আলফা স্বাধীনৰ শক্তি আছে, উত্তৰ-পূবৰ শান্তিৰ বাবে গুৰুত্বপূৰ্ণ বাংলাদেশৰ পৰৱৰ্তী নিৰ্বাচন: মুখ্যমন্ত্ৰী শৰ্মা

আলফা স্বাধীনৰ প্ৰভাৱ এতিয়াও আছে আৰু তেওঁলোকক আলোচনাৰ মেজলৈ আনিবলৈ প্ৰচেষ্টা চলাই থকা হৈছে । অসমত আলফা স্বাধীনৰ প্ৰভাৱক পুনৰ স্বীকাৰ কৰিলে অসমৰ মুখ্যমন্ত্ৰী হিমন্ত বিশ্ব শৰ্মাই । অসমৰ মুখ্যমন্ত্ৰী গৰাকীয়ে উল্লেখ কৰিছে যে, উত্তৰ-পূবৰ শান্তি অতুত থাকিব নে নাই সেই কথা নিৰ্ণয় কৰিব বাংলাদেশৰ পৰৱৰ্তী নিৰ্বাচনে । উত্তৰ-পূৰ্বৰ শান্তিৰ ক্ষেত্ৰত বাংলাদেশৰ আগন্তুক নিৰ্বাচন অতি গুৰুত্বপূৰ্ণ হ’ব বুলি কয় মুখ্যমন্ত্ৰী শৰ্মাই ।

সংবাদ মাধ্যমৰ আগত মুখ্যমন্ত্ৰী গৰাকীয়ে কয়, “এটা ভাল নেটৱৰ্ক আছে আলফা স্বাধীনৰ । আধুনি অস্ত্ৰ-শস্ত্ৰৰ পৰা আৰম্ভ কৰি আলফাৰ ৭০০ কেডাৰ আছে । গতিকে বৰ্তমান আলফা স্বাধীনৰ শক্তি নাই বুলি ক’ব নোৱাৰি । আলফা স্বাধীনৰ প্ৰকৃততে ক্ষমতা কিমান সেই কথা সঠিকভাৱে কোৱা টান । এটা কথা ক’ব পাৰি যে, আলফা স্বাধীনৰ হাতত অস্ত্ৰ-শস্ত্ৰ আৰু প্ৰযুক্তি আছে ।”

ইয়াৰ সমান্তৰালভাৱে মুখ্যমন্ত্ৰী শৰ্মাই দাবী কৰে যে,শ্বেখ হাছিনা চৰকাৰৰ পতনৰ পাছত উত্তৰ-পূর্বাঞ্চলৰ বিদ্ৰোহী পৰিস্থিতি সলনি হ’ব পাৰে । কিন্তু ভাৰত চৰকাৰে অপেক্ষা কৰিব লাগিব । কিয়নো এতিয়াও বাংলাদেশৰ নিৰ্বাচন অনুষ্ঠিত হোৱা নাই । উল্লেখ্য যে, বৰ্তমান বাংলাদেশত অন্তৱৰ্তীকালীন চৰকাৰে শাসন চলাই আছে ।

ইফালে, অসমৰ মুখ্যমন্ত্ৰী হিমন্ত বিশ্ব শৰ্মাই শনিবাৰে দাবী কৰে যে, চুবুৰীয়া দেশখনৰ অস্থিৰতাৰ মাজত এজনো হিন্দুৱে বাংলাদেশৰ পৰা ভাৰতত প্ৰৱেশ কৰাৰ বাবে চেষ্টা কৰা নাই । তেওঁ কয়,‘হিন্দুসকলে বাংলাদেশতে থাকি সমস্যাৰ সৈতে মোকাবিলা কৰি আছে । যোৱা এমাহত ভাৰতত প্ৰৱেশ কৰিবলৈ চেষ্টা কৰা এজনো হিন্দু ব্যক্তি ধৰা পৰা নাই।’

ইয়াৰ বিপৰীতে বিগত এমাহত ৩৫ গৰাকী মুছলমান অনুপ্ৰৱেশকাৰীক আটক কৰাৰ কথা সদৰী কৰিছে মুখ্যমন্ত্ৰী শৰ্মাই । বাংলাদেশৰ পৰা অনুপ্ৰৱেশ কৰা এই মুছলমানসকলে কেৱল ভাৰতৰ বস্ত্ৰ খণ্ডত কৰ্মসংস্থাপন বিচাৰি অহা বুলি উল্লেখ কৰিছে মুখ্যমন্ত্ৰী শৰ্মাই । তেওঁ কয়,’অনুপ্ৰৱেশ কৰা মুছলমানসকল অসমৰ বাবে নহয়, বস্ত্ৰ উদ্যোগত কাম কৰিবলৈ বাংগালুৰু, তামিলনাডু, কইম্বাটুৰলৈ যাবলৈহে আহিছে ।’