শ্ৰীমন্ত শংকৰদেৱৰ মর্যাদা হানিৰ নিকৃষ্ট ষড়যন্ত্ৰ কৰিছে হিমন্ত বিশ্ব শৰ্মা চৰকাৰে: অজাপ

কাইলে অসম চৰকাৰে প্ৰদান কৰিব ৰাজ্যিক বঁটা। ইয়াৰ পূৰ্বে অসম জাতীয় পৰিষদে মুখ্যমন্ত্ৰী হিমন্ত বিশ্ব শৰ্মাৰ নেতৃত্বাধীন চৰকাৰখনলৈ কেইবাটাও গুৰুত্বপূৰ্ণ প্ৰশ্ন কৰে। পৰিষদৰে কয় যে, হিমন্ত বিশ্ব শৰ্মা চৰকাৰে গুৰুজনাৰ মৰ্যদা লাঘৱ কৰাৰ চেষ্টা কৰিছে। এই সন্দৰ্ভত জাতীয় পৰিষদে এখন প্ৰেছ বিবৃতি জাৰি কৰিছে। এই প্ৰেছ বিবৃতিখন অ-সম্পাদিত ৰূপত তলত উল্লেখ কৰা হল-

▪️অসম চৰকাৰে ইতিপূৰ্বে ‘অসম বৈভৱ’, ‘অসম সৌৰভ’ আৰু ‘অসম গৌৰৱ’ বঁটা প্ৰাপকসকলৰ নাম ঘোষণা কৰিছে ৷ সেনা বাহিনীৰ অৱসৰপ্ৰাপ্ত লেফটেনেন্ট জেনাৰেল শ্ৰী ৰাণা প্ৰতাপ কলিতা ডাঙৰীয়ালৈ ‘অসম বৈভৱ’ বঁটা আৰু আন কেইবগৰাকী বিশিষ্ট ব্যক্তিক বাকী দুটা বঁটা আগবঢ়োৱা হ’ব ৷

▪️ কাইলৈ খানাপাৰাত তেখেতসকলক অসম চৰকাৰে উক্ত বঁটা প্ৰদান কৰিব ৷ বঁটা প্ৰাপকসকলক অসম জাতীয় পৰিষদে অভিনন্দন জনায় ৷ তেখেতসকলে দেশ আৰু জাতিৰ প্ৰতি আগঢ়োৱা অৱদানৰ আমাৰ দলে শলাগ লয় আৰু তেখেতকেইগাৰীক সুস্বাস্থ্য আৰু ভৱিষ্যতৰ কল্যাণ কামনা কৰে ৷

▪️অসম চৰকাৰে ইতিপূৰ্বে ‘অসম বৈভৱ’ বঁটাক ৰাজ্যৰ সৰ্বোচ্চ অসামৰিক সন্মান হিচাপে ঘোষণা কৰিছে ৷ কিন্তু প্ৰকৃততে ৰাজ্যৰ সৰ্বোচ্চ অসামৰিক বঁটা/সন্মান কোনটো?

▪️কাৰণ, ১৯৮৬ চনত অসম চৰকাৰে মহাপুৰুষ শ্ৰীমন্ত শঙ্কৰদেৱৰ সন্মানাৰ্থে ৰাজ্যৰ সৰ্বোচ্চ অসামৰিক সন্মান হিচাপে শ্ৰীমন্ত শংকৰদেৱ বঁটা প্ৰৱৰ্তন কৰিছিল৷ তেতিয়াৰে পৰা দেশৰ বিভিন্ন প্ৰান্তৰ বৰেণ্য ব্যক্তিসকলক এই বঁটা প্ৰদান কৰি অহা হৈছে৷ অসম চৰকৰৰ সাংস্কৃতিক পৰিক্ৰমা সঞ্চালকালয়ৰ ৱেব ছাইটতো ৰাজ্যৰ সর্বোচ্চ অসামৰিক সন্মান হিচাপে এই বঁটাৰ নাম শীর্ষত তালিকাভূক্ত কৰা আছে৷

▪️প্ৰথমে বঁটাটো প্ৰতি বছৰে দিয়া হৈছিল৷ ২০০৮ চনত তৰুণ গগৈ ডাঙৰীয়াৰ চৰকাৰে বঁটাটো এবছৰীয়াৰ ঠাইত তিনি বছৰীয়া কৰি পেলালে৷ সেই অনুসৰি ২০২০ চনলৈ ৩ বছৰৰ মূৰে মূৰে হ’লেও বঁটাটি প্ৰদান কৰি থকা হৈছিল৷ কিন্তু ডঃ হিমন্ত বিশ্ব শৰ্মাৰ চৰকাৰে শ্ৰীমন্ত শংকৰদেৱ বঁটাৰ ঠাইত ৰাজ্যৰ সর্বোচ্চ অসামৰিক সন্মান হিচাপে অসম বৈভৱ বঁটা প্ৰৱৰ্তন কৰে৷

▪️ অসম চৰকাৰে ২০১৭ চনত স্বৰ্গীয় বশিষ্ঠ দেৱ শৰ্মা আৰু ২০২০ চনত শ্ৰীযুত ভৱপ্ৰসাদ চলিহা ডাঙৰীয়াক এই সন্মান প্ৰদান কৰা হৈছিল৷ ২০২৩ চনত শ্ৰীমতী সোণাল মানসিং ডাঙৰীয়ানীৰ নাম উক্ত বঁটাৰ বাবে ঘোষণা কৰা হৈছিল যদিও বঁটাটো এতিয়ালৈকে তেখেতলৈ আগবঢ়োৱা হোৱা নাই ৷

▪️গতিকে, ৰাইজৰ মনত এতিয়া স্বাভাৱিক প্ৰশ্ন যে ৰাজ্যৰ সৰ্বোচ্চ অসামৰিক সন্মান কোনটো ? শ্ৰীমন্ত শংকৰদেৱ বঁটা নে অসম বৈভৱ বঁটা? শ্ৰীমন্ত শংকৰদেৱ বঁটাটো সৰ্বোচ্চ অসমাৰিক সন্মান হিচাপে বৰ্তি থকাৰ পাছতো আন এটা সমমৰ্যাদাৰ বঁটা প্ৰৱৰ্তনৰ কাৰণ কি?

আমাৰ মতে :

🔸এয়া মহাপুৰুষ শ্ৰীমন্ত শংকৰদেৱ আৰু তেখেতৰ দৰ্শন, আদর্শ, পথ, জীৱনবোধৰ ওপৰত চলি থকা পৰিকল্পিত তথা কৌশলগত ষড়যন্ত্ৰ তথা আক্ৰমণ৷

🔸 অসমীয়া জাতি বুলিলে আমি কি বুজো? অসমৰ ভৌগোলিক চাৰিসীমাৰ ভিতৰত বসবাস কৰা সেইসকল ভাৰতীয় লোক যিসকলৰ মাতৃভাষা আৰু সংস্কৃতি অসমীয়া৷ তাৰ সৈতে বহল অৰ্থত আমি সেইসকল ভাৰতীয় লোককো সামৰি লওঁ যিসকলে অসমীয়াক মাতৃভাষা হিচাপে গ্ৰহণ কৰিছে বা অসমীয়া তথা অন্য থলুৱা ভাষা-সংস্কৃতিৰ প্ৰতি যাৰ শ্ৰদ্ধা আছে – অথচ অসমৰ বাহিৰে পৃথিৱীৰ আন প্ৰান্তত তেওঁলোকৰ দ্বিতীয় এখন ঘৰ নাই৷

🔸 বাৰশ শতিকাত পাটকাই পৰ্বত পাৰ হৈ আহি স্বৰ্গদেও চুকাফাই সেই অসমীয়া জাতিৰ ৰাজনৈতিক ভেটি প্ৰতিষ্ঠা কৰিছিল – এই কথাত কাৰো দ্বিমত নাই ৷ তাৰ সৈতে মহাৰাজ নৰনাৰায়ন আৰু সমসাময়িক অন্য সৰু-বৰ ৰজা-উপ ৰজা কিম্বা ৰাজ্যসমূহৰ অৱদান সংযোগ হৈছিল ৷

🔸পোন্ধৰশ শতিকাত মহাপুৰুষ শ্ৰীমন্ত শংকৰদেৱে ভাষা-সংস্কৃতি; গীত-মাত-নাট-নৃত্য আদিৰে এক সাংস্কৃতিক ভেটি গঢ়ি অসমীয়া জাতিৰ প্ৰাণ প্ৰতিষ্ঠা কৰিছিল – যাৰ পূৰ্ণ ৰূপ এটা সমৃদ্ধ অসমীয়া জাতি আজি আমি দেখিবলৈ পাইছো৷
তাৰ পিছত মহাপুৰুষ মাধবদেৱৰ পৰা আৰম্ভ কৰি কালক্ৰমত ‘অৰুণোদই’ আলোচনী হৈ আজিলৈকে এক দীঘলীয়া পৰিক্ৰমা৷

🔸 আজিৰ তাৰিখত অসমীয়া এটা পৰিপূৰ্ণ, স্বতন্ত্ৰ আৰু সমৃদ্ধ জাতি৷ প্ৰায় ডেৰ কোটি জনসংখ্যাৰে অসমীয়া পৃথিৱীৰ ভিতৰত তুলনামূলকভাৱে বৰ সৰু জাতিও নহয়৷ (যেনে এসময়ৰ বিশ্ববিজয়ী বৃটিছ/ইংৰাজ জাতিৰ জনসংখ্যা ৬ কোটি৷ আন এটা সমৃদ্ধ জাতি জাৰ্মানসকলৰ জনসংখ্যা ৮ কোটি৷ বাঙালীসকলৰ জনসংখ্যা ১৬ কোটি৷)

🔸 দ্বিমত নাই যে সকলো জাতিৰে যেনেকৈ একো একোগৰাকীকৈ জনক বা প্ৰাণ প্ৰতিষ্ঠাতা সৰ্বজন স্বীকৃত হয়, তেনেকৈ অসমীয়া জাতিৰ প্ৰাণ প্ৰতিষ্ঠাতা (ৰাজৈতিকভাৱে জাতিৰ জনক বুলিবও পাৰি) হিচাপে শ্ৰীমন্ত শংকৰদেৱ বিশ্ব স্বীকৃত৷

🔸 ভাৰতীয় জাতিৰ পিতা মহাত্মা গান্ধীয়ে শ্ৰীমন্ত শংকৰদেৱ সন্দৰ্ভত কৈছে – A great Vaisnava revival under Sankardev in the sixteenth century has made Assamese people kindly, tolerant and humane. There is no sign anywhere of that form of untouchability which is to be found in South India. Assam, indeed, is fortunate for Sankardev has five centuries back, given the Assamese people an ideal, which is also the ideal of Ram-Rajya.
অৰ্থাৎ, ষোড়শ শতিকাত শংকৰদেৱৰ অধীনত হোৱা এক মহান বৈষ্ণৱ পুনৰুজ্জীৱনে অসমীয়া মানুহক দয়ালু, সহনশীল আৰু মানৱীয় কৰি তুলিছে। দক্ষিণ ভাৰতত যি ধৰণৰ অস্পৃশ্যতা বিদ্যমান, তাৰ উদাহৰণ আন ক’তো পাবলৈ নাই। শংকৰদেৱে পাঁচ শতিকা পূৰ্বে দি যোৱা আদৰ্শৰ বাবে – যি ৰাম ৰাজ্যৰ এক নিদর্শন স্বৰূপ – অসম সঁচাকৈয়ে সৌভাগ্যবান৷

🔸কিন্তু বৰ পৰিতাপৰ কথা যে সেই গৰাকী মহাপুৰুষ শ্ৰীমন্ত শংকৰদেৱৰ আদর্শক গৌণ কৰি, তাক পৰিক্ষ্যভাৱে হত্যা কৰি, অসমীয়া জাতীয় চেতনাটোকে নিঃশেষ কৰি এক অতি পৰিকল্পিত ষড়যন্ত্ৰ বৰ্তমানৰ বিজেপি নেতৃত্বাধীন চৰকাৰখনে চলাই গৈ আছে – যিটো অসমৰ বহু সাধাৰণ মানুহে এতিয়াও ধৰিব পৰা নাই৷

🔸 কেনেকৈ?

সকলোৱে দেখিছে যে বিজেপি ক্ষমতালৈ অহাৰ পিছত আজিকালি শ্ৰীমন্ত শংকৰদেৱৰ দর্শন-আদর্শ বা বৈষ্ণব পন্থাক লৈ কিছুমান মানুহে প্ৰায়ে কিছুমান আপত্তিজনক বক্তব্য প্ৰদান কৰা বা তুচ্ছ-তাচ্ছ্যিল্য কৰিবলৈ লৈছে৷ আগতে অসমত এনে পৰিৱেশ দেখিবলৈ পোৱা নগৈছিল৷

উদাহৰণ: ২০২২ চনৰ অক্টোবৰ মাহত মাজুলীৰ শ্ৰী জনার্দন দেৱগোস্বামীয়ে মহাপুৰুষজনা ‘গুৰু নহয়, এগৰাকী খেলুৱৈহে আছিল’ বুলি মন্তব্য কৰি বিতৰ্কৰ সৃষ্টি কৰিছিল৷ তাৰ আগে-পিছে আন বহু ব্যক্তিয়ে এনে ধৰণৰ বক্তব্য প্ৰদান কৰা আমি দেখিছো৷

আৰ এছ এছৰ এগৰাকী নেতাই অসমলৈ আহি মহাপুৰুষজনাক ‘বাবা চংকৰদেও’ বুলি সম্বোধন কৰিছিল।

🔸 শ্ৰীমন্ত শংকৰদেৱক লৈ এনে ধৰণৰ বিতৰ্কৰ সূত্ৰপাত কৰিছিল অসমৰ বর্তমানৰ মুখ্যমন্ত্ৰী (তেতিয়াৰ বিত্তমন্ত্ৰী) ডঃ হিমন্ত বিশ্ব শৰ্মা ডাঙৰীয়াই, ২০১৮ চনৰ ৩১ মে’ তাৰিখে, মহাপুৰুষ মাধবদেৱৰ ৫৩০ সংখ্যক জন্মজয়ন্তী উপলক্ষে শ্ৰীমন্ত শংকৰদেৱ সংঘই নাৰায়নপুৰত আয়োজন কৰা অনুষ্ঠানত৷

তাত ডঃ শৰ্মাই শ্ৰীমন্ত শংকৰদেৱ আৰু মাধবদেৱে অসমত হিন্দুত্ববাদৰ প্ৰচাৰ-প্ৰসাৰৰ কাম কৰিছিল বুলি মন্তব্য কৰিছিল – যাক কেন্দ্ৰ কৰি চৌদিশে বিতৰ্ক হৈছিল৷ শ্ৰীমন্ত শংকৰদেৱ সংঘকে ধৰি সকলো জাতীয় দল-সংগঠনে তাৰ বিৰোধিতা কৰিছিল৷
সকলোৱে কৈছিল যে ডঃ হিমন্ত বিশ্ব শৰ্মাই আৰ এছ এছৰ মন্ত্ৰণা মর্মে, শ্ৰীমন্ত শংকৰদেৱৰ আদর্শৰ ঠাইত বিজেপি-আৰ এছ এছৰ বৰ্ণবাদী দর্শনক প্ৰতিষ্ঠা কৰোৱাৰ উদ্দেশ্যে অতি পৰিকল্পিত কৌশল হিচাপে, উক্ত বক্তব্য প্ৰদান কৰিছিল – যাতে বিষয়টোক কেন্দ্ৰ কৰি বিতৰ্কৰ সূত্ৰপাত ঘটে আৰু অসমত শ্ৰীমন্ত শংকৰদেৱৰ দর্শনৰ ওপৰত প্ৰশ্ন উত্থাপন কৰাৰ এক পৰিৱেশৰ সূচনা হয়৷
তেওঁলোকৰ পৰিকল্পনাই কাম দিলে৷ সেই বিতৰ্ক চৌদিশে চলিল আৰু আজি তাৰ ফল আমি দেখিছো – যাৰ যেতিয়া যেতিয়া ইচ্ছা শ্ৰীমন্ত শংকৰদেৱ আৰু বৈষ্ণৱ আদর্শক প্ৰশ্ন কৰিব পৰা হ’ল৷

🔸 কিন্তু হিমন্ত বিশ্ব শর্মাই ‘শ্ৰীমন্ত শংকৰদেৱ-শ্ৰী শ্ৰী মাধবদেৱে হিন্দুত্ববাদৰ প্ৰসাৰ-প্ৰচাৰৰ কাম কৰা’ বুলি কিয় কৈছিল? এই কথাটো বুজিবলগীয়া৷
কাৰণ ডঃ শৰ্মা নিজে হিন্দুত্ববাদৰ পোষক৷ তেওঁৰ উদ্দেশ্য হ’ল, হিন্দুত্ববাদৰ প্ৰৱক্তা আৰ এছ এছৰ পৰিকল্পনাক বাস্তবায়ন কৰা৷

🔸 কিন্ত হিমন্ত বিশ্ব শৰ্মা বা আৰ এছ এছ-বিজেপিৰ হিন্দুত্ববাদটো কেনেকুৱা হিন্দুত্ববাদ? তেওঁলোকৰ হিন্দুত্ববাদ বৰ্ণবাদী, অস্পৃশ্যবাদী দর্শনৰ ওপৰত প্ৰতিষ্ঠিত৷

উদাহৰণ: যোৱা ২৬ ডিচেম্বৰ, ২০২০ৰ দিনা বৰ্তমানৰ মুখ্যমন্ত্ৰী ডঃ শৰ্মাই তেওঁৰ অফিছিয়েল ফেচবুক আৰু এক্স (টুইটাৰ) হেণ্ডলৰ পৰা এটা বাণী প্ৰচৰ কৰিছে য’ত কোৱা হৈছে যে ব্ৰাহ্মণ আৰু ক্ষত্ৰিয়সকলৰ সেৱা-সৎকাৰ কৰাটোহে শূদ্ৰসকলৰ ধৰ্ম৷

🔸 অসমত বিজেপিৰ চৰকাৰ প্ৰতিষ্ঠা হোৱাৰ পিছৰে পৰা কেনেকৈ অসমীয়া ভাষা-সংস্কৃতিক দুৰ্বল কৰাৰ কৌশলগত প্ৰয়াস চলাই থকা হৈছে, সেয়া সকলোৰে চকুৰ আগত৷

🔸 চৰকাৰী খণ্ডৰ অসমীয়া মাধ্যমৰ ৮ হাজাৰতকৈ অধিক বিদ্যালয় বন্ধ কৰি দিয়া আৰু ৰাজ্যজুৰি ইংৰাজী মাধ্যমৰ বিদ্যালয় স্থাপন তথা বিস্তাৰত উদগণি যোগোৱাটো তাৰ অন্যতম উদাহৰণ৷

🔸 অসম লোকসেৱা আয়োগৰ পৰীক্ষাত বাধ্যতামূলক হৈ থকা অসমীয়া বিষয় প্ৰত্যাহাৰ কৰে ৷

🔸 আনহাতে চৰকাৰী বিদ্যালয়ৰ তৃতীয় শ্ৰেণীৰে পৰাই বিজ্ঞান আৰু গণিত পাঠ্যপুথি ইংৰাজী ভাষাত প্ৰৱৰ্তন কৰাটো ইংৰাজী মাধ্যমক উৎসাহিত কৰাৰ লক্ষ্যৰে যে কৰা হৈছে সেয়া স্পষ্ট৷ এনে অসংখ্য উদাহৰণ অসমৰ প্ৰায় সকলো ক্ষেত্ৰ তথা খণ্ডত বিদ্যমান৷

এয়া মহাপুৰুষ শ্ৰীমন্ত শংকৰদেৱৰ মর্যাদা হানিৰ নিকৃষ্ট ষড়যন্ত্ৰৰ বাহিৰে আন একো নহয়৷