Extortion : আলফাৰ নামত ধন দাবী, তিনিচুকীয়াত দুজনক আটক…

আলফাৰ নামত ধন দাবী অভিযোগত তিনিচুকীয়াত দুজন লোকক আটক কৰাৰ খবৰ লাভ কৰা গৈছে । সূত্ৰ খবৰ অনুসৰি,এই লোক দুজন জিলাখনৰ ফি’লবাৰী আৰু ডুমডুমা অঞ্চলৰ বহু ব্যৱসায়ীক ধন দাবীৰে জড়িত আছিল বুলি জানিব পৰা গৈছে । জানিব পৰা মতে, অক্টোবৰ মাহত ফি’লবাৰী আৰু ডুমডুমা অঞ্চলত ধন দাবীৰ অভিযোগ উত্থাপন হৈছিল । এই অভিযোগৰ পাছতে তিনিচুকীয়া আৰক্ষীয়ে তদন্ত আৰম্ভ কৰিছিল ।

এই তদন্তৰ অংশ হিচাপে তিনিচুকীয়াৰ অতিৰিক্ত আৰক্ষী অধীক্ষক মৃন্ময় দাসৰ নেতৃত্বত আৰক্ষী আৰু সেনাৰ সহযোগত যোৱা নিশা এক অভিযান চলোৱা হয় । শেহতীয়াকৈ চলোৱা এই অভিযানত লোক দুজনক আটক কৰিছে তিনিচুকীয়া আৰক্ষীয়ে । জানিব পৰা মতে, কিছুদিনৰ পৰা উত্থাপিত ধন দাবীৰ অভিযোগৰ তদন্ত অব্য়াহত ৰাখিছিল তিনিচুকীয়া আৰক্ষীয়ে ।

আটক কৰা লোক দুজনৰ নাম হৈছে অপূৰ্ব মৰাণ উৰফে মিদু অসম(৩০ বছৰ) আৰু অভিজিৎ মৰাণ(৩৩ বছৰ) । ধন দাবীৰ অভিযোগত আটক কৰা এই দুয়োজন তিনিচুকীয়া জিলাৰ ফি’লবাৰী থানা অন্তৰ্গত গুটিবাৰীত বুলি জানিব পৰা গৈছে । ধৃত দুই যুৱকে ইতিমধ্যে আৰক্ষীৰ ওচৰত আলফা(স্বা)ৰ নামত ব্যৱসায়ী, হিন্দীভাষী লোকৰ পৰা ধন দাবী কৰাৰ কথা স্বীকাৰ কৰিছে বুলি সূত্ৰই জানিবলৈ দিছে ।

উল্লেখ্য যে, আটক কৰা দুই যুৱকৰ পৰা আৰক্ষীয়ে বহু আপত্তিজনত নথি-পত্ৰ জব্দ কৰিছে । মনকৰিবলগীয়া যে, আলফা(স্বা)নামত ধন দাবী গোচৰত আৰক্ষীৰ জালত পৰা অপূৰ্ব মৰাণ এগৰাকী আত্মসমৰ্পণকাৰী আলফা বুলি জানিব পৰা গৈছে ।

ইফালে, ফি’লবাৰী আৰক্ষীৰ থানাত দুয়োজনৰ বিৰুদ্ধে ৩৪/২০২৪ নম্বৰত ইউ/এছ ৬১(২)/ ৩১৯(২)/৩০৮(৪) বিএনএছ ধাৰাত গোচৰ ৰুজু কৰা হৈছে বুলি আৰক্ষীৰ সূত্ৰই জানিবলৈ দিছে । যোৱা এমাহত এই দুই যুৱকে দুজন ব্যৱসায়ীক ধন দাবী কৰাৰ কথা স্বীকাৰ কৰিছে। অধিক তথ্যৰ বাবে আৰক্ষীয়ে জেৰা অব্য়াহত ৰাখিছে বুলি জানিব পৰা গৈছে ।