দিলোৱাৰ হুছেইনৰ নিস্তাৰ নহ’ব নেকি? মুখ্য়মন্ত্ৰীৰ মুখত দিলোৱাৰৰ দৰে লোকক নিৰ্মূলৰ প্ৰসংগ

মহবুবুল হক আৰু দিলোৱাৰ হুছেইন মজুমদাৰৰ প্ৰসংগক লৈ পুনৰ সৰৱ অসমৰ মুখ্যমন্ত্ৰী হিমন্ত বিশ্ব শৰ্মা । তেওঁ কয় যে এপেক্স বেংক এটা চৰকাৰী প্ৰতিষ্ঠান আৰু ই কোনো নিৰ্দিষ্ট ব্যক্তিৰ নিৰ্দেশত নচলে ।

বিশ্বনাথ জিলাত এক অনুষ্ঠানত অংশগ্ৰহণৰ সময়ত মুখ্যমন্ত্ৰী শৰ্মাই উল্লেখ কৰে যে বিজেপি চৰকাৰ গঠন হৈছে দিলোৱাৰ হুছেইনৰ দৰে ব্যক্তিক প্ৰতিহত কৰিবলৈ । তেওঁৰ চৰকাৰে ইয়াৰ বিৰুদ্ধে নিৰ্দিষ্ট পৰিকাঠামোৰ অধীনত ব্যৱস্থা গ্ৰহণ কৰিব বুলি উল্লেখ কৰে মুখ্যমন্ত্ৰীয়ে ।

“এপেক্স বেংক হৈছে অসমৰ এক জাতীয় প্ৰতিষ্ঠান আৰু ই দিলোৱাৰ হুছেইনৰ নিৰ্দেশত নচলে । তেওঁ দুনীৰ্তি সংঘটিত হোৱাৰ দাবী কৰিলেই সঁচাকৈয়ে দুৰ্নীতি হোৱা বুজাব নেকি?” প্ৰশ্ন কৰে ডঃ শৰ্মাই । তেওঁ লগতে উল্লেখ কৰে যে, বেংকটোৱে নতুন এটিএম আৰু আধুনিক প্ৰযুক্তিৰে আগবাঢ়ি যোৱা বিষয়বোৰত দিলোৱাৰ হুছেইন আৰু তেওঁৰ সমৰ্থকসকলে গুৰুত্ব দিয়া নাই ।

মুখ্যমন্ত্ৰীয়ে লগতে আঙুলিয়াই দিয়ে যে অসমৰ একাংশ লোকে দিলোৱাৰ হুছেইনে যি কয় তাক বিশ্বাস কৰাৰ প্ৰৱণতা ৰাখে, কিন্তু তথ্যই অন্য ধৰণে দেখুৱাইছে । তেওঁ দিলোৱাৰ হুছেইনৰ দৰে ব্যক্তিক নিৰ্মূল কৰাৰ বাবে বিজেপিৰ প্ৰতিশ্ৰুতি পুনৰবাৰ উল্লেখ কৰি শাসন আৰু জবাবদিহিতাৰ ক্ষেত্ৰত দলৰ স্থিতিক শক্তিশালী বুলি উল্লেখ কৰে ।

মুখ্যমন্ত্ৰী হিমন্ত বিশ্ব শৰ্মাই পূৰ্বে দাবী কৰিছিল যে দিলোৱাৰ হুছেইন চৰকাৰী নীতি অনুসৰি ‘স্বীকৃতিপ্ৰাপ্ত’ সাংবাদিক নহয় । তেওঁ TV9 ৰ এক সন্মিলনত উল্লেখ কৰিছিল যে, কোনোবাই তেওঁৰ বিষয়ে লিখিলে কোনো সমস্যা নাই । কিন্তু যদি এজন সাংবাদিক আন বৃত্তিত জড়িত হৈ থাকে, তেন্তে আইন সকলোৰে বাবে সমান ।

যোৱা মঙলবাৰে নিশা দিলোৱাৰ হুছেইনক প্ৰথম গ্ৰেপ্তাৰ কৰা হৈছিল । এপেক্স বেংকৰ কাৰ্যালয়ত বাতৰি পৰিবেশন কৰিবলৈ গৈ এজন সুৰক্ষাকৰ্মীক অপমান কৰাৰ অভিযোগত তেওঁক গ্ৰেপ্তাৰ কৰিছিল আৰক্ষীয়ে । কিন্তু বুধবাৰে তেওঁ লাভ কৰে জামিন । দিলোৱাৰৰ মুক্তিৰ দাবীত গুৱাহাটীত ব্যাপক প্ৰতিবাদী কাৰ্যসূচী গ্ৰহণ কৰিছিল একাংশ সাংবাদিকে । ৰাজ্যৰ আন জিলাতো হৈছিল প্ৰতিবাদ ।

বৃহস্পতিবাৰে এপেক্স বেংকৰ পৰিচালন সঞ্চালক ডম্বৰু শইকীয়াই দিলোৱাৰৰ বিৰুদ্ধে দাখিল কৰে বেংকৰ পৰা গুৰুত্বপূৰ্ণ নথি চুৰিৰ চেষ্টা কৰাৰ অভিযোগ । ফলত কাৰাগাৰৰ পৰাই পুনৰ গ্ৰেপ্তাৰ কৰা হয় দিলোৱাৰক । শুকুৰবাৰে পুৱা আৰক্ষীৰ এটা দলে অভিযান চলাই দিলোৱাৰৰ গুৱাহাটীৰ বাসগৃহত । অৱশ্যে সেই দিনাই আদালতে তেওঁক দ্বিতীয়টো গোচৰতো জামিন প্ৰদান কৰে ।