ADRE ৰ তৃতীয় পৰ্যায়ৰ পৰীক্ষাক লৈ বিশেষ নিৰ্দেশনা…

ADRE তৃতীয় পৰ্যায়ৰ পৰীক্ষাৰ প্ৰস্তুতিক লৈ বৈঠক

ৰাজ্যৰ চৰকাৰৰ প্ৰত্যক্ষ নিযুক্তি পৰীক্ষা তথা চতুৰ্থ বৰ্গৰ পৰীক্ষা অহা দেওবাৰে অনুষ্ঠিত হ’ব । এই পৰীক্ষাৰ প্ৰস্তুতি সন্দৰ্ভত বুজ লোৱাৰ বাবে অসমৰ মুখ্য সচিব ৰবি কোটাই জিলাসমূহৰ আয়ুক্ত আৰু আৰক্ষী অধীক্ষকসকলৰ সৈতে ভিডিঅ’ কনফাৰেন্সৰ জৰিয়তে এক বৈঠকত মিলিত হয় । অহা ২৭ অক্টোবৰত অনুষ্ঠিত হ’বলগীয়া অসমৰ প্ৰত্যক্ষ নিযুক্তিৰ তৃতীয় পৰ্যায়ৰ পৰীক্ষা প্ৰথমবেলা পুৱা ৯:৩০ বজাৰ পৰা ১১:৩০ বজালৈ অনুষ্ঠিত হ’ব । ইফালে পিছবেলা পৰীক্ষা দুপৰীয়া ১:৩০ বজাৰ পৰা বিয়লি ৪:০০ বজালৈ অনুষ্ঠিত হ’ব ।

তৃতীয় পৰ্যায়ৰ প্ৰত্যক্ষ নিযুক্তি পৰীক্ষাত ৰাজ্যৰ মুঠ ৮,২৭,১৩০ জন প্ৰাৰ্থী অৱতীৰ্ণ হ’ব বুলি জানিব পৰা গৈছে । এই প্ৰত্যক্ষ নিযুক্তি পৰীক্ষা অধিক স্বচ্ছতাৰে অনুষ্ঠিত কৰা ওপৰত অধিক গুৰুত্ব প্ৰদান কৰিছে ৰাজ্য চৰকাৰে। উল্লেখ্য যে, আজি আয়োজিত বৈঠকৰ জৰিয়তে কিছু নিৰ্দেশনা জাৰি কৰিছে অসমৰ মুখ্য সচিব গৰাকীয়ে । লগতে এই নিৰ্দেশনাত সন্নিবিষ্ট নীতি-নিয়ম সমূহ মানি চলাৰ ওপৰত গুৰুত্ব প্ৰদান কৰিছে মুখ্য সচিব গৰাকীয়ে ।

কি কি নিৰ্দেশনা মানি চলিব লাগিব:

• কেন্দ্ৰৰ ভাৰপ্ৰাপ্ত বিষয়া, তত্বাৱধায়ক আৰু নিৰীক্ষণকাৰীৰ প্ৰশিক্ষণ আকৌ এবাৰ অনুষ্ঠিত কৰিব লাগিব।
• ডিচি আৰু এছপিসকলে নিজ নিজ এলেকাত সামগ্ৰিক তত্বাৱধানৰ বাবে ঘনিষ্ঠভাৱে সমন্বয় স্থাপন কৰিব লাগিব আৰু স্পৰ্শকাতৰ কেন্দ্ৰসমূহৰ তদাৰক কৰিব লাগিব।
• প্ৰাৰ্থী আৰু সাধাৰণ জনতাৰ চলাচলত ভিৰ হ্ৰাস কৰাটো নিশ্চিত কৰিবলৈ পৰিবহণ বিভাগে সকলো অংশীদাৰৰ সৈতে সমন্বয় স্থাপন কৰিব লাগিব।
• পৰীক্ষাৰ্থীৰ সুবিধা হোৱাকৈ বিশেষ ৰে’লৰ বাবে সংশ্লিষ্ট বিভাগে এন এফ আৰৰ সৈতে সমন্বয় স্থাপন কৰিব লাগিব।
• ৰেলৱে প্লেটফৰ্ম আৰু বাছ ষ্টেণ্ডত অনাময় সম্পৰ্কীয় সকলো সেৱা উপলব্ধ কৰিব লাগে।
• আৰক্ষীয়ে ছ’চিয়েল মিডিয়াৰ কাম-কাজ নিৰীক্ষণ কৰিব লাগিব আৰু যিকোনো সমস্যাৰ বিষয়ে ডিজিপি অসম আৰু আই জি ল’ এণ্ড অৰ্ডাৰক খবৰ দিব লাগিব। এই নিৰীক্ষণ স্থানীয় আৰু কেন্দ্ৰীয় দুয়োটা দিশতে চলি থাকিব।
• মহিলা প্ৰাৰ্থীক মৰ্যাদাপূৰ্ণভাৱে চেকিং কৰিব লাগিব আৰু এই কামত নিয়োজিত সকলো কৰ্মী সংবেদনশীল হ’ব লাগিব । যিকোনো অনুচিত আচৰণৰ বিষয়ে তৎক্ষণাত কেন্দ্ৰটোৰ ভাৰপ্ৰাপ্ত বিষয়াক অৱগত কৰিব লাগিব।
• পূৰ্বৰ দৰেই প্ৰাৰ্থীসকলে লেবেল নথকা পানীৰ বটল কঢ়িয়াই নিব পাৰিব।
• কোনো প্ৰাৰ্থীয়ে যদি পৰীক্ষাৰ সময়ত নিয়ম উলংঘা কৰে, তেন্তে ‘The Assam Public Examination (Measures for Recruitment in Recruitment) আইন, ২০২৪’ৰ ধাৰা ১০(১)ৰ অধীনত তিনি বছৰ পৰ্যন্ত কাৰাদণ্ডৰ শাস্তি হ’ব পাৰে।
• জিলা দণ্ডাধীশসকলে নিৰ্ধাৰিত দিনত পৰীক্ষা কেন্দ্ৰৰ পৰা ১০০ মিটাৰ দূৰত্বৰ ভিতৰত প্ৰাৰ্থী আৰু পৰীক্ষা পৰিচালনা আৰু নিৰীক্ষণত নিয়োজিত বিষয়াসকলৰ বাহিৰে আন কোনো লোকৰ প্ৰৱেশ নিষিদ্ধ কৰিব লাগিব । ইয়াৰ বাবে ‘ভাৰতীয় নগৰিক সুৰক্ষা সংহিতা, ২০২৩’ৰ ১৬৩ নং ধাৰা অধীনত নিৰ্দেশ জাৰি কৰিব লাগিব।