দিনতেই অন্ধকাৰময় গুৱাহাটী, নেৰানেপেৰা বৰষুণৰ ফলত সৃষ্টি ভয়ংকৰ পৰিস্থিতিৰ

দিনতেই অন্ধকাৰময় গুৱাহাটী

বিপদে লগ নেৰা হৈছে মহানগৰবাসীক। গুৱাহাটী মহানগৰীৰ প্ৰায় ভাগ অঞ্চল এতিয়া কৃত্ৰিম বানৰ কবলত । এজাক বৰষুণ দিলেই আলৈ-আথানি হয় মহানগৰবাসীৰ।

গুৱাহাটী মহানগৰীত ধাৰাষাৰ বৰষুণৰ ফলত সৃষ্টি হৈছে ভয়ংকৰ পৰিস্থিতিৰ। এই বৰষুণৰ ফলত কৃত্ৰিম বানৰ সমস্যা ত্ৰমাৎ বৃদ্ধি পাইছে। এতিয়া মহানগৰীৰ অলি-গলি ভৰি পৰিছে পানীৰে। জিলাই জিলাই জাৰি কৰা হৈছে হলধীয়া সতৰ্কবাণী । চানমাৰি, অনিল নগৰ, নবীন নগৰ, জু-ৰোডকে ধৰি কাহিলীপাৰাত সৃষ্টি হৈছে কৃত্ৰিম বানৰ। মুষলধাৰ বৰষুণৰ ফলত মহানগৰীত হাহাকাৰ ।

বতৰ বিজ্ঞান কেন্দ্ৰই ২৮খনকৈ জিলাত জাৰি কৰিছে হালধীয়া সতৰ্কবাণী আৰু ৩খন জিলাত কমলা সতৰ্কবাণী জাৰি কৰিছে। হালধীয়া সতৰ্কবাণী জাৰি কৰা স্থানসমূহ হৈছে- কোকৰাঝাৰ, চিৰাং, বঙাইগাঁও, বৰপেটা, বজালী, বাক্সা, নলবাৰী,দক্ষিণ শালমাৰা, ধুবুৰী, তামুলপুৰ, ওদালগুৰি,কামৰূপ, কামৰূপ(মহানগৰ), মৰিগাঁও, নগাঁও, কাৰ্বি আংলং, ডিমা হাচাও ,গোলাঘাট,কাছাৰ, হাইলাকান্দি, কৰিমগঞ্জ,লখিমপুৰ, মাজুলী,যোৰহাট,ধেমাজি, তিনিচুকীয়া। ইফালে কমলা সতৰ্কবাণী জাৰি কৰা ঠাইসমূহ হৈছে- বিশ্বনাথ, গোৱালপাৰা, শোণিতপুৰ জিলা।

ৰাস্তাত পানী জমা হোৱাৰ বাবে, মানুহৰ চলাচলত অসুবিধা হৈছে। ৰাস্তা় পানীৰে ভৰি পৰিছে। খানাপাৰাতো সন্ধিয়াৰ ভাগত কৃত্ৰিম বানৰ ফলত সৃষ্টি হয় হাহাকাৰ পৰিস্থিতিৰ । বিভিন্ন স্থানত জমা হোৱা পানীৰ বাবে নিজৰ কৰ্তব্য সামৰি ঘৰলৈ যাব পৰা নাই বহু লোক । ফলত আবদ্ধ হৈ পৰিছে শতাধিক বাহন ।

ইফালে, নেৰানেপেৰা বৰষুণৰ ফলত পুনৰ বানত বুৰিল ধেমাজিৰ ১৫ নং ৰাষ্ট্ৰীয় ঘাইপথ । পানীৰ তলত আছে এতিয়া ভজুগাঁওৰ অংশ। অৰুণাচলৰ পাহাৰত হোৱা ধাৰাসাৰ বৰষুণৰ ফলত ফেনে-ফোটোকাৰে বাঢ়িছে জীয়াধল কাংকু সুঁতি।

সমস্যাৰ সমাধান!

দীৰ্ঘদিন ধৰি চৰকাৰ প্ৰশাসনক কৃত্ৰিম বান ৰোধ আৰু নলা-নৰ্দমা সঠিক নিৰ্মাণৰ বাবে আবেদন-নিবেদন কৰাৰ পিছতো আজি পৰ্যন্ত সমাধান নহ’ল মহানগৰীৰ এই সমস্যা । এই ক্ষেত্ৰত বিফল গুৱাহাটী পৌৰ নিগম তথা চৰকাৰ প্ৰশাসন । চৰকাৰ আহিছে,চৰকাৰ গৈছে। কেৱল সলনি হোৱা নাই গুৱাহাটীবাসীৰ সমস্যা।