পিতৃয়ে পদপথত দিয়ে পাণ-তামোলৰ দোকান, মাতৃয়ে নাজানে APSC কি? APSCত ৰুবু বৰাৰ সফলতাত উৎফুল্লিত সকলো…

APSCত ৰুবু বৰাৰ সফলতাত উৎফুল্লিত সকলো

এইবাবেই চাগে কয় দৰিদ্ৰতা কেতিয়াও সফলতাৰ প্ৰাচীৰ হ’ব নোৱাৰে। এই কথাষাৰি বাস্তৱত ৰূপায়িত কৰিলে গহপুৰৰ বৰঙাবাৰীৰ ডিপৰা বালিপুখুৰীৰ ৰুবু বৰাই। বৃহস্পতিবাৰে ঘোষণা কৰা APSCৰ ২০২৩ৰ সংযুক্ত প্ৰতিযোগিতামূলক পৰীক্ষাৰ ফলাফলত উজলিল ৰুবু। ৰুবুৱে প্ৰমাণ কৰি দিলে একাগ্রতা, দৃঢ়তা, সততা, কষ্ট সহিষ্ণুতা, আত্মবিশ্বাসৰ ফচল সদায় উৰ্ধত। জৰাজীৰ্ণ ঘৰখনৰ পৰা অশেষ কষ্ট আৰু অধ্যৱসায়েৰে অধ্যয়ন কৰি APSCত [ACS 14th RANK] চতুৰ্দশ স্থান লাভেৰে জিলিকি উঠিল দৰিদ্ৰ পৰিয়ালৰ ৰুবু বৰা। ৰুবুৰ পিতৃ তামোল-পাণৰ দোকানী আৰু মাতৃ এগৰাকী সাধাৰণ গৃহিণী। মাতৃয়ে নাজানে APSC কি?

আন দিনাৰ দৰেই  বৃহস্পতিবাৰ,৫ ডিচেম্বৰ ২০২৪ত গতানুগতিকভাৱেই আৰম্ভ হৈছিল ৰুবুহঁতৰ দিনটো।ৰুবুৰ ঘৰত দৰিদ্ৰতাৰ ছবি স্পষ্ট। পিতৃ কলিয়া বৰাই হাতত মোনাখনত তামোল-পাণ লৈ ওলাই গৈছিল বজাৰলৈ বুলি।মাতৃ চিনু বৰাও ব্যস্ত হৈ আছিল ঘৰৰ ইটো-সিটো কামত। সময় তেতিয়া ২ বাজিছিল,সেই সময়তে আহিছিল ভাল খবৰটো। APSC পৰীক্ষাত ১৪সংখ্যক স্থানেৰে[ACS RANK] উত্তীৰ্ণ হ’ল ঘৰৰ ডাঙৰ ল’ৰা ৰুবু বৰা। খবৰটো পাই পৰিয়ালৰ সকলোৱে কেৱল কান্দিছিল।

ৰুবুৰ জীৱন কাহিনী আজি চৰ্চাত। কাৰণ ৰুবুৰ পিতৃ-মাতৃ তেনেই সাধাৰণ। দেউতাক তামোল-পাণৰ দোকানী আৰু মাক সাধাৰণ গৃহিণী। আনৰ ঘৰত তাত বৈ দুই-এপইচা যোগাৰ কৰে মাকে। পিতৃ কলীয়া বৰা আৰু মাতৃ চিনু বৰাই অতি কষ্টৰে চলাই আহিছে ঘৰখন।কেতিয়াবা ৰুবুৱে টিউচনৰ পইচাৰে ঘৰখন চলায়। এনেদৰেই চলি আছিল ৰুবু বৰা আৰু পিতৃ-মাতৃৰ জীৱন সংগ্ৰাম।

বাৰীৰ এপোন তামোল , দহকুচি পান , কেইবাটামান নেমু লৈ পদ পথত দোকান দিয়া পিতৃৰ পুত্ৰ আজি প্ৰশাসনিক বিষয়া হ’ল। ৰুবুব সম্পূৰ্ণ আঁৰৰ কথা নাজানিলে আপুনি হয়তো নাজানিব ৰুবুৰ জীৱন সংগ্ৰাম। যাৰ বাবে বৃহস্পতিবাৰৰ দিনটোত হিৰ’ হৈ ৰ’ল গহপুৰৰ ৰুবু বৰা । APSCত চতুৰ্দশ স্থান পোৱাৰ পিছতো হুক-হুকাই কান্দি উঠে মাতৃ, কান্দি উঠিল আইতাকো। সাধাৰণ পাণ-তামোলৰ দোকান দি সন্তানক আগবঢ়াই দিয়া পিতৃ-মাতৃৰ চকুত আজি সুখৰ চকুলো। দাৰিদ্ৰতা কেতিয়াও হেঙাৰ হ’ব নোৱাৰে সাফল্যত, সেয়া প্ৰমাণ কৰিলে গহপুৰৰ ৰুবু বৰাই। তাৰ পাছতে গহপুৰৰ মৰাণবাৰীত এতিয়া আনন্দৰ বন্যা।

ৰুবু বৰাৰ সফলতাত উৎফুল্লিত সকলো। সামাজিক মাধ্যম ভৰি পৰিছে শুভেচ্ছাৰে। ৰুবু বৰা সাফল্যত আৱেগিক হৈ পৰিছে ৰুবু বৰা পিতৃ মাতৃ। পিতৃয়ে ক’লে-“মই ল’ৰাটোক তামোল-পানৰ বেপাৰ কৰিয়েই পঢ়াইছিলো। বহু দুখ-কষ্ট গ’ল আমাৰ।”

সৰুৰেপৰাই অত্যন্ত মেধাৱী ছাত্রজন ২০১৬ চনত ডিপৰা হাইস্কুলৰ পৰা সুখ্যাতিৰে ৮৮% নম্বৰসহ হাইস্কুল শিক্ষান্ত পৰীক্ষাত উত্তীর্ণ হৈছিল। ২০১৮ চনত ব্ৰহ্মপুত্ৰ ভেলি একাডেমিৰ পৰা উচ্চতৰ মাধ্যমিকৰ চূড়ান্ত পৰীক্ষাত সুখ্যাতি (৯৩.৬% )ৰে উত্তীর্ণ হোৱাৰ পিছত কটন বিশ্ববিদ্যালয়ৰ পৰা ৰসায়ন বিভাগত স্নাতক ডিগ্রী কৰিবলৈ আহিছিল। য’ৰ পৰা ৬৪% নম্বৰ লৈ এতিয়া ছাত্রগৰাকী দিল্লী বিশ্ববিদ্যালয়ত পঢ়ি আছে।

সহজ সৰল মেধাৱী ছাত্রই দিল্লীত পঢ়ি থকা অৱস্থাতো নিজৰ পঢ়া খৰছ নিজে উলিয়াইছিল। অৱশ্যে, উচ্চতৰ মাধ্যমিক বিদ্যালয় আৰু কলেজীয়া জীৱনত তেওঁক গহপুৰৰ মানৱদৰদী ব্যক্তি তথা প্ৰতিষ্ঠিত ব্যৱসায়ী উদয় আদিত্য গোস্বামী, গুৱাহাটীৰ উদ্যমী ঋষিৰাজ বৰকটকী, লখিমপুৰৰ ব্ৰহ্মপুত্ৰ ভেলি একাডেমি, প্ৰাক্তন আছু নেতা প্ৰজ্ঞান ভূঞাকে ধৰি বিভিন্নজনে সহায়ৰ হাত আগবঢ়াইছিল। মেধাৱী ছাত্রজনে দিল্লী বিশ্ববিদ্যালয়ত পঢ়ি থকা সমান্তৰালকৈ UPSC পৰীক্ষাৰ বাবেও প্ৰস্তুতি চলাই আছিল। ইয়াৰ মাজতে ৰুবু বৰা APSC ফলাফলে বৰঙাবাৰীৰ লগতে গহপুৰ মহকুমালৈ গৌৰৱ কঢ়িয়াই আনিছে।

উল্লেখ্য যে,  বৃহস্পতিবাৰে APSCৰ ২০২৩ বৰ্ষৰ CCE চূড়ান্ত পৰীক্ষাৰ ফলাফল ঘোষণা কৰা হৈছে। ACSৰ শীৰ্ষত উজলিল চিৰঞ্জীৱ ফুকন। মহিলা প্ৰাৰ্থীৰ শীৰ্ষত এনিশা বুঢ়াগোহাঁই। এই পৰীক্ষাত উত্তীৰ্ণ হৈছে মুঠ ২৩৫গৰাকী প্ৰাৰ্থী।  APSৰ শীৰ্ষত পাৰ্থপ্ৰতিম শৰ্মা।   চলিত বৰ্ষৰ ২৬, ২৭ আৰু ২৮ জুলাইত অসম লোকসেৱা আয়োগৰ মূল পৰীক্ষা অনুষ্ঠিত হৈছিল। ১৩ৰ পৰা ২৯নৱেম্বৰ, ২০২৪ লৈ সাক্ষাৎকাৰ (ব্যক্তিত্ব পৰীক্ষা) অনুষ্ঠিত হৈছিল।  লিখিত পৰীক্ষাত প্ৰাৰ্থীৰ প্ৰদৰ্শন আৰু সাক্ষাৎকাৰ পৰীক্ষাৰ  আধাৰত  ঘোষণা কৰা হয় APSCৰ চূড়ান্ত ফলাফল।