আজি বৈঠকত কি কি সিদ্ধান্ত গ্ৰহণ কৰিলে ৰাজ্যিক কেবিনেটে ?
লোকসেৱা ভৱনত সম্বোধন কৰা সংবাদমেলত মুখ্যমন্ত্ৰী শৰ্মাই কেবিনেটত লোৱা সিদ্ধান্তসমূহ অৱগত কৰে । আজিৰ এই বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰে ৰাজ্যিক কেবিনেটে ।
হিমন্ত বিশ্ব শৰ্মা
আজি ৰাজ্য চৰকাৰৰ কেবিনেট বৈঠকৰ অন্তত সংবাদমেল সম্বোধন কৰে মুখ্যমন্ত্ৰী হিমন্ত বিশ্ব শৰ্মাই । লোকসেৱা ভৱনত সম্বোধন কৰা সংবাদমেলত মুখ্যমন্ত্ৰী শৰ্মাই কেবিনেটত লোৱা সিদ্ধান্তসমূহ অৱগত কৰে । আজিৰ এই বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰে ৰাজ্যিক কেবিনেটে ।
আজি কি কি সিদ্ধান্ত গ্ৰহণ কৰিলে ৰাজ্যিক কেবিনেটে ?
- আজি ৰাজ্যিক কেবিনেটে লোৱা এটা গুৰুত্বপূৰ্ণ সিদ্ধান্ত হৈছে ছেমিকণ্ডাক্টৰ প্ৰকল্পৰ নামকৰণ ৰতন টাটাৰ নামেৰে কৰা হ’ব । এই সিদ্ধান্তৰ কথা সংবাদমেলত সদৰী কৰিছে ৰাজ্যৰ মুখ্যমন্ত্ৰীয়ে । সমগ্ৰ ছেমিকণ্ডাক্টৰ প্ৰকল্পস্থলী ৰতন টাটা ইলেক্ট্ৰনিক চিটী, জাগীৰোড নামেৰে নামকৰণ কৰিব ৰাজ্য চৰকাৰে ।
- PAN IIT ALUMNI FOUNDATION আৰু ভাৰত চৰকাৰৰ সহযোগত ৰাজ্যত ১০ টা স্কীল চেণ্টাৰ স্থাপনৰ সিদ্ধান্ত গ্ৰহণ কৰিছে ৰাজ্যিক কেবিনেটে । মুখ্যমন্ত্ৰীয়ে সদৰী কৰা মতে, এই স্কীল চেণ্টাৰ নিৰ্মাণৰ বাবে খৰচ হ’ব ৯০ কোটি টকা । অৰ্থাৎ ৯০ কোটি ব্যয় সাপেক্ষে ৰাজ্যত নিৰ্মাণ কৰা হ’ব এই ১০ টা স্কীল চেণ্টাৰ ।
- অসম বিধানসভাত উত্থাপন কৰিবলগীয়া কেইবাখনো বিধেয়কত কেবিনেটে অনুমোদন জনোৱাৰ কথাও সদৰী কৰিছে মুখ্যমন্ত্ৰীয়ে । ইয়াৰ ভিতৰত আছে নতুনকৈ বিশ্ববিদ্যালয়সমূহৰ উপাচাৰ্য নিযুক্তি প্ৰক্ৰিয়া যাতে তাৎক্ষণিক কৰিব পাৰি তাৰ বাবে সংশোধনী বিধেয়ক বিধানসভাত উত্থাপন কৰিব ৰাজ্য চৰকাৰে।
- এতিয়াৰে পৰা নতুনকৈ উত্তীৰ্ণ হোৱা অভিযন্তাসকলে ৰাজ্য় চৰকাৰ নিবিদাৰ জৰিয়তে ঠিকা লাভ কৰাৰ ক্ষেত্ৰত পাঁচ বছৰৰ বাবে কিছু প্ৰয়োজনীয় চৰ্তাৱলী শিথিল কৰাৰ বাবে সিদ্ধান্ত গ্ৰহণ কৰিছে ৰাজ্য চৰকাৰে । থলুৱা ঠিকাদাৰ সৃষ্টিৰ লক্ষ্যৰে এই সিদ্ধান্ত গ্ৰহণ কৰিছে ৰাজ্য চৰকাৰে ।
- ৰাজ্যিক কেবিনেটে লোৱা আন এটা গুৰুত্বপূৰ্ণ সিদ্ধান্ত হৈছে, এতিয়া পৰা ব্য়ক্তিগত বিশ্ববিদ্যালয় স্থাপন কৰিবলৈ National Security Clearance ৰ প্ৰয়োজন হ’ব । গৃহ বিভাগ আৰু ৰাজনৈতিক বিভাগে Security Clearance দিয়াৰ পাছত হে কোনো ব্যক্তিয়ে অসমত ব্যক্তিগত বিশ্ববিদ্যালয় স্থাপন কৰিব পাৰিব । ইয়াৰ লগতে অসমত যি সমূহ ব্যক্তিগত বিশ্ববিদ্য়ালয় থাকিব তেওঁলোক সম্পূৰ্ণৰূপে ধৰ্মনিৰপেক্ষ হ’ব লাগিব । তদুপৰি ধৰ্মান্তৰকৰণ দৰে কাৰ্যক সমৰ্থন কৰিব নোৱাৰিব এই ব্যক্তিগত বিশ্ববিদ্যালয়সমূহে ।
- ৰাজ্যিক কেবিনেটৰ আন এটা গুৰুত্বপূৰ্ণ সিদ্ধান্ত হৈছে যিকোনো নিৰ্মাণ কাৰ্যত কমেও ৫ শতাংশ বাঁহ ব্যৱহাৰ কৰিব লাগিব।
- কেবিনেটে ছিপাঝাৰ আৰু তিনিচুকীয়াত দুখন ব্যক্তিগত বিশ্ববিদ্যালয় স্থাপনৰ অনুমোদন জনোৱাৰ বাবে সিদ্ধান্ত গ্ৰহণ কৰে । এডভান্টেজ আছাম ২.০ আন্তঃগাঁথনি আৰু বিনিয়োগ সন্মিলনৰ সময়ত স্বাক্ষৰিত বুজাবুজি চুক্তিৰ আধাৰত নিৰ্মাণ হ’ব এই দুয়োখন বিশ্ববিদ্যালয় ।