ভাল খবৰ! অসমৰ ‘শিক্ষা সেতু’ এপে লাভ কৰিছে প্রধানমন্ত্রীৰ ৰাজহুৱা প্ৰশাসন উৎকর্ষ বঁটা

অসমবাসীৰ বাবে আন এক সু-খবৰ। অসমৰ ‘শিক্ষা সেতু’ পদক্ষেপে লাভ কৰিছে প্ৰধানমন্ত্ৰীৰ ৰাজহুৱা প্ৰশাসন উৎকৃষ্টতাৰ বঁটা। অসমৰ বিদ্যালয় শিক্ষা ক্ষেত্ৰত প্ৰৱৰ্তন কৰা ‘শিক্ষা সেতু’ এপৰ সফল ৰূপায়ণৰ বাবে ৰাজহুৱা প্ৰশাসন-২০২৪ৰ প্ৰধানমন্ত্ৰীৰ উৎকৃষ্ট বঁটা লাভ কৰিছে অসম চৰকাৰে৷ ২১ এপ্ৰিলত অসামৰিক সেৱা দিৱস উদযাপনৰ সময়ত প্ৰধানমন্ত্ৰী নৰেন্দ্ৰ মোদীয়ে প্ৰদান কৰে এই বঁটা ।

ইয়াৰ পাছতে শিক্ষা সংস্কাৰৰ প্ৰতি অসমৰ দায়বদ্ধতা প্ৰদৰ্শন কৰা এই স্বীকৃতিৰ বাবে মুখ্যমন্ত্ৰী হিমন্ত বিশ্ব শৰ্মাই ৰাজ্যৰ দলটোক অভিনন্দন জনায়। শিক্ষা সেতু এপ্লিকেচন হ’ল বিদ্যালয়, ছাত্ৰ-ছাত্ৰী, আৰু কৰ্মচাৰীৰ সম্পূৰ্ণ তথ্য প্ৰদান কৰা এক বিস্তৃত ডিজিটেল প্লেটফৰ্ম। যিয়ে দৈনিক প্ৰশাসনিক কাৰ্য্যকলাপৰ বাবে কেন্দ্ৰীভূত সম্পদ হিচাপে কাম কৰে। এই সন্দৰ্ভত সামাজিক মাধ্যমত এক পোষ্ট শ্বেয়াৰ কৰি মুখ্যমন্ত্ৰীয়ে লিখিছে, “অসমলৈ ৰাষ্ট্ৰীয় স্বীকৃতি।”

মুখ্যমন্ত্ৰীয়ে লগতে লিখিছে, শিক্ষা সেতুক আজি মাননীয় প্ৰধানমন্ত্ৰী শ্ৰীনৰেন্দ্র মোদী ডাঙৰীয়াই প্রধানমন্ত্রীৰ ৰাজহুৱা প্ৰশাসন উৎকর্ষ বঁটা প্ৰদান কৰে। শিক্ষা সেতুৰ একক সমাধানে শিক্ষাৰ্থী আৰু শিক্ষকৰ উপস্থিতিক সুশৃংখল কৰি তুলিছে আৰু অসমৰ বিদ্যালয়সমূহত সমতা প্রদান কৰিছে। এই কৃতিত্ব অৰ্জন কৰাৰ বাবে সমগ্র শিক্ষা অভিযানৰ গোটেই দলটোলৈ অভিনন্দন জনাইছোঁ।”

ইফালে, ২০২৪-২৫ বিত্তীয় বৰ্ষত ৩৮৫০ কোটি টকাৰ চাহ বিক্ৰী কৰি  অভূতপূৰ্ব সফলতা অৰ্জন কৰিছে গুৱাহাটী চাহ নিলাম কেন্দ্ৰই। এই সন্দৰ্ভত গুৱাহাটী চাহ নিলাম কেন্দ্ৰ ক্ৰেতা সন্থাৰ সম্পাদকে কয়,  “২০২৩-২৪ বিত্তীয় বৰ্ষত জিটিএচিয়ে ৩০৪৮ কোটি টকাৰ ১৬৬.৩৪ কেজি চাহ বিক্ৰী কৰিছিল, আৰু গড় মূল্য আছিল ১৮৩.২১ টকা। অৱশ্যে ২০২৪-২৫ বিত্তীয় বৰ্ষত জিটিএচিয়ে ৩৮৫০ কোটি টকাৰ চাহ বিক্ৰী কৰিছিল, যিটো পূৰ্বৰ তুলনাত ৮০০ কোটি টকা বেছি।”