ৰাজ্যৰ সকলো চৰকাৰী কৰ্মচাৰীৰ ছুটী বাতিল, কিয় এই সিদ্ধান্ত?

চৰকাৰী কৰ্মচাৰী

ৰাজ্যৰ চৰকাৰী কৰ্মচাৰীসকলৰ বাবে এক বেয়া খবৰ।  কিয়নো ৰাজ্যিক কৰ্মচাৰীৰ সকলো ছুটী সাময়িকভাৱে বাতিল কৰা হৈছে। ৰাজ্যত অনুষ্ঠিত হ’বলগীয়া পঞ্চায়ত নিৰ্বাচনৰ বাবে বাতিল কৰা হৈছে ছুটী। এই সন্দৰ্ভত অসম ৰাজ্যিক নিৰ্বাচন আয়োগে জাৰি কৰিছে নিৰ্দেশনা। ইয়াৰ বাবে ৰাজ্যৰ প্ৰতিখন জিলাৰ জিলা আয়ুক্তলৈ নিৰ্দেশনা জাৰি লগতে প্ৰতিখন সম-জিলাৰ উপ-আয়ুক্তলৈও নিৰ্দেশনা জাৰি কৰা হৈছে। নিৰ্দেশনা অনুসৰি পঞ্চায়ত নিৰ্বাচন সম্পন্ন নোহোৱা পৰ্যন্ত ৰাজ্যত সকলো চৰকাৰী কৰ্মচাৰীৰ ছুটী বাতিল কৰা হৈছে। এই সময়চোৱাত বন্ধ থাকিব ৰাজ্যিক কৰ্মচাৰীৰ নৈমিত্তিক ছুটীও।

কোনো কাৰণত যদি কৰ্মচাৰীসকলে ছুটী ল’বলগীয়া হয় তেন্তে নিৰ্বাচন আয়োগৰ পৰা অনুমতি ল’ব লাগিব। অন্যথা কোনো কৰ্মচাৰীয়ে ছুটী লাভ নকৰে। উল্লেখ্য যে, কিছুদিন পাছতে ৰাজ্যত অনুষ্ঠিত হ’ব পঞ্চায়ত নিৰ্বাচন। এতিয়ালৈকে এই নিৰ্বাচনৰ দিন ঘোষণা হোৱা নাই যদিও আজি সন্ধিয়া দিন ঘোষণা হোৱাৰ সম্ভাৱনা আছে। বুধবাৰে সন্ধিয়া ৫ বজাত পাঞ্জাবাৰীস্থিত ৰাজ্যিক নিৰ্বাচন আয়োগৰ সভাগৃহত ৰাজ্যিক নিৰ্বাচন আয়ুক্তই এক সংবাদ মেল সম্বোধন কৰিব, এই সংবাদমেলতে পঞ্চায়ত নিৰ্বাচনৰ দিন ঘোষণা কৰিব।

নিৰ্বাচনক লৈ ইতিমধ্যে সাজু হৈছে আয়োগ। এই ক্ষেত্ৰত নিৰ্বাচন আয়োগে ৰাজ্যৰ মুখ্য সচিবলৈ নিৰ্বাচন সংক্ৰান্তীয় নীতি নিয়ম সন্দৰ্ভত এক জাননী জাৰি কৰি সকলো বিভাগক সাজু হ’বলৈ আহ্বান জনাইছে। ইযাৰোপৰি কিছুদিন পূৰ্বে সোমবাৰে মুখ্যমন্ত্ৰী হিমন্ত বিশ্ব শৰ্মাই ফেচবুক লাইভৰ জৰিয়তে ২ এপ্ৰিলৰ পৰা ৫ এপ্ৰিলৰ ভিতৰত পঞ্চায়ত নিৰ্বাচনৰ দিন ঘোষণা কৰাৰ পূৰ্ণ সম্ভাৱনা আছে বুলি মত প্ৰকাশ কৰিছিল। ইয়াৰ পাছতে মঙলবাৰে নিৰ্বাচন আয়োগে এক জাননীৰ জৰিয়তে সংবাদ মেল সন্দৰ্ভত ৰাজ্যিক তথ্য আৰু জনসংযোগ বিভাগত অৱগত কৰিছিল।

উল্লেখ্য যে, এইবাৰৰ পঞ্চায়ত নিৰ্বাচন পূৰ্বতকৈ পৃথকভাৱে অনুষ্ঠিত হ’ব। এইবাৰ প্ৰাৰ্থীৰ নাথাকে কোনো দলীয় চিহ্ন। ইয়াৰোপৰি এইবাৰ সভাপতিৰ বাবে কোনো প্ৰত্যক্ষ নিৰ্বাচন নহয়। গাঁও পঞ্চায়তৰ বাবে নিৰ্বাচিত হোৱা সদস্যই সভাপতি নিৰ্বাচন কৰিব। এইবাৰ ই ভি এমৰ পৰিবৰ্তে বেলট পেপাৰত অনুষ্ঠিত হ’ব নিৰ্বাচন। গতিকে সম্পূৰ্ণ পৃথক পদ্ধতিত এইবাৰৰ নিৰ্বাচন অনুষ্ঠিত হ’ব। ইতিমধ্যে নিৰ্বাচনক লৈ সাজু হৈছে প্ৰাৰ্থীসকলে।

মন কৰিবলগীয়া যে, এইবাৰ পঞ্চায়ত নিৰ্বাচনক লৈ বিভিন্ন বিতৰ্কৰ সৃষ্টি হৈছিল। এই সন্দৰ্ভত বিৰোধী দলসমূহে শাসকীয় দলক কটাক্ষ কৰি গৈছিল। গতিকে সকলো বিতৰ্কৰ অন্ত পেলাই শীঘ্ৰেই ৰাজ্যত অনুষ্ঠিত হ’ব পঞ্চায়ত নিৰ্বাচন।