পুনৰ উত্তৰ-পূৰ্বৰ বিদ্ৰোহীয়ে আশ্ৰয় ল’ব পাৰে বাংলাদেশত ! চুবুৰীয়া দেশখনৰ ৰাজনৈতি অস্থিৰতাক লৈ উদ্বেগ প্ৰকাশ মুখ্যমন্ত্ৰী শৰ্মাৰ

বাংলাদেশৰ প্ৰধানমন্ত্ৰী শ্বেখ হাছিনা পদত্যাগ আৰু চুবুৰীয়া দেশখনৰ বৰ্তমানৰ ৰাজনৈতিক অস্থিৰতাকলৈ উদ্বেগ প্ৰকাশ কৰিছে অসমৰ মুখ্যমন্ত্ৰী হিমন্ত বিশ্ব শৰ্মাই । মুখ্যমন্ত্ৰী শৰ্মাই এই কথাও উল্লেখ কৰে যে, বাংলাদেশৰ বৰ্তমানৰ পৰিস্থিতিৰ পাছত উত্তৰ-পূৰ্বৰ বিদ্ৰোহী সংগঠনে দেশখনত আশ্ৰয় ল’বৰ বাবে সুবিধা পোৱাৰ সম্ভাৱনা আছে । তদুপৰি ভাৰত বিৰোধী সন্ত্ৰাসবাদী সংগঠনক আশ্ৰয় নিদিয়াৰ ক্ষেত্ৰত শ্বেখ হাছিনাই গুৰুত্বপূৰ্ণ ভূমিকা গ্ৰহণ কৰাৰ ওপৰতো আলোকপাত কৰে মুখ্যমন্ত্ৰী শৰ্মাই ।

মুখ্যমন্ত্ৰী শৰ্মাই কয়,” বৰ্তমান বাংলাদেশৰ পৰিস্থিতি এতি চিন্তনীয় । বাংলাদেশৰ পৰা উত্তৰ-পূৰ্বৰ বিদ্ৰোহী সংগঠনক নিৰ্মূল কৰাৰ ক্ষেত্ৰত শ্বেখ হাছিনা চৰকাৰে গুৰুত্বপূৰ্ণ ভূমিকা গ্ৰহণ কৰিছিল ।” গতিকে অসমৰ মুখ্যমন্ত্ৰী গৰাকীয়ে আশংকা প্ৰকাশ কৰি কয় যে, হাছিনাৰ পদত্যাগ আৰু তেওঁৰ চৰকাৰ পতনৰ পাছত বাংলাদেশত পুনৰ উগ্ৰপন্থীয়ে আশ্ৰয় ল’ব পাৰে । ইয়াৰ লগতে বাংলাদেশত আশ্ৰয় গ্ৰহণ কৰি এই উগ্ৰপন্থী সংগঠন সমূহে পুনৰবাৰ আঞ্চলিক নিৰাপত্তাৰ ক্ষেত্ৰত ভাবুকি সৃষ্টি কৰিব পাৰে বুলি আশংকা ব্যক্ত কৰিছে মুখ্যমন্ত্ৰী শৰ্মাই ।

बांग्लादेश की पूर्ववर्ती सरकार के सहयोग से पूर्वोत्तर भारत में उग्रवादी गतिविधियों पर रोक लगाने में हम सफल रहे हैं। इस बात में कोई दो राय नहीं है।

मुझे पूर्ण विश्वास है कि बांग्लादेश की नई सरकार भी इस सहयोग को बनाये रखेगी। pic.twitter.com/PuWZmpJMRn

— Himanta Biswa Sarma (@himantabiswa) August 7, 2024

ইয়াৰ লগতে তেওঁ কয়,”শ্বেখ হাছিনা চৰকাৰে বাংলাদেশত আশ্ৰয় লোৱা উত্তৰ-পূৰ্বৰ সকলো সন্ত্ৰাসবাদী সংগঠনক আঁতৰাই দিছিল । তেওঁৰ পদত্যাগৰ পাছত দেশখনত গঠন হ’বলগীয়া নতুন চৰকাৰে যাতে পুনৰবাৰ সেই সন্ত্ৰাসবাদী সংগঠন সমূহক আশ্ৰয় নিদিয়ে তাৰ ওপৰত গুৰুত্ব দিব লাগে । এই বিষয়টোৰ লগত অসমৰ ভৱিষ্যত নিহিত হৈ আছে ।” তদুপৰি তেওঁ কয় যে, বাংলাদেশত আহিবলগীয়া নতুন চৰকাৰৰ লগত এই বিষয়ত আলোচনাৰ কৰাৰ বাবে ভাৰত চৰকাৰে নিৰন্তৰ প্ৰচেষ্টাৰ চলাব । লগতে ভাৰত চৰকাৰে আলোচনাৰ মাধ্যমৰে বাংলাদেশত উত্তৰ-পূৰ্বৰ সন্ত্ৰাসবাদী সংগঠনে যাতে ঘাটি স্থাপন কৰিব নোৱাৰে, সেই ক্ষেত্ৰত নিশ্চিত প্ৰদান কৰিব বুলি আশা প্ৰকাশ কৰে মুখ্যমন্ত্ৰী শৰ্মাই ।

ইফালে, বাংলাদেশৰ এই ধৰণৰ ৰাজনৈতিক অস্থিৰতা যদি চলি থাকে, তেন্তে সীমান্তৰে অসম তথা ভাৰতলৈ বাংলাদেশৰ লোকৰ অনুপ্ৰৱেশ হোৱাৰ সম্ভাৱনা কৰা উল্লেখ কৰে মুখ্যমন্ত্ৰী শৰ্মাই । শৰ্মাই কয়,”চিন্তনীয় বিষয় এই যে, বাংলাদেশত এই ধৰণৰ পৰিস্থিতি অব্যাহত থাকিলে, বহু লোক অসম তথা ভাৰতলৈ আহিবলৈ বিচাৰিব । গতিকে এই ক্ষেত্ৰত আমি সীমা সুৰক্ষিত কৰাটো অতি প্ৰয়োজন ।”