Assam by election: ১মিনিটত পঢ়ক ৰাজ্যৰ ৫ সমষ্টিৰ বিধানসভা উপ-নিৰ্বাচনৰ কেইটামান ডাঙৰ আপডেট…
Assam by election: আজি ৰাজ্যৰ ৫ টা বিধানসভা সমষ্টিত অনুষ্ঠিত হৈছে উপ- নিৰ্বাচন। ইয়াৰ বাবে পুৱা ৭ বজাৰ পৰা ৫ সমষ্টিৰ ১০৭৮ টা কেন্দ্ৰত অনুষ্ঠিত হৈছে ভোটগ্ৰহণ। চলি থকা ভোট গ্ৰহণৰ মাজতে দুই- এটা বিক্ষিপ্ত ঘটনাও পোহৰলৈ আহিছে।
উপ- নিৰ্বাচন
আজি ৰাজ্যৰ ৫ টা সমষ্টিত অনুষ্ঠিত হৈছে উপ নিৰ্বাচন। নিৰ্বাচন আয়োগৰ তথ্য অনুসৰি পুৱা ৭ বজাৰ পৰা আৰম্ভ হোৱা ভোট গ্ৰহণ প্ৰক্ৰিয়া সন্ধিয়ালৈ চলিব। অসমৰ চামগুৰি, বিহালী, ছিদলী, বঙাইগাঁও আৰু ধলাই সমষ্টিত অনুষ্ঠিত হৈছে উপ- নিৰ্বাচন। আজি নিৰ্বাচন অনুষ্ঠিত হোৱা ৫ সমষ্টিৰ মুঠ ভোটাৰৰ সংখ্যা ৯, ১০, ৬৬৫ । ইয়াৰ ভিতৰত পুৰুষ ভোটাৰৰ সংখ্যা হৈছে ৫৪,৭২২ জন আৰু মহিলা ভোটাৰ সংখ্যা হ’ল ৪,৫৫,৯২৪ গৰাকী ৷ পাঁচ সমষ্টিৰ মুঠ ভোটগ্ৰহণ কেন্দ্ৰৰ সংখ্যা হৈছে ১০৭৮ টা ।
নিৰ্বাচন আয়োগৰ তথ্য অনুসৰি, চিদলী সমষ্টিত মুঠ ২,১৭,২৩৬ গৰাকী ভোটাৰে সাব্যস্ত কৰিব ভোটাধিকাৰ । একেদৰে বঙাইগাঁৱত ১,৮২,৩৫৪ গৰাকী, বিহালীত ১,৩২,৫৭৯ গৰাকী আৰু চামগুৰি সমষ্টিত ১,৮০,৮৫৪ গৰাকী ভোটাৰে সাব্যস্ত কৰিব ভোটাধিকাৰ । অন্যহাতে ধলাই বিধানসভা সমষ্টিৰ মুঠ ভোটাৰৰ সংখ্যা হৈছে ১,৯৭,৬৪২ গৰাকী।
বৰ্তমান এই ৫ টা সমষ্টিত চলি আছে ভোট গ্ৰহণ। নিৰ্বাচনৰ লগত জড়িত কেইটামান ডাঙৰ আপডেট তলত আগবঢ়োৱা হ’ল-
- ধলাই পুতিশালত ই ভি এম বিকল হোৱাৰ বাবে ভোট গ্ৰহণত পলম।
- চামগুৰিৰ শলমাৰীৰ ৫৯, ৮৯ আৰু ৯০ নং ভোট কেন্দ্ৰত উত্তপ্ত পৰিস্থিতি। অভিযোগ অনুসৰি ৫৯ নং ভোটকেন্দ্ৰত বিজেপি কৰ্মী ৰছিদুলে দুগৰাকী কংগ্ৰেছ কৰ্মীক প্ৰহাৰ কৰিছে।
- চামগুৰিত ভোট দিবলৈ আহি আহত হয় এগৰাকী গৰ্ভৱতী মহিলা। বাজিয়া গাঁৱৰ ৫৩ নং ভোট কেন্দ্ৰত এই অঘটন সংঘটিত হয়।
- সংকটজনক অৱস্থাত মহিলাগৰাকীক হাস্পাতাললৈ প্ৰেৰণ কৰা হৈছে।
- চামগুৰিত সংঘটিত দুই- এটা বিক্ষিপ্ত ঘটনাৰ বাহিৰে বাকী ৪ সমষ্টিত শান্তিপূৰ্ণভাৱে ভোটদান হৈ আছে।
পুৱা ৯.৩০ বজালৈ ৫ সমষ্টিত ভোট দানৰ হাৰ
- পুৱা ৯.৩০ বজালৈ ৮৮ নং চামগুৰিত ভোটদানৰ হাৰ ১৪.৭০ শতাংশ
- ৭৭ নং বিহালী সমষ্টিত ভোটদানৰ হাৰ ১১ শতাংশ
- ৩১ নং ছিদলীত ভোটদানৰ হাৰ ১২.৫১ শতাংশ
- ৩২ নং বঙাইগাঁও সমষ্টিত ভোটদানৰ হাৰ ১৫.৩৪ শতাংশ
- ১১ নং ধলাই সমষ্টিত ভোটদানৰ হাৰ ৯.১৫ শতাংশ
উল্লেখ্য যে, ৰাজ্যৰ পাঁচটা বিধানসভা সমষ্টিৰ উপ-নিৰ্বাচনৰ বাবে মুঠ ৩৮ গৰাকীয়ে প্ৰাৰ্থীয়ে প্ৰতিদ্বন্দ্বিতা আগবঢ়াইছে । ইয়াৰ ভিতৰত ছিদলীত ৩ গৰাকী প্ৰাৰ্থী, বঙাইগাঁও সমষ্টিত ৮ গৰাকী প্ৰাৰ্থী, বিহালীত ৪ গৰাকী প্ৰাৰ্থী, ধলাই সমষ্টিত ৮ গৰাকী প্ৰাৰ্থী আৰু চামগুৰিত সৰ্বাধিক ১১ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে। দেশৰ আন ৰাজ্যৰ লগতে অসমৰ উপ- নিৰ্বাচনৰ ফলাফল ঘোষণা হ’ব ২৩ নৱেম্বৰত।