যোৱা ১০ বছৰত কিমান হ্ৰাস পালে ৰাজ্যৰ চৰকাৰী বিদ্যালয়ৰ সংখ্যা ?

ৰাজ্যখনত আচৰিত ধৰণে হ্ৰাস পাবলৈ ধৰিছে চৰকাৰী বিদ্যালয়ৰ সংখ্যা । এফালে যদি চৰকাৰী বিদ্যালয়ৰ সংখ্যা হ্ৰাস পাইছে আনফালে ব্যক্তিগত খণ্ডৰ বিদ্যালয়ৰ সংখ্যা অবিৰতভাৱে বৃদ্ধি পাই আছে । যোৱা ১০ বছৰত অসমত ৭৯১৯খন চৰকাৰী বিদ্যালয় হ্ৰাস পোৱাৰ বিপৰীতে ব্যক্তিগত খণ্ডৰ বিদ্যালয় ২১৭১খন বৃদ্ধি পাইছে ।

শিক্ষা মন্ত্ৰালয়ৰ ৰাজ্যিক মন্ত্ৰী জয়ন্ত চৌধুৰীয়ে লোকসভাত দিয়া এক প্ৰশ্ন উত্তৰৰ উদ্ধৃতি দি দ্যা চেণ্টিনেলে প্ৰকাশ কৰা এক প্ৰতিবেদন অনুসৰি, ২০১৪-১৫ চনৰ পৰা ২০২৩-২৪ চনলৈকে চৰকাৰী বিদ্যালয়ৰ সংখ্যা ৫২,৯২৭ৰ পৰা ৪৫,০০৮লৈ হ্ৰাস পোৱাৰ বিপৰীতে একে সময়ছোৱাত ব্যক্তিগত বিদ্যালয়ৰ সংখ্যা ৩,৫৫৪ৰ পৰা ৫,৭২৫লৈ বৃদ্ধি পাইছে ।

সংবাদ প্ৰতিষ্ঠানটোৰ প্ৰতিবেদনত এই কথাও উল্লেখ কৰা হৈছে যে, অসমৰ বৃহৎ সংখ্যক চৰকাৰী আৰু প্ৰাদেশিক বিদ্যালয় একত্ৰিকৰণ কৰিছিল ৰাজ্য চৰকাৰে । যাৰ ফলস্বৰূপে ইয়াৰ প্ৰভাৱ চৰকাৰী বিদ্য়ালয়ৰ সংখ্যাৰ ওপৰত পৰে । কেন্দ্ৰীয় মন্ত্ৰী জয়ন্ত চৌধুৰীয়ে লোকসভাত দিয়া উত্তৰত কয় যে, চৰকাৰী বিদ্যালয়ৰ তথ্য ইউনিফাইড ডিষ্ট্ৰিক্ট ইনফৰ্মেশ্যন চিষ্টেম ফৰ এডুকেচন প্লাছ (UDISE+) ব্যৱস্থাত সন্নিবিষ্ট কৰা হৈছে।

উল্লেখ্য যে, ৰাজ্যখনত মুঠ ৪৫০০৮খন চৰকাৰী বিদ্যালয় আছে । ইয়াৰ বিপৰীতে ৰাজ্যখনত থকা ব্যক্তিগত বিদ্যালয়ৰ মুঠ সংখ্যা হৈছে ৫৭২৫খন ।