FIR Against Bhargav Borbora : পুনৰ ভাৰ্গৱ বৰবৰাৰ বিৰুদ্ধে ৰাজ্যিক মানৱ অধিকাৰ আয়োগত এজাহাৰ…

ভাৰ্গৱ বৰবৰাৰ বিৰুদ্ধে দেৱব্ৰত শইকীয়াৰ গোচৰ

নিলম্বিত পাণবজাৰ আৰক্ষীৰ থানাৰ ভাৰপ্ৰাপ্ত বিষয়া ভাৰ্গৱ বৰবৰাৰ বিৰুদ্ধে মানৱ অধিকাৰ আয়োগত এজাহাৰ দাখিল কৰিছে বিৰোধী দলপতি দেৱব্ৰত শইকীয়াই । দেৱব্ৰত শইকীয়াই সদৰী কৰা মতে, ৰাজ্যিক মানৱ অধিকাৰ আয়োগ আৰু আৰক্ষী দায়বদ্ধতা আয়োগৰ ওচৰত দাখিল কৰিছে এই এজাহাৰ । এই এজাহাৰ নিলম্বিত আৰক্ষী বিষয়া ভাৰ্গৱ বৰবৰাৰ বিৰুদ্ধে দাখিল কৰা বুলি স্পষ্ট কৰি দিছে দেৱব্ৰত শইকীয়াই ।

শইকীয়াই সদৰী কৰে যে, নিলম্বিত আৰক্ষী বিষয়া ভাৰ্গৱ বৰবৰাৰ বিৰুদ্ধে বহু অভিযোগ উত্থাপন হৈছে । সেইদিনা জ্ঞানদ্বীপ হাজৰিকা নামৰ এজন ছাত্ৰক সামাজিকভাৱে অপদস্থ কৰে আৰক্ষীৰ বিষয়াগৰাকীয়ে । প্ৰায়ে অসমত আৰক্ষীয়ে এইধৰণে আইন হাতত তুলি লয় । আৰক্ষীয়ে কেতিয়াও আইন হাতত তুলিব নালাগে । কিয়নো ইয়াৰ বাবে ন্যায় প্ৰক্ৰিয়া বা ন্যায়ালয় আছে বুলি উল্লেখ কৰে বিধানসভাৰ বিৰোধী দলপতি গৰাকীয়ে ।

তেওঁ কয় যে, ট্ৰেফিক অৱমাননা কৰিলে হয়তো ১০০০ পৰা ২০০০ টকা জৰিমান বিহা হয় । কিন্তু ছাত্ৰজনক আৰক্ষী বিষয়াগৰাকীলে যেনেধৰণে মানসিক আৰু শাৰীৰিক অত্যাচাৰ কৰিলে, যিটো এটা দুখজনক ঘটনা বুলি অভিহিত কৰে দেৱব্ৰত শইকীয়াই । ‘ পাণবজাৰ বা ফাঁচিবজাৰ দৰে এটা জনবহুল এলেকাত এই ধৰণৰ ঘটনা সংঘটিত হোৱাটো দুভাগ্যজনক । এইধৰণৰ ঘটনা একেজন বিষয়াই কৰি আহিছে ।’ এজাহাৰ দাখিল কৰা সন্দৰ্ভত মন্তব্য প্ৰকাশ কৰি এইদৰে কয় দেৱব্ৰত শইকীয়াই ।

ইয়াৰ সমান্তৰালভাৱে তেওঁ কয় যে, এই ঘটনাবোৰ এটা চিন্তাৰ বিষয় । কিয়নো অসমৰ বিভিন্ন অঞ্চলত আন আৰক্ষী বিষয়াসকলেও এই ধৰণৰ আচৰণ কৰিছে নেকি সেই কথাও চাবলগীয়া । গতিকে সামগ্ৰিকভাৱে এই বিষয়টো চাবলৈ অনুৰোধ জনোৱা হৈছে বুলি জানিবলৈ দিছে শইকীয়াই । তেওঁ কয় যে, আৰক্ষী বিষয়া বদলি বা পোষ্টিং কৰা সময়ত ক’ত পোষ্টিং দিব সেই কথা সূক্ষ্মভাৱে চাব লাগে ।

ইফালে নাজিৰাত দুই সাংবাদিকক আৰক্ষীয়ে অপদস্থ কৰাক লৈয়ো প্ৰতিক্ৰিয়া প্ৰকাশ কৰিছে দেৱব্ৰত শইকীয়াই । তেওঁ কয় যে, প্ৰেছ দিৱসৰ দিনা নাজিৰাৰ অএনজিচি কলনিলৈ যাবলৈ লোৱা দুজন সাংবাদিকক অসম আৰক্ষীয়ে অপদস্থ কৰাৰ উপৰিও তেওঁলোকক মাৰিবলৈ বন্দু উলিয়াই লৈছিল বুলি অভিযোগ উত্থাপন হৈছে । একেদৰে যোৰহাট জিলাত এগৰাকী মহিলাৰ সন্তানক এগৰাকী আৰক্ষীয়ে অশালীন ব্যৱহাৰ কৰাৰ অভিযোগ উত্থাপন হৈছে । এই সকলোবিলাক কথাও এজাহাৰত উল্লেখ কৰা হৈছে বুলি সদৰী কৰিছে দেৱব্ৰত শইকীয়াই । লগতে উচিত শাস্তিৰ ব্যৱস্থা গ্ৰহণ কৰিব বুলি আশা প্ৰকাশ কৰে দেব্ৰৱত শইকীয়াই ।