Attacked on Rokibul Hussain: মুখত ক’লা কাপোৰ পিন্ধি সাংসদ ৰকিবুল হুছেইনৰ ওপৰত দুৰ্বৃত্তৰ আক্ৰমণ…

ৰকিবুল হুছেইনৰ ওপৰত দুৰ্বৃত্তৰ আক্ৰমণ!

নিজ জিলাতেই আক্ৰমণ বলি হ’ল ধুবুৰীৰ সাংসদ ৰকিবুল হুছেইন । ৰাজপথতে ৰকিবুলৰ ওপৰত আক্ৰমণ চলাই দুৰ্বৃত্তই । সাংসদগৰাকীৰ দেহৰক্ষীকো প্ৰহাৰ দুৰ্বৃত্তৰ । ক্ৰিকেট বেটেৰে ৰাজপথৰ মাজতে আক্ৰমণ কৰা হৈছে ধুবুৰীৰ সাংসদ তথা চামগুৰিৰ প্ৰাক্তন বিধায়কগৰাকীক । দুৰ্বৃত্তই গুৰুলা গুৰুলকৈ প্ৰহাৰ কৰে সাংসদগৰাকীক । সভালৈ আহি আক্ৰমণৰ বলি হ’ল কংগ্ৰেছ সাংসদগৰাকী । পৰিস্থিতি নিয়ন্ত্ৰণৰ বাবে শূন্যলৈ গুলীচালনা কৰে নিৰাপত্তাৰক্ষীয়ে ।

জানিব পৰা মতে ৰূপহীৰ গুণাবাৰীত এখন সভালৈ গৈ আছিল সাংসদ ৰকিবুল হুছেইন । সাংসদগৰাকীৰ লগত আছিল তেওঁৰ পুত্ৰ তানজিল হুছেইন । পুত্ৰৰ উপৰিও আক্ৰমণ সংঘটিত হোৱাৰ সময়ত সাংসদগৰাকীৰ লগত আছিল ৰূপহীহাটৰ কংগ্ৰেছী বিধায়ক নুৰুল হুদা । স্কুটীত উঠি সভালৈ গৈ আছিল সাংসদগৰাকী । সেইসময়তে নগাঁৱৰ ৰূপহীহাটত একাংশই ক’লা পতাকা দেখুৱাই সাংসদগৰাকীক ।  তাৰ মাজতে কেইবাজনো দুৰ্বৃত্তই সাংসদগৰাকীক আক্ৰমণৰ লক্ষ্য কৰি লয় । গ’ বেক ধ্বনিৰে উত্তাল কৰি তোলে পৰিস্থিতি ।  কাঢ়ি লোৱাৰ চেষ্টা কৰা হয় দেহৰক্ষীৰ বন্দুক ।

প্ৰাপ্ত খবৰ অনুসৰি মুখত ক’লা কাপোৰ বান্ধি আহিছিল দুৰ্বৃত্তৰ দলটো । ৰকিবুল হুছেইনৰ লগতে তেওঁৰ দেহৰক্ষীকো আক্ৰমণ কৰে দুৰ্বৃত্তই । আক্ৰমণকাৰীৰ হাতৰ পৰা পলাবলৈ লওঁতে স্কুটীৰ পৰা ৰাজপথত বাগৰি পৰে ৰকিবুল হুছেইন । গুণাবাৰীলৈ গৈ থকা অৱস্থাত সাংসদগৰাকীৰ ওপৰত চলোৱা হয় এই আক্ৰমণ । তাৰ পাছতে বাধ্য হৈ শূন্যলৈ গুলীচালনা কৰে সাংসদগৰাকীৰ দেহৰক্ষীয়ে । ঘটনাটোত আহত হৈছে সাংসদগৰাকীৰ লগতে তেওঁৰ দেহৰক্ষীগৰাকী । ক’বলৈ গ’লে কথমপি জীৱন ৰক্ষা পৰিল ৰকিবুলৰ ।

অৱশ্যে বৰ্তমান সময়ত নিয়ন্ত্ৰণাধীন অৱস্থাত আছে পৰিস্থিতি । কিন্তু সমগ্ৰ ঘটনাটোক লৈ চাঞ্চল্যই বিৰাজ কৰিছে অঞ্চলটোত । সাংসদগৰাকীৰ ওপৰত হোৱা এই আক্ৰমণক তীব্ৰ গৰিহনা দিছে একাংশ স্থানীয় লোকে । সামাজিক মাধ্যমযোগে প্ৰতিক্ৰিয়া প্ৰকাশ কৰিছে বিভিন্নজনে ।  ইফালে বিজেপি কৰ্মীৰ বিৰুদ্ধে সাংসদগৰাকীক প্ৰহাৰ কৰাৰ অভিযোগ উত্থাপন কৰা হৈছে । এই আক্ৰমণ কোনে সংঘটিত কৰিছে সেই সন্দৰ্ভত এতিয়ালৈকে কোনো তথ্য লাভ কৰা নাই ।

সাংসদ ৰকিবুল হুছেইনৰ ওপৰত হোৱা আক্ৰমণৰ ঘটনা এয়াই প্ৰথম নহয় । ইয়াৰ পূৰ্বে উপ-নিৰ্বাচনৰ ভোটগ্ৰহণৰ দিনাও চামগুৰিত ৰকিবুল হুছেইনৰ কনভয়ত আক্ৰমণ কৰিছিল দুৰ্বৃত্তই । তেওঁ বাসগৃহটো সংঘটিত হৈছিল আক্ৰমণ ।  ৰকিবুলৰ গাড়ীত আক্ৰমণ কৰোঁতে ভাঙিছিল সাংবাদিকৰো বাহন । ৰকিবুল হুছেইনৰ বিৰুদ্ধে শ্ল’গান দিছিল একাংশ লোকে ।