নিতৌ অনুপ্ৰৱেশৰ চেষ্টা বাংলাদেশীৰ ! এই সন্দৰ্ভত কি ক’লে মুখ্যমন্ত্ৰীয়ে ?

নিতৌ বাংলাদেশী নাগৰিকে ভাৰতত অনুপ্ৰৱেশৰ চেষ্টা কৰি আহিছে । কিয়নো বৰ্তমান সময়ত চুবুৰীয়া এই দেশখনৰ অৱস্থা ভাল নহয় । পুনৰবাৰ এই দাবী কৰিলে অসমৰ মুখ্যমন্ত্ৰী হিমন্ত বিশ্ব শৰ্মাই । ইয়াৰ লগতে মুখ্যমন্ত্ৰীগৰাকীয়ে কয় যে, বাংলাদেশৰ পৰিস্থিতি বৰ্তমান ভল নহয় আৰু শুনা গৈছে যে, পাকিস্তানী আই এছ আইয়ে বাংলাদেশীৰ উগ্ৰপন্থীৰ এটা অংশৰ সৈতে পুনৰ সংযোগ স্থাপন কৰিবলৈ চেষ্টা কৰিছে ।

উল্লেখ্য যে, ২০২০ চনৰ বড়ো শান্তি চুক্তিয়ে পাঁচ বছৰ অতিক্ৰম কৰে । এই উপলক্ষে অনুষ্ঠিত এক অনুষ্ঠানত অংশগ্ৰহণ কৰাৰ পাছতে সাংবাদিকৰ এটা দলৰ সৈতে মত বিনিময় কৰি মুখ্যমন্ত্ৰীগৰাকীয়ে কয় যে, বাংলাদেশীৰ অনুপ্ৰৱেশৰ সন্দৰ্ভত অসমে অধিক সতৰ্কতা অৱলম্বন কৰিছে । নিতৌ সীমান্তৰে অনুপ্ৰৱেশৰ চেষ্টা কৰা বাংলাদেশী নাগৰিকক আটক কৰি বিতাৰিত কৰা হৈছে । এই ক্ষেত্ৰত ৰাজ্যখনে অধিক সতৰ্কতা অৱলম্বন কৰিছে বুলি কয় মুখ্য়মন্ত্ৰী শৰ্মাই ।

তেওঁ কয়, ‘বাংলাদেশৰ পৰিস্থিতি বৰ্তমান ভাল নহয় আৰু শুনা যায় যে বাংলাদেশী উগ্ৰপন্থীৰ এটা অংশৰ সৈতে আই এছ আইয়ে পুনৰ যোগাযোগ কৰাৰ চেষ্টা চলাইছে।’ লগতে তেওঁ কয় যে, অসমত কোনেও শান্তি বিঘ্নিত কৰিব নিবিচাৰে। অসমত বিদ্ৰোহৰ প্ৰতি স্থানীয় সমৰ্থন নাই বুলি উল্লেখ কৰে মুখ্যমন্ত্ৰীগৰাকীয়ে ।

উল্লেখ্য যে, মুখ্যমন্ত্ৰীগৰাকীয়ে সামাজিক মাধ্যমৰ জৰিয়তে প্ৰকাশ কৰা তথ্য অনুসৰি, যোৱা দুদিনত ৫ পাঁচজনকৈ বাংলাদেশীয়ে ভাৰতত অনুপ্ৰৱেশৰ চেষ্টা কৰিছিল । নিয়মীয়া টহলৰ সময়ত এই আটাইকেইজনকে আটক কৰি পুনৰ বিতাৰিত কৰিছে অসম আৰক্ষীয়ে ।

যোৱা সোমবাৰে মুখ্যমন্ত্ৰীগৰাকীয়ে প্ৰকাশ কৰা তথ্য অনুসৰি, নিয়মীয়াকৈ সীমান্তত টহল দি থকা অৱস্থাত অসম আৰক্ষীয়ে আটক কৰে মঃ জুলমত আলী আৰু মঃ ছাকিল নামৰ দুই বাংলাদেশীক । ইয়াৰ পাছতে তালাচীৰ অন্তত দুয়োকে বিতাৰিত কৰা হয় । এই দুটা বাংলাদেশীয়ে অবৈধভাৱে ভাৰতত অনুপ্ৰৱেশৰ চেষ্টা চলাইছিল ।

একেদৰে যোৱা মঙলবাৰে মুখ্যমন্ত্ৰ গৰাকীয়ে প্ৰকাশ কৰা তথ্য অনুসৰি, এগৰাকী মহিলাসহ তিনি বাংলাদেশীক আটক কৰি অসম আৰক্ষীয়ে পুনৰ বিতাৰিত কৰে । আটক কৰা বাংলাদেশী নাগৰিক কেইজনৰ নাম হৈছে , শোভা এছ, মিথুন এছ, পিংকি মোলা । এই তিনি বাংলাদেশীয়ে অবৈধভাৱে ভাৰতত অনুপ্ৰৱেশৰ চেষ্টা কৰিছিল ।

লগতে পঢ়ক: ‘Quick Action’ ত অসম আৰক্ষী, সীমান্তত পুনৰ দুই বাংলাদেশীক আটক…