আজি বিজেপিৰ মহা সদস্যতা ভৰ্তি অভিযান, অসমত ৪৩ লাখ অতিক্ৰম কৰিলে সদস্য ভৰ্তিয়ে…

দেশজুৰি বিজেপিৰ সদস্যভৰ্তি অভিযান অব্যাহত আছে । ইয়াৰ সমান্তৰালভাৱে অসম ৰাজ্যিক বিজেপিয়েও সমষ্টিয়ে সমষ্টিয়ে সদস্যভৰ্তি অভিযান অব্যাহত ৰাখিছে । দেশজুৰি চলি থকা সদস্যভৰ্তি অভিযানৰ অংশ হিচাপে অসম ৰাজ্যিক বিজেপিৰ সদস্যৰ সংখ্যাই ইতিমধ্যে ৪৩ লাখ অতিক্ৰম কৰিছে আৰু দলটোৱে ৫০ লাখৰ লক্ষ্য নিৰ্ধাৰণ কৰিছে। আজি সাংবাদিকৰ আগত এই কথা সদৰী কৰে মুখ্যমন্ত্ৰী হিমন্ত বিশ্ব শৰ্মাই ।

মুখ্যমন্ত্ৰী শৰ্মাই কয় যে, ৰাজ্যৰ ১২৬টা বিধানসভাৰ সমষ্টিৰ আটাইকেইটা খণ্ডতে সদস্যভৰ্তি অভিযান চলি আছে আৰু দুৰ্গা পূজাৰ উৎসৱ আৰম্ভ হোৱাৰ এদিন পূৰ্বে ৰাজ্যজুৰি এই অভিযান সমাপ্ত হ’ব বুলি জানিবলৈ দিয়ে মুখ্যমন্ত্ৰীগৰাকীয়ে । মুখ্যমন্ত্ৰী শৰ্মাই মালিগাঁৱত মহা সদস্যতা ভৰ্তি অভিযানত অংশগ্ৰহণ কৰাৰ পাছত সংবাদ মাধ্যমৰ আগত কয় যে, বিজেপিয়ে প্ৰতিটো সমষ্টিৰ বাবে ৪০ হাজাৰ সদস্য ভৰ্তিৰ বাবে লক্ষ্য নিৰ্ধাৰণ কৰিছে । যদি কোনো সমষ্টিয়ে এই লক্ষ্যত উপনীত হ’ব নোৱাৰে,তেন্তে দুৰ্গা পূজাৰ পাছত সেই সমষ্টিত পুনৰ সদস্যভৰ্তি অভিযান আৰম্ভ হ’ব বুলি কয় হিমন্ত বিশ্ব শৰ্মাই ।

তেওঁ কয়, ‘যোৱা নিশালৈকে ৪৩,৬৭,০০০ৰো অধিক লোক বিজেপিৰ সদস্য হৈছে । দেশজুৰি যিমান সংখ্যক লোক বিজেপিৰ সদস্য হৈছে তাৰ ১০ শতাংশ অসমে অৰিহণা যোগাইছে । মিত্ৰ দল অগপ আৰু ইউ পি পি এলৰ সমষ্টিসমূহতো বিজেপিৰ সদস্যভৰ্তি অভিযান অতি উৎসাহজনক। কিন্তু সেই সমষ্টিসমূহৰ সদস্য সকলে মিত্ৰ দলসমূহকে ভোট দিব ।’ এই দৰে কয় মুখ্যমন্ত্ৰী হিমন্ত বিশ্ব শৰ্মাই ।

ইফালে, উজনি অসমৰ সমষ্টিসমূহৰ ১০টা ছেগমেণ্টেৰ সদস্যভৰ্তি অভিযানে ইতিমধ্যে প্ৰায় ৪০ হাজাৰৰ লক্ষ্যত উপনীত হৈছে বুলি কয় মুখ্যমন্ত্ৰী গৰাকীয়ে । নেটৱৰ্ক সমস্যাৰ বাবে অনলাইন সদস্যভৰ্তি অভিযান সম্ভৱ নোহোৱা কিছুমান অঞ্চলত অফলাইন প্ৰক্ৰিয়া আৰম্ভ হ’ব বুলিও  জানিবলৈ দিয়ে হিমন্ত বিশ্ব শৰ্মাই ।