি প্ৰতিবাদো কৰিছিল ৰাইজে। কিন্তু আজিলৈ ন্যায় নাপালে দৰিদ্ৰ পৰিয়ালটোৱে। ঘটনাৰ ৯ বছৰ পাছত হঠাৎ আৰক্ষী বিষয়া ভাৰ্গৱ বৰবৰাৰ কাণ্ড দেখি নিজৰ ভাতৃৰ ৰহস্যজনক মৃত্যুক সুঁৱৰি চকুলো টুকিলে লোহিতৰ ভগ্নীয়ে। ভাৰ্গৱ বৰবৰাক কঠোৰ শাস্তিৰ দাবী গোৱালপাৰাৰ দুৰ্ভগীয়া পৰিয়ালটোৰ।

লগতে পঢ়ক: নিলম্বন নহয়, বৰ্খাস্ত কৰক OC ভাৰ্গৱ বৰবৰাক: জ্ঞানদীপক প্ৰহাৰ কৰাক লৈ সৰৱ কটনৰ ছাত্ৰ সমাজ

উল্লেখ্য যে, শুকুৰবাৰে ফাঁচী বজাৰৰ জেইল ৰোডৰ সমীপত ফুড ডেলিভাৰীৰ কাম কৰা জ্ঞানদীপ হাজৰিকা নামৰ এজন ছাত্ৰক পাণবজাৰ থানাৰ অ’চি ভাৰ্গৱ বৰবৰাই প্ৰহাৰ কৰা এটা ভিডিঅ’ পোহৰলৈ আহিছিল । ভিডিঅ’টোত ট্ৰেফিক চিগনেল অমান্য কৰাৰ অভিযোগত জ্ঞানদীপ হাজৰিকাক নিৰ্মমভাৱে প্ৰহাৰ কৰে আৰক্ষী বিষয়াজনে । ভিডিঅ’টো ভাইৰেল হৈ পৰাৰ লগে লগে সামাজিক মাধ্যমত আৰম্ভ হয় ব্যাপক চৰ্চা । তাৰ পাছতে নিলম্বন কৰা হয় অ’চি ভাৰ্গৱ বৰবৰাক। কিন্তু নিলম্বন নহয়, ভাৰ্গৱ বৰবৰাক বৰ্খাস্ত কৰাৰহে দাবী বহু লোকৰ।

লগতে পঢ়ক: পাণবজাৰ থানাৰ নতুন OC নিযুক্তি, ভাৰ্গৱ বৰবৰাৰ বিৰুদ্ধে একাধিক এজাহাৰ দাখিল…