এতিয়াৰ পৰা কংগ্ৰেছ নেতা-সাংসদৰ থাকিব নোৱাৰে ফেন ক্লাব, দিয়া হ’ব দলৰ পৰা অব্যাহতি…

অসমত এতিয়াৰ পৰা থাকিব নোৱাৰিব কংগ্ৰেছ নেতা- সাংসদৰ ফেন ক্লাব। ফেন ক্লাব সংস্কৃতিৰ বিৰুদ্ধে কঠোৰ হৈ পৰিছে কংগ্ৰেছ হাইকমাণ্ড। শেহতীয়াকৈ কংগ্ৰেছে সিদ্ধান্ত গ্ৰহণ কৰে যে এতিয়াৰ পৰা দেশত কেৱল কংগ্ৰেছ নেতা ৰাহুল গান্ধী, প্ৰিয়ংকা গান্ধী আৰু ছোনিয়া গান্ধীৰহে ফেন ক্লাব থাকিব। ইয়াৰ বাহিৰে কংগ্ৰেছেৰ কোনো নেতা-সাংসদ, বিধায়ক বা সদস্যই ফেন ক্লাব গঠন কৰিব নোৱাৰিব। এই সিদ্ধান্তৰ পাছতেই এতিয়া অসম প্ৰদেশ কংগ্ৰেছৰ সভাপতি ভূপেন বৰা, সাংসদ গৌৰৱ গগৈয়ে ফেন ক্লাব বন্ধ কৰিব লাগিব।

উল্লেখ্য যে, দেওবাৰে জীতেন্দ্ৰ সিঙৰ নেতৃত্বত কংগ্ৰেছৰ ৰাজনৈতিক পৰিক্ৰমা বিভাগৰ এক বৈঠক অনুষ্ঠিত হৈছিল। এই বৈঠকত কংগ্ৰেছে ৯ টাকৈ গুৰুত্বপূৰ্ণ সিদ্ধান্ত গ্ৰহণ কৰিছিল। এই সিদ্ধান্তসমূহৰ ভিতৰত এটা আছিল ফেন ক্লাব সংস্কৃতিৰ বিৰুদ্ধে পদক্ষেপ। এই সন্দৰ্ভত এতিয়ালৈকে প্ৰদেশ কংগ্ৰেছে কোনো আনুষ্ঠানিক ঘোষণা কৰা নাই যদিও শীঘ্ৰেই ঘোষণা কৰিব পাৰে।

সূত্ৰ অনুসৰি জানিব পৰা মতে, এই বৈঠকত সিদ্ধান্ত গ্ৰহণ কৰা হয় যে কংগ্ৰেছত এতিয়াৰ পৰা কোনো নেতা- সাংসদৰ ফেন ক্লাব থাকিব নোৱাৰে। কেৱল কংগ্ৰেছ নেত্ৰী ছোনিয়া গান্ধী, প্ৰিয়ংকা গান্ধী আৰু কংগ্ৰেছ সাংসদ ৰাহুল গান্ধীহে ৰাখিব পাৰিব ফেন ক্লাব। কংগ্ৰেছৰ এই সিদ্ধান্তৰ পাছতেই এতিয়া প্ৰদেশ কংগ্ৰেছৰ সভাপতি ভূপেন বৰা, সাংসদ গৌৰৱ গগৈয়ে ফেন ক্লাব বন্ধ কৰিব লাগিব। লগতে কংগ্ৰেছে এয়াও কয় যে, কোনো কংগ্ৰেছ নেতাৰ ফেন ক্লাব থাকিলে তেওঁক দলৰ পৰা অব্যাহতি দিয়া হ’ব।

উল্লেখ্য যে, বিগত কেইটামান দিনত ফেন ক্লাবক লৈ কংগ্ৰেছৰ ভিতৰচ’ৰাত কিছু সমস্যাৰ সৃষ্টি হৈছিল। সাংসদ গৌৰৱ গগৈ আৰু ভূপেন বৰাৰ ফেন ক্লাব মূৰৰ কামোৰণি হৈ পৰিছিল কংগ্ৰেছ হাইকমাণ্ডৰ। মন কৰিবলগীয়া যে, বিগত সময়চোৱাত কংগ্ৰেছ সাংসদ গৌৰৱ গগৈৰ ফেন ক্লাবে যথেষ্ঠ চৰ্চা লাভ কৰিবলৈ সক্ষম হৈছিল। আনকি গৌৰৱ গগৈ ফেন ক্লাবে কংগ্ৰেছৰ বেনাৰৰ পৰিবৰ্তে ‘গৌৰৱ গগৈ ফেন ক্লাব’ৰ বেনাৰত অনুষ্ঠান অনুষ্ঠিত কৰিছিল।

মন কৰিবলগীয়া যে, শিক্ষক দিৱসৰ দিনাৰ কাৰ্যসূচীত ৰাজ্যত বিভিন্ন ধৰণৰ কাৰ্যসূচী অনুষ্ঠিত হৈছিল। কংগ্ৰেছৰ সমান্তৰালকৈ গৌৰৱ গগৈ ফেন ক্লাবেও নিজাববীয়াকৈ অনুষ্ঠান অনুষ্ঠিত কৰিছিল। ইয়াৰোপৰি তৰুণ গগৈৰ শ্ৰদ্ধাঞ্জলি অনুষ্ঠানত কংগ্ৰেছে কেইবাটাও কাৰ্যসূচী অনুষ্ঠিত কৰিছিল। আনহাতে গৌৰৱ গগৈ ফেন ক্লাবে কংগ্ৰেছৰ বেনাৰৰ পৰিবৰ্তে গৌৰৱ গগৈ ফেন ক্লাবৰ বেনাৰত কাৰ্যসূচী অনুষ্ঠিত কৰিছিল। এনেবোৰ ঘটনাৰ পাছতেই কংগ্ৰেছ হাইকমাণ্ডে এই সিদ্ধান্ত গ্ৰহণ কৰে।