অসম বিধানসভাত গৃহীত বিধেয়ক, ধৰ্মান্তৰকৰণৰ কাম-কাজত জড়িত হ’ব নোৱাৰিব ব্যক্তিগত বিশ্ববিদ্যালয়…
সোমবাৰে বিধেয়ক গৃহীত কৰি ব্যক্তিগত বিশ্ববিদ্যালয়সমূহক ছাত্ৰ-ছাত্ৰী, অধ্যাপক আৰু অন্যান্য কৰ্মচাৰীৰ ধৰ্মান্তৰকৰণ সম্পৰ্কীয় কাম-কাজত জড়িত হোৱাত বাধা আৰোপ কৰে। তিনিখন নতুন বিশ্ববিদ্যালয় স্থাপনৰ বাবে বিধেয়ক আৰু বৰ্তমানৰ ৯খন ভাৰ্চিটিৰ সৈতে জড়িত আইন সংশোধনী বিধেয়ক গৃহীত কৰে সদনে।
অসম বিধানসভা
অসম বিধানসভাই সোমবাৰে বিধেয়ক গৃহীত কৰি ব্যক্তিগত বিশ্ববিদ্যালয়সমূহক ছাত্ৰ-ছাত্ৰী, অধ্যাপক আৰু অন্যান্য কৰ্মচাৰীৰ ধৰ্মান্তৰকৰণ সম্পৰ্কীয় কাম-কাজত জড়িত হোৱাত বাধা আৰোপ কৰে। তিনিখন নতুন বিশ্ববিদ্যালয় স্থাপনৰ বাবে বিধেয়ক আৰু বৰ্তমানৰ ৯খন ভাৰ্চিটিৰ সৈতে জড়িত আইন সংশোধনী বিধেয়ক গৃহীত কৰে সদনে।
শিক্ষামন্ত্ৰী ৰাণোজ পেগুৱে বিধেয়কসমূহ সদনত বিবেচনা আৰু গৃহীত কৰাৰ বাবে উত্থাপন কৰে । ইয়াৰ লগতে অসম ব্যক্তিগত বিশ্ববিদ্যালয় আইন, ২০০৭ৰ সংশোধনীৰ বাবে আন এখন বিধেয়ক উত্থাপন কৰে শিক্ষামন্ত্ৰীগৰাকীয়ে । অসম ব্যক্তিগত বিশ্ববিদ্যালয় (সংশোধনী) বিধেয়ক, ২০২৫ত ছাত্ৰ-ছাত্ৰী, অধ্যাপক আৰু অন্যান্য কৰ্মচাৰীৰ ধৰ্মান্তৰকৰণ সম্পৰ্কীয় যিকোনো কামত ভাৰ্চিটি সমূহৰ ওপৰত নিষেধাজ্ঞা আৰোপ কৰাৰ প্ৰস্তাৱ দিয়া হৈছিল।
বিশ্ববিদ্যালয়খনে ধৰ্মনিৰপেক্ষ চৰিত্ৰ বজাই ৰাখিব বুলি সংশোধনী বিধেয়কখনত উল্লেখ কৰা হৈছে। ইয়াৰ উপৰিও বিশ্ববিদ্যালয়খনে ২০২৫ চনৰ ১ এপ্ৰিলৰ পৰা কাৰ্যকৰী হোৱাকৈ কৃষি, পশু চিকিৎসা, দুগ্ধ আৰু অন্যান্য সংশ্লিষ্ট বিষয়ৰ সৈতে জড়িত কোনো নতুন কাৰিকৰী, চিকিৎসা, পেৰা-মেডিকেল, নাৰ্চিং আৰু অন্যান্য কাৰিকৰী পাঠ্যক্ৰম মুকলি নকৰিব বুলিও প্ৰস্তাৱ আগবঢ়োৱা হৈছিল ।
ইয়াৰ উপৰিও বিশ্ববিদ্যালয়খন প্ৰতিষ্ঠাৰ সময়ত জাৰি কৰা চৰ্তসমূহ মানি চলিছে নে নাই সেইটো পৰীক্ষা কৰিবলৈ তিনি বছৰৰ মূৰে মূৰে এবাৰ ৰাজ্য চৰকাৰে পৰিদৰ্শন কৰাৰ ব্যৱস্থাৰ প্ৰস্তাৱ আগবঢ়োৱা হৈছিল । সংশোধিত আইনখনত কোৱা হৈছে যে, চৰ্তসমূহ মানি চলাৰ পৰা যিকোনো বিচ্যুতিৰ ফলত বিশ্ববিদ্যালয়খন স্বীকৃতি ভংগ হ’ব পাৰে।
নতুন শিক্ষা নীতি অনুসৰি উচ্চ শিক্ষা আৰু গৱেষণাৰ অধিক শিক্ষণ আৰু মূল্যায়নৰ বাবে ব্যক্তিগত ভাৰ্চিটি স্থাপন কৰিব বিচৰা এডটেক স্কিলছ ইউনিভাৰ্চিটি বিল, ২০২৫ গৃহীত কৰা হয়। বিশ্ব শিক্ষা অভিযানৰ পৃষ্ঠপোষকতাত এই প্ৰস্তাৱিত বিশ্ববিদ্যালয় তিনিচুকীয়াত স্থাপন কৰা হ’ব বুলি পেগুৱে জানিবলৈ দিয়ে।
উচ্চ শিক্ষা, উন্নত শিক্ষাৰ প্ৰসাৰ আৰু গৱেষণাক আগবঢ়াই নিয়াৰ লক্ষ্যৰে স্বামী বিবেকানন্দ বিশ্ববিদ্যালয় বিধেয়ক, ২০২৫ আৰু মা কামাখ্যা বিশ্ববিদ্যালয় বিধেয়ক, ২০২৫ বিধানসভাই গৃহীত কৰে। ছ’চিয়েল একচন এণ্ড ৰিচাৰ্চ ফাউণ্ডেশ্যনৰ পৃষ্ঠপোষকতাত প্ৰস্তাৱিত স্বামী বিবেকানন্দ বিশ্ববিদ্যালয়ৰ স্থায়ী কেম্পাছ চিৰাং জিলাৰ ওদলাগুৰিত স্থাপন কৰা হ’ব, আনহাতে অপাৰেচনেল কেম্পাছ কোকৰাঝাৰত স্থাপন হ’ব।
দৰং জিলাৰ ছিপাঝাৰত স্থাপন কৰা হ’ব গৱেষণা এডুভাৰ্চিটি ফাউণ্ডেশ্যনৰ পৃষ্ঠপোষকতাত প্ৰস্তাৱিত মা কামাখ্যা বিশ্ববিদ্যালয়। শ্ৰীমন্ত শংকৰদেৱ স্বাস্থ্য বিজ্ঞান বিশ্ববিদ্যালয় (সংশোধনী) বিধেয়ক ২০২৫ পেগুৱে চিকিৎসা শিক্ষা আৰু গৱেষণা বিভাগৰ দায়িত্বত থকা মুখ্যমন্ত্ৰী হিমন্ত বিশ্ব শৰ্মাৰ হৈ উত্থাপন কৰে।
সদনে আন ৮ খন ভাৰ্চিটিৰউপাচাৰ্যক ৰাজ্য চৰকাৰে নিযুক্তি দিয়াৰ প্ৰস্তাৱ দি আন ৮খন বিধেয়ক গৃহীত কৰে । আনহাতে উপদেষ্টা ব’ৰ্ডৰ পৰামৰ্শ অনুসৰি পৰৱৰ্তী ভিচিসকলক অধ্যক্ষই নিযুক্তি দিব।