অৰুণাচলৰ মপিন উৎসৱত অংশগ্ৰহণ মুখ্যমন্ত্ৰীৰ, ভাষণত সীমা বিবাদ সম্পূৰ্ণ সমাধানৰ আশ্বাস হিমন্তৰ

মুখ্যমন্ত্রী ড° হিমন্ত বিশ্ব শর্মাই আজি অৰুণাচল প্রদেশৰ আলোত অনুষ্ঠিত গালো জনগোষ্ঠীৰ মপিন উৎসৱত অংশগ্ৰহণ কৰে। মপিন উৎসৱৰ ৫৯ সংখ্যক কেন্দ্রীয় উদযাপন অনুষ্ঠানত মুখ্য অতিথি হিচাপে ভাষণ দি মুখ্যমন্ত্রী ড° শৰ্মাই কয় যে, এই উৎসৱে অৰুণাচল প্ৰদেশৰ চহকী সাংস্কৃতিক দিশ উদ্ভাসিত কৰাৰ লগতে নিজস্ব সংস্কৃতিৰ প্ৰতি জনসাধাৰণৰ থকা অন্তর্নিহিত বন্ধনক প্রতিফলিত কৰিছে। অসমবাসীৰ হৈ অৰুণাচলবাসী ৰাইজক মপিন উৎসৱৰ শুভকামনা জ্ঞাপন কৰি তেওঁ কয় যে, এই উৎসৱে গালো জনগোষ্ঠীৰ সাংস্কৃতিক ঐতিহ্যৰ পৰিচয় বহন কৰি আহিছে।

মপিন শস্য চপোৱা উৎসৱ বুলি উল্লেখ কৰি তেওঁ কয় যে, এই উৎসৱে সকলোৰে মাজত সমন্বয় বার্তা বহন কৰি আহিছে। তেওঁ কয় যে, অৰুণাচলৰ প্ৰদেশৰ সমৃদ্ধ সাংস্কৃতিক পৰিচয় মপিন উৎসৱৰ দ্বাৰা জীৱন্ত ৰূপত প্রতিফলিত হয়। উৎসৱ সমর্পিত আৰু পপিৰ নৃত্য, লোকগীতৰ মাজত এই উৎসৱে প্রাণ পাই উঠে। এই উৎসৱ পালনে সামাজিক সম্পর্কক অধিক সুদৃঢ় কৰে বুলিও কয় মুখ্যমন্ত্ৰীয়ে ।

মপিন উৎসৱত অসমৰ মুখ্যমন্ত্ৰী

তেওঁ কয় যে, মপিন উৎসৱে সংস্কৃতি আৰু প্ৰকৃতিৰ মাজৰ সম্পর্ককো প্রতিফলিত কৰে। হাজাৰ হাজাৰ বছৰ ধৰি পৰম্পৰাগত লোক-কৃষ্টিৰে মপিন উৎসৱ পালন কৰি অহা কৰি অহা হৈছে। বিশ্বৰ বহু সাংস্কৃতিক জীৱনশৈলী দুশ-তিনিশ বছৰ পিছত অৱনমিত হৈ পৰিছে যদিও মপিন উৎসৱ হাজাৰ হাজাৰ বছৰ ধৰি জীৱন্ত ৰূপত থাকিব কয় মুখ্যমন্ত্ৰীয়ে । তদুপৰি মুখ্যমন্ত্রীয়ে গালো জনগোষ্ঠীৰ যুৱ প্ৰজন্মক বিজ্ঞান-প্রযুক্তিৰ প্ৰতি আকর্ষিত হৈও নিজস্ব পৰম্পৰা, আধ্যাত্মিক জীৱন অক্ষুণ্ণ বাখিবলৈ আহ্বান জনায় মুখ্যমন্ত্ৰীয়ে ।

ইফালে, অসম আৰু অৰুণাচল প্রদেশৰ মাজত সাংস্কৃতিক দৃষ্টিৰে অতি নিকট সম্পর্ক আছে বুলি মন্তব্য কৰি মুখ্যমন্ত্রীয়ে কয় যে, দুয়োখন ৰাজ্যৰ সীমা বিবাদ বর্তমানৰ ব্যৱস্থাৰ অধীনত সম্পূর্ণৰূপে সমাধান কৰা হ’ব। মুখ্যমন্ত্রীয়ে কয় যে, ড° ভূপেন হাজৰিকাৰ জন্ম শতবার্ষিকী ২০২৬ চনত পালন কৰা হ’ব। তেওঁ লগতে কয় যে, অৰুণাচল প্রদেশৰ প্রতি ড° ভূপেন হাজৰিকাৰ থকা গভীৰ আন্তৰিকতাৰ বাবে অসম চৰকাৰে অৰুণাচল প্রদেশতো এই শতবার্ষিকী পালন কৰিবলৈ ইচ্ছুক। এই ক্ষেত্রত সহযোগিতা আগবঢ়াবলৈ তেওঁ অৰুণাচল প্রদেশৰ মুখ্যমন্ত্রীক আহ্বান জনায় হিমন্ত বিশ্ব শৰ্মাই ।