লখিমপুৰত চাঞ্চল্যকৰ ঘটনাঃ নিজ পত্নীৰ প্ৰাণ লৈ নিজেও চৰম সিদ্ধান্ত ল’লে আৰক্ষী জোৱানে

প্ৰতিনিধিত্বমূলক ছবি

লখিমপুৰত সংঘটিত হৈছে এক চাঞ্চল্যকৰ ঘটনা। অসম আৰক্ষীৰ কনিষ্টবল পদত নিয়োজিত এগৰাকী ব্যক্তিয়ে পত্নীক হত্যা কৰাৰ পিছত নিজেও আত্মহত্যা কৰা বুলি জানিব পৰা গৈছে। নিহত আৰক্ষী কনিষ্টবলজনক বসন্ত শইকীয়া বুলি জানিব পৰা গৈছে। আৰক্ষীৰ এক সূত্ৰই এই সন্দৰ্ভত প্ৰকাশ কৰা মতে, বসন্ত শইকীয়া নামৰ লেন্স নায়কজনে যোৱা নিশা নিজ পত্নীক হত্যা কৰাৰ পিছতে নিজেও আত্মহত্যা কৰে। প্ৰধানতঃ ঘৰুৱা বিবাদৰ বাবেই আৰক্ষী কনিষ্টবলজনে এনে পন্থা গ্ৰহণ কৰে বুলি সন্দেহ কৰা হৈছে।

এই চাঞ্চল্যকৰ ঘটনা সংঘটিত হৈছে লখিমপুৰ জিলাৰ বাৰবোচা অঞ্চলত। যোৱা নিশাই এই ঘটনা সংঘটিত হয় যদিও আজি পুৱাৰ ভাগতহে এই ঘটনা পোহৰলৈ আহে। নিহত দম্পতীহালৰ সন্তানে পুৱা কোঠাটোৰ দুৱাৰ খুলি পিতৃ-মাতৃৰ নিৰ্জীৱ মৃতদেহ আৱিষ্কাৰ কৰে আৰু লগে লগে আতংকত চিঞৰি উঠে। ইয়াৰ পিছতহে ঘটনা সন্দৰ্ভত অৱগত হয় চুবুৰীয়া লোকসকল।

ঘটনা সন্দৰ্ভত খবৰ লাভ কৰাৰ পিছতে স্থানীয় আৰক্ষী ঘটনাস্থলীত উপস্থিত হয়। প্ৰাথমিক তদন্ত অনুসৰি নিহত বসন্ত শইকীয়াই দাৰে পত্নীক হত্যা কৰাৰ পিছতে বিহ পান কৰি আত্মহত্যা কৰে বুলি সন্দেহ কৰা হৈছে। আৰক্ষীয়ে জানিবলৈ দিয়া মতে, মৃতদেহকেইটাৰ কাষত এটা গিলাচ উদ্ধাৰ কৰা হৈছে। এই গিলাচটোত থকা পদাৰ্থবিধ বিষ হ’ব পাৰে বুলি সন্দেহ প্ৰকাশ কৰিছে আৰক্ষীয়ে।

অৱশ্যে ফৰেনছিক পৰীক্ষাৰ অন্তত অহা প্ৰতিবেদনৰ পিছতহে এই বিষয়ে নিশ্চিত হ’ব পৰা যাব বুলি আৰক্ষীয়ে লগতে প্ৰকাশ কৰিছে। ইতিমধ্যে হত্যাত ব্যৱহাৰ কৰা বুলি সন্দেহ কৰা এখন দাৰ লগতে গিলাচটো জব্দ কৰিছে আৰক্ষীয়ে। প্ৰধানতঃ পাৰিবাৰিক সংঘৰ্ষৰ ফলতে এই ঘটনা সংঘটিত হোৱা বুলি সন্দেহ কৰা হৈছে। ঘটনা সন্দৰ্ভত তদন্ত অব্যাহত আছে বুলি আৰক্ষীয়ে সদৰী কৰিছে।

লক্ষণীয়ভাৱে ইতিপূৰ্বে শনিবাৰেও ডিব্ৰুগড় জিলাৰ বগীবিল আউটপোষ্টত সংঘটিত হৈছিল আন এক চাঞ্চল্যকৰ ঘটনা। আউটপোষ্টৰ এগৰাকী কনিষ্টবলে নিজৰ চাৰ্ভিছ ৰিভলভাৰে আত্মহত্যাৰ চেষ্টা চলাইছিল আৰু কনিষ্টবলজনক ৰক্ষা কৰিবলৈ চেষ্টা কৰিবলৈ গৈ আহত হয় এজন আৰক্ষী বিষয়া। আহত বিষয়াজনৰ নাম তীৰ্থ চেত্ৰী বুলি জানিব পৰা গৈছে।

আনহাতে আত্মহত্যাৰ চেষ্টা চলোৱা কনিষ্টবলজনৰ নাম প্ৰাঞ্জল বৰা বুলি জানিব পৰা গৈছে। ঘৰুৱা বিবাদৰ পৰিপ্ৰেক্ষিতত প্ৰাঞ্জল বৰাই আত্মহত্যাৰ চেষ্টা কৰা বুলি সন্দেহ কৰা হৈছে। তেওঁৰ এই চেষ্টা ৰোধ কৰিবলৈ গৈ আহত হয় আউটপোষ্টৰ ভাৰপ্ৰাপ্ত বিষয়া তীৰ্থ চেত্ৰী। বৰ্তমান আহত বিষয়াগৰাকী ডিব্ৰুগড় মেডিকেল কলেজ হাস্পতালত চিকিৎসাধীন হৈ আছে। আনহাতে কনিষ্টবল বৰাক গ্ৰেপ্তাৰ কৰি তদন্ত অব্যাহত ৰাখিছে আৰক্ষীয়ে।