বটদ্ৰৱাত নৃশংস কাণ্ড! চেতনা নাশক দ্ৰব্য খুৱাই যুৱতীক ছুৰিকাঘাত যুৱকৰ

ৰাজ্যত আন এক ভয়ংকৰ ঘটনা। গুৱাহাটীৰ মৌচুমী, জুহি কাণ্ডৰ চাঞ্চল্য মাৰ নাযাওতেই আকৌ একে ঘটনাৰ পুনৰাবৃত্তি। বিল্লাল উদ্দিন নামৰ যুৱকজনৰ ছুৰিকাঘাতত আহত এগৰাকী যুৱতী। সম্প্ৰতি হাস্পতালৰ বিচনাত জীৱন-মৃত্যুৰে যুঁজ দি আছে যুৱতীগৰাকী। এইবাৰ নগাঁও জিলাৰ বটদ্ৰৱাৰ ভোমোৰাগুৰিত সংঘটিত হৈছে ছুৰিকাঘাতৰ ঘটনা।

ইফালে হাস্পতাল কৰ্তৃপক্ষই এই ভয়ংকৰ ঘটনা গাপ দিয়াৰ অভিযোগ উত্থাপিত হৈছে। ঘটনাৰ তদন্তত আৰক্ষীও ভূমিকা ৰহস্যজনক বুলি অভিযোগ উত্থাপন কৰিছে। ঘটনা সন্দৰ্ভত প্ৰথমে হয়বৰগাঁও আৰক্ষী চকীৰ কাষ চাপিছিল পৰিয়াল লোকে। কিন্তু হয়বৰগাঁৱৰ ভাৰপ্ৰাপ্ত বিষয়া আনন্দ মেধিয়ে সেয়া তেওঁৰ এলেকাৰ বাহিৰত বুলি কৈ গোচৰ ৰুজু কৰা নাছিল। ন্যায় বিচাৰি উপায়ন্তৰ হৈ নগাঁও আৰক্ষী অধীক্ষকৰ ওচৰত এখন এজাহাৰ দাখিল কৰে পৰিয়ালটোৱে।

অভিযোগ অনুসৰি বিল্লাল উদ্দিন নামৰ যুৱকজনে প্ৰেমৰ প্ৰস্তাৱৰ দিছিল আকলিমাক। কিন্তু আকলিমাই সেই প্ৰেমৰ প্ৰস্তাৱ নাকচ কৰে। যাৰ বাবেই বিল্লাল উদ্দিন এই ঘটনা সংঘটিত কৰাৰ সন্দেহ কৰা হৈছে। প্ৰথমে চেতনা নাশক দ্ৰব্য খোৱাই অচেতন কৰে। তাৰ পিছত যুৱতীগৰাকীৰ পেটত ছুৰিকাঘাত কৰে যুৱকজনে। জানিব পৰা মতে যুৱতীগৰাকী কৰ্মৰত অৱস্থাত ৩ বান্ধবীয়ে হাস্পতালৰ পৰা ওচৰৰ এখন হোটেললৈ মাতি নি চাওমিনৰ লগত চেতনা নাশক দ্ৰব্য খুৱাই। তাৰ পিছতে অচেতন হৈ পৰে যুৱতীগৰাকী। প্ৰেমৰ প্ৰস্তাৱ প্ৰত্যাখ্যান কৰাৰ বাবে যুৱতীক ছুৰিকাঘাতৰ অভিযোগ।

যুৱতীগৰাকী কৰ্মৰত হাস্পতালৰ পৰা ওলাই যোৱাৰ দৃশ্য বন্দী হৈছিল চিচি টিভি কেমেৰাত। তাৰ পিছতেই বটদ্ৰৱাৰ ভোমোৰাগুৰিত যুৱতীগৰাকীক মূমুৰ্ষূ অৱস্থাত উদ্ধাৰ কৰে বটদ্ৰৱা আৰক্ষীয়ে। যুৱতীগৰাকীৰ পেটত ছুৰীৰে আক্ৰমণ কৰি হাত ভৰি বান্ধি থোৱা অৱস্থাত উদ্ধাৰ কৰে আৰক্ষীয়ে। যুৱতীগৰাকীক উদ্ধাৰ কৰি চিকিৎসালয়ত ভৰ্তি কৰোৱা হয়।

জানিব পৰা মতে আক্ৰমণৰ বলি হোৱা যুৱতীগৰাকী নগাঁৱৰ এখন ব্যক্তিগত হাস্পতালত নাৰ্চ হিচাপে কৰ্মৰত। ইফালে ঘটনা সন্দৰ্ভত অব্যাহত আছে আৰক্ষীৰ তদন্ত। এই পৰ্যন্ত আৰক্ষীৰ জালত পৰা নাই অভিযুক্ত বিল্লাল উদ্দিন। আৰক্ষীৰ তদন্তৰ অন্ততহে ঘটনাৰ ৰহস্য পোহৰলৈ আহিব।

লগতে পঢ়ক: ২০২৫ৰ চৰকাৰী বন্ধৰ তালিকাত সাল-সলনি, অধিসূচনা জাৰি সাধাৰণ প্ৰশাসন বিভাগৰ