Cancer Screening Program : ৰাজ্য়ৰ ৯ জিলাত আৰম্ভ হ’ল বিশেষ কৰ্কট ৰোগৰ পৰীক্ষণ কাৰ্যসূচী…

‘বিশ্ব কৰ্কট দিৱস’ দিনটোত ৰাজ্য়ত আৰম্ভ হ’ল সম্ভাৱ্য কৰ্কট ৰোগীক পৰীক্ষা কৰাৰ বাবে বিশেষ কাৰ্যসূচী । অসম চৰকাৰ আৰু অসম কেন্সাৰ কেয়াৰ ফাউণ্ডেশ্যন (এচিচিএফ)ৰ সহযোগত এটা টেলিকম প্ৰতিষ্ঠানে আৰম্ভ কৰিছে এই কাৰ্যসূচী। কোম্পানীটোৱে এক বিবৃতিত কয় যে, ইণ্ডাছ টাৱাৰ্ছৰ ফ্লেগশ্বিপ চি এছ আৰ পদক্ষেপৰ অধীনত মঙলবাৰৰ পৰা এই কাৰ্যসূচী আৰম্ভ কৰা হৈছে । এই কাৰ্যসূচীৰ উদ্দেশ্য হৈছে কৰ্কট ৰোগৰ বিৰুদ্ধে যুঁজ দিয়া আৰু অসমবাসীৰ জীৱনৰ মান উন্নত কৰা।

বিবৃতিত কোৱা হৈছে যে, অসমৰ যোৰহাট, বঙাইগাঁও, লখিমপুৰ, চৰাইদেউ, ধেমাজি, হাইলাকান্দি, ওদালগুৰি, শিৱসাগৰ আৰু বাক্সা জিলাত এই কাৰ্যসূচী গ্ৰহণ কৰা হ’ব। কোম্পানীটোৱে কয় যে, এই নতুন কাৰ্যসূচীটো কৰ্কট ৰোগৰ সৈতে মুখামুখিকৈ ​​মোকাবিলা কৰিব পৰাকৈ ডিজাইন কৰা হৈছে । এই মেগা কেন্সাৰ স্ক্ৰীনিং কাৰ্যসূচীত কৰ্কট ৰোগ আগতীয়াকৈ ধৰা পেলোৱা আৰু ৰোগীসকলৰ বাবে নিৰন্তৰ সমৰ্থনৰ ওপৰত গুৰুত্ব দিয়া হৈছে।

ইয়াত লগতে কোৱা হৈছে যে, এই পদক্ষেপত আউটৰিচ, কমিউনিটি স্ক্ৰীনিং, ফ্ৰণ্টলাইন স্বাস্থ্যকৰ্মীসকলৰ প্ৰশিক্ষণ, সজাগতা আৰু আচৰণ পৰিৱৰ্তন অভিযান, ৰোগীৰ নেভিগেটৰ আৰু যত্নৰ ধাৰাবাহিকতা জড়িত হৈ আছে। এই কাৰ্যসূচীৰ অংশ হিচাপে দন্ত চিকিৎসকৰ দ্বাৰা মুখৰ কৰ্কট ৰোগৰ শাৰীৰিক পৰীক্ষাৰ লগতে ঘৰে ঘৰে পৰীক্ষাৰ আয়োজন কৰা হ’ব। ইয়াৰ উপৰিও নাৰ্ছসকলে ছাৰ্ভাইকেল আৰু স্তন কেন্সাৰৰ শাৰীৰিক পৰীক্ষা আৰু সজাগতা সভা আদিৰ সুবিধা প্ৰদান কৰিব।

ইণ্ডিয়ান কাউন্সিল অৱ মেডিকেল ৰিচাৰ্চৰ ২০২১ চনৰ প্ৰতিবেদনৰ উদ্ধৃতি দি ইণ্ডাছ টাৱাৰ্ছে কয় যে, ৰাষ্ট্ৰীয় পৰ্যায়ত কৰ্কট ৰোগীৰ হাৰ প্ৰতি এক লাখ লোকৰ বিপৰীতে ৯৭ জন, আনহাতে অসমত প্ৰতি লাখ লোকৰ বিপৰীতে ১১৪ জন। কোম্পানীটোৱে আঙুলিয়াই দিয়ে যে, ” বিগত সময়ছোৱাত অসমত কৰ্কট ৰোগীৰ সংখ্যা যথেষ্ট বৃদ্ধি পাইছে । ইয়াৰ বাবে জৰুৰী আৰু স্থায়ী হস্তক্ষেপৰ প্ৰয়োজন হৈছে। ৭০ শতাংশ কৰ্কট ৰোগী দ্বিতীয় বা তৃতীয় পৰ্যায়ত ধৰা পৰে আৰু মৃত্যুৰ হাৰ অধিক।”