IAS শেৱালী দেৱী শৰ্মাৰ বিৰুদ্ধে ২,০৭৪ পৃষ্ঠাৰ অভিযোগনামা দাখিল, আয়তকৈ ৩৬৮.৪১% বেছি আছে সম্পত্তি…

শেৱালী দেৱী শৰ্মা

IAS শেৱালী দেৱী শৰ্মাৰ বিৰুদ্ধে অভিযোগনামা দাখিল। মুখ্যমন্ত্ৰীৰ বিশেষ নিৰীক্ষণ কোষে ২,০৭৪ পৃষ্ঠাজোৰা বিস্তৃত অভিযোগনামাত দাখিল কৰে। এই অভিযোগনামাত আই এ এছ বিষয়াগৰাকীৰ বিৰুদ্ধে কেইবাটাও অভিযোগ সন্নিবিষ্ট হৈছে।  SCERT-ৰ সঞ্চালিকা আছিল শেৱালী দেৱী শৰ্মা। আয়-বহিৰ্ভূত সম্পত্তিৰ গৰাকী হৈছিল বিষয়াগৰাকী। তথ্য অনুসৰি আয়তকৈ ৩৬৮.৪১ শতাংশ সম্পত্তি আছে তেওঁৰ। SCERT ৰ এই কেলেংকাৰীত তেওঁৰ বহু আত্মীয়ৰ নামো সাঙোৰ খাই পৰিছিল। ক্ষমতাৰ অপব্যৱহাৰ কৰাৰ অভিযোগত শৰ্মাৰ বিৰুদ্ধে চি এম ভিজিলেন্সত  ৫/২০২৩ নম্বৰৰ গোচৰ ৰুজু হৈছিল।

উল্লেখ্য যে, ২০২৩ চনত অসমৰ ৰাজ্যিক শৈক্ষিক গৱেষণা আৰু প্ৰশিক্ষণ পৰিষদৰ প্ৰাক্তন মুৰব্বী আই এ এছ বিষয়া শেৱালী দেৱী শৰ্মাৰ কেলেংকাৰীৰ কথা পোহৰলৈ আহিছিল। অভিযোগ অনুসৰি SCERT ৰ সঞ্চালক পদত থাকোতে তেওঁ ১০৫ কোটি টকাৰ কেলেংকাৰী সংঘটিত কৰিছিল। এই অভিযোগতে উক্ত বৰ্ষৰ মে’ মাহত মুখ্যমন্ত্ৰীৰ বিশেষ ভিজিলেন্স চেলে গ্ৰেপ্তাৰ কৰিছিল শৰ্মাক। কিছুদিন পূৰ্বে শৰ্মাই উচ্চতম ন্যায়ালয়ৰ পৰা জামিন লাভ কৰিছিল।

অজিত পল সিং, ৰাহুল আমিম আৰু হোটেলৰ গৃহকৰ্মীৰ সৈতে শৰ্মাৰ বিৰুদ্ধে দূৰ শিক্ষা (ODL) ব্যৱস্থাৰ অধীনত, ডিপ্লমা ইন এলিমেণ্টৰী এডুকেচন পাঠ্যক্ৰমৰ বাবে আবণ্টিত চৰকাৰী ধনৰ অপব্যৱহাৰৰ অভিযোগ উত্থাপন হৈছিল।

এই কেলেংকাৰীৰ কথা পোহৰলৈ অহাৰ পাছতে পলায়ন কৰিছিল শেৱালী দেৱী শৰ্মাই। আৰক্ষীয়ে পাছত তেওঁক ৰাজস্থানৰ আজমেৰৰ এখন হোটেলৰ পৰা গ্ৰেপ্তাৰ কৰিছিল। তেওঁৰ লগতে গ্ৰেপ্তাৰ হৈছিল জোঁৱায়েক অজিত পাল সিং, ঠিকাদাৰ ৰাহুল আমিন আৰু বনকৰা মহিলা মাজনী কাইথাক। অভিযোগ অনুসৰি ২০১৭ চনৰ পৰা ২০২০ চনলৈ শেৱালী দেৱীয়ে এই কাণ্ড সংঘটিত কৰিছিল। অসম চৰকাৰৰ অনুমতি অবিহনে তেওঁ ৫ টাকৈ বেংক একাউন্ট খুলিছিল।

শেৱালী শৰ্মাক ভিজিলেন্সে জেৰা কৰাৰ সময়ত পোহৰলৈ আহিছিল আন বিস্ফোৰক তথ্য। এই কেলেংকাৰীৰ সৈতে বিভিন্ন দল-সংগঠনৰ নেতা, সাংবাদিক আদি জড়িত থকাৰ অভিযোগ উত্থাপন হৈছিল। উল্লেখ্য যে, এই কোটি টকীয়া কেলেংকাৰীয়ে সমগ্ৰ ৰাজ্য জোকাৰি গৈছিল।