Assam: শ্বিলঙলৈ ফুৰিব গৈছিল প্ৰেমিক- প্ৰেমিকা! ট্ৰাকৰ চেপাত থিতাতে হেৰুৱালে প্ৰাণ

মেঘালয়লৈ ফুৰিব যোৱাই কাল হ’ল দুই প্ৰেমিক- প্ৰেমিকাৰ। যুৱকজনে চাকৰি লাভৰ পাছতেই যুৱতীগৰাকীক লৈ মেঘালয় ফুৰিব  গৈছিল যদিও জীৱিত অৱস্থাত ঘৰলৈ ঘূৰি অহাৰ সৌভাগ্য নহ’ল তেওঁলোকৰ। এক ভয়ংকৰ পথ দুৰ্ঘটনাই প্ৰাণ কাঢ়িলে দুয়োৰে।  মেঘালয়ৰ ৰিভৈ জিলাৰ ছাংবাংলাত গুৱাহাটী- শ্বিলং সংযোগী ৬ নং ৰাষ্ট্ৰীয় ঘাইপথত এক ভয়ংকৰ পথ দুৰ্ঘটনাত পতিত হৈ মৃত্যু হয় অসমৰ দুই যুৱক- যুৱতীৰ। দুয়োৰে ঘৰ মৰানত বুলি জানিব পৰা গৈছে। এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।

পথ দুৰ্ঘটনাত মৃত্য়ু হোৱা যুৱকজন মৰানৰ ২ নং সৰুপথাৰ গাঁৱৰ ২৩ বছৰীয়া নিলোৎপল দুৱাৰী আৰু যুৱতীগৰাকী মৰানৰ জ্যোতিপুৰ গদাধৰ সিংহ পথৰ ২১ বছৰীয়া গাৰ্গী চুতীয়া বুলি জানিব পৰা গৈছে। একাংশৰ মতে দুয়ো প্ৰেমিক-প্ৰেমিকা আছিল আৰু গুৱাহাটীৰ পৰা শ্বিলঙলৈ ফুৰিবলৈ গৈছিল।

ঘটনাৰ বিৱৰণী অনুসৰি AS- 01- ee- 3367 নম্বৰৰ ৰয়েল এনফিল্ড হিমালয়ান বাইকখনেৰে দুয়ো গৈ থাকোতে আহি থকা এখন ট্ৰাকত প্ৰচণ্ড যোৰে খুন্দা মাৰে। এই ভয়ংকৰ মুখামুখি সংঘৰ্ষৰ ফলত দুয়োৰে থিতাতে মৃত্যু হয়। এই ঘটনাই দুই যুৱক- যুৱতীৰ পৰিয়ালৰ মাজত শোকাস্তব্ধ পৰিবেশে বিৰাজ কৰিছে।

দেওবাৰে সংঘটিত হোৱা এই দুৰ্ঘটনাৰ পাছতেই সমগ্ৰ মৰান শোকত ভাগি পৰিছে। ইতিমধ্যে যুৱকজনৰ মৃতদেহ আনি  পৰিলায়ৰলোকে শেষকৃত্য সম্পন্ন কৰাৰ ব্যৱস্থা কৰিছে যদিও এতিয়ালৈকে যুৱতীগৰাকীৰ মৃতদেহ স্ব-গৃহ পোৱাহি নাই। যুৱতীগৰাকীৰ পৰিয়ালৰলোক খবৰ শুনাৰ পাছতেই অচেতন হৈ পৰে।

স্থানীয়লোকসকলে জনাই যে, দুই যুৱক- যুৱতী অতি মেধাৱী আছিল। কিছুদিন পূৰ্বে যুৱকজনে চাকৰি লাভ কৰিছিল। ইয়াৰে আনন্দত যুৱতীগৰাকীৰ পাৰ্টী দিব বুলি শ্বিলঙলৈ লৈ গৈছিল। কিন্তু শ্বিলং ভ্ৰমণেই কাল হৈ আহিল দুয়োৰে জীৱনলৈ। ট্ৰাকৰ চেপাত প্ৰাণ হেৰুৱালে দুই সম্ভাৱনাই। এই  সমগ্ৰ ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে।