২ লাখ ৫ হাজাৰ টকাত বিক্ৰী হৈছে এখন গামোচা! কি বিশেষত্ব আছে গামোচাখনৰ

গামোচা অসমীয়াৰ সন্মান। আপুনি দৈনন্দিন জীৱনত ব্যৱহাৰ কৰা ফুলাম গামোচাখন কিমান দামী? থলুৱা শিপিনীৰ দ্বাৰা তৈয়াৰ কৰা ফুলাম গামোচা ২ লাখ ৫ হেজাৰ টকাত বিক্ৰী হ’ব পাৰে নে ?

আপুনি হয়তো ভাবি আচৰিত হ’ব মঙ্গলদৈত এখন ফুলাম গামোচাৰ দাম ২ লাখ ৫ হেজাৰ হ’লগৈ। দৰঙৰ ডাঁহীত ফুলাম গামোচা এখনৰ দৰ উঠিল ২ লাখ ৫ হেজাৰ।

দৰঙৰ ডাঁহী অৰ্জুনতল শ্ৰীবিষ্ণু মন্দিৰত অসমীয়াৰ স্বভীমান ফুলাম থলুৱা গামোচা ২ লাখ ৫ হেজাৰ টকাত বিক্ৰী হৈছে। দেৱবস্ত্ৰ হিচাবে নামাংকৃত এই বিশেষ ফুলাম গামোচা খন মঙলদৈৰ টেঙাবাৰীৰ অভিযন্তা ৰাকেশ শৰ্মাই মাতৃ প্ৰয়াত মিনু দেৱীৰ নামত নিলামযোগে ক্ৰয় কৰে। এই বিষ্ণুমন্দিৰৰ জেঠমহীয়া বিষ্ণু হোমত প্ৰতি বছৰে দেৱবস্ত্ৰ নিলাম অনুষ্ঠিত কৰি আহিছে।

প্ৰকৃততে এখন ফুলাম গামোচা অধিবাসৰ দিনাৰে পৰা মন্দিৰত বিশেষ পূজা-অৰ্চনাৰে থাপনা থাপি দেৱবস্ত্ৰ হিচাবে ৰাইজৰ মাজত দ্বিতীয় দিনা নিলাম কৰা হয়। এই বিশেষ গামোচাখনে মন্দিৰত পূজাৰ পাছত বিশেষ গুণ অৰ্জন কৰা বুলি ৰাইজে বিশ্বাস কৰে আৰু নিলামত ক্ৰয় কৰিবলৈ হেতা-ওপৰা লগায়।