অসম বৈভৱ, অসম সৌৰভ আৰু অসম গৌৰৱ বঁটা ঘোষণা, তালিকাত আছে কাৰ কাৰ নাম? জানক…
ৰাজ্য চৰকাৰে ঘোষণা কৰিলে অসম চৰকাৰৰ অসম বৈভৱ, অসম সৌৰভ, অসম গৌৰৱ বঁটা প্ৰাপকৰ নাম। দেওবাৰে এক সংবাদমেল সম্বোধন কৰি এই ঘোষণা কৰে মুখ্যমন্ত্ৰী হিমন্ত বিশ্ব শৰ্মাই।
দেওবাৰে ৰাজ্য চৰকাৰে ঘোষণা কৰিলে অসম বৈভৱ, অসম সৌৰভ আৰু অসম গৌৰৱ বঁটা। আজি অনুষ্ঠিত হোৱা ৰাজ্যিক কেবিনেট বৈঠকৰ অন্তত মুখ্যমন্ত্ৰী হিমন্ত বিশ্ব শৰ্মাই সংবাদ মেল সম্বোধন কৰি এই বঁটা প্ৰাপকৰ নাম ঘোষণা কৰে। মুখ্যমন্ত্ৰীগৰাকীয়ে ঘোষণা কৰা অনুসৰি এইবাৰ ৰাজ্য চৰকাৰৰ অসম বৈভৱ বঁটা আগবঢ়োৱা হৈছে অৱসৰপ্ৰাপ্ত লেফ্টেনেণ্ট বিষয়া ৰাণা প্ৰতাপ কলিতালৈ। ইয়াৰোপৰি কেইবাগৰাকী বিশিষ্ট ব্যক্তিক এইবাৰৰ অসম সৌৰভ আৰু অসম গৌৰৱ বঁটা আগবঢ়োৱা হৈছে।
অসম সৌৰভ বঁটা
ইয়াৰোপৰি বিশিষ্ট সংগীত শিল্পী দ্বিপেন বৰুৱালৈ অসম সৌৰভ বঁটা। দ্বিপেন বৰুৱাই বৰ্তমানলৈ প্ৰায় ৫০খন চলচ্চিত্ৰত কণ্ঠদান কৰিছে। ১৯৬৮ চনত দ্বিপেন বৰুৱাৰ ককায়েক ব্ৰজেন বৰুৱাৰ দ্বাৰা নিৰ্মিত ডক্তৰ বেজবৰুৱা চলচ্চিত্ৰৰ জৰিয়তে তেওঁ সংগীতৰ জগতত ভৰি দিছিল। তাৰ পাছৰ পৰা নিজৰ কন্ঠৰে তেওঁ জনতাৰ হৃদয় জয় কৰি আহিছে।
বিশিষ্ট নাট্যকাৰ হেমন্ত দত্তলৈ এইবছৰৰ অসম সৌৰভ বঁটা প্ৰদানৰ সিদ্ধান্ত গ্ৰহণ কৰে অসম চৰকাৰে। হেমন্ত দত্ত এগৰাকী অসমীয়া নাট্যকাৰ, গীতিকাৰ, অভিনেতা আৰু পৰিচালক। ১৯৪১ চনত দৰং জিলাৰ খাৰুপেটীয়াত জন্ম লাভ কৰা দত্তই এশৰো অধিক নাট আৰু পাঁচশৰো অধিক গীত ৰচনা কৰিছে।
লগতে ভাৰতীয় মহিলা দলৰ ক্ৰিকেটাৰ উমা ছেত্ৰীলৈ অসম সৌৰভ বঁটা আগবঢ়োৱা হৈছে । ভাৰতীয় মহিলা ক্ৰিকেট দলত স্থান লাভ কৰা প্ৰথম গৰাকী অসমীয়া ক্ৰিকেটাৰ উমা ছেত্ৰী।তেওঁ এগৰাকী উইকেট-কিপাৰ আৰু বেটাৰ। তেওঁ ভাৰতীয় মহিলা ক্ৰিকেট দলৰ উইকেট কিপাৰৰ লগতে অসম মহিলা ক্ৰিকেট দলৰো ইউকেট কিপাৰ। তেওঁ ২০২৩ চনত চীনৰ হাংঝৌত অনুষ্ঠিত এছিয়ান গেমছত স্বৰ্ণ পদক লাভ কৰা ভাৰতীয় মহিলা ক্ৰিকেট দলৰ অংশ আছিল।
ইয়াৰোপৰি সুব্ৰমনিয়ম ৰামাদৰাই, ড০ বাপী পল, ড০ পূৰৱী শইকীয়ালৈ অসম সৌৰভ বঁটা প্ৰদান কৰা হৈছে।
অসম গৌৰৱ বঁটা
অসম গৌৰৱ বঁটা প্ৰদান কৰা হ’ব- ফুলেশ্বৰী দত্ত, মিনাক্ষী দাস, পাৰ্থিৱ সুন্দৰ গগৈ, ধীৰেন্দ্ৰ নাথ পল, হৰিদাস দাস, বিনং তেৰ, নজৰুল হক, বিশ্বজিত বৰা, ভাৰত কলিতা, বৰলংফা নাৰ্জাৰী, ৰাম চাচনী, উপমান্যু বৰকাকতি, ডেভিদ প্ৰতীম গগৈক। লগতে প্ৰতিষ্ঠান চোৰান আহেম, বাৰেকুৰি ভিলেজ, হাতী বন্ধু এনজিঅ’ক অসম গৌৰৱ বঁটা প্ৰদান কৰা হ’ব।
উল্লেখ্য যে, ৩০ মাৰ্চ অনুষ্ঠিত হ’বলগীয়া এক গাম্ভীৰ্যপূৰ্ণ অনুষ্ঠানত এই বঁটা প্ৰদান কৰা হ’ব। অসম বৈভৱ বঁটাত থাকিব নগদ ৫ লাখ টকা, অসম গৌৰৱ বঁটাত থাকিব নগদ ৩ লাখ টকা আৰু অসম সৌৰভ বঁটাত থাকিব নগদ ৪ লাখ টকা।
