বৃদ্ধি হ’ব অসম চৰকাৰৰ কৰ্মচাৰীৰ দৰমহা, ৰাজ্যিক কেবিনেটত ডাঙৰ সিদ্ধান্ত

বৃদ্ধি হ'ব অসম চৰকাৰ কৰ্মচাৰীৰ দৰমহা

বিহুৰ প্ৰাকক্ষণত ৰাজ্য চৰকাৰৰ কৰ্মচাৰী আৰু পেঞ্চনাৰ সকলৰ বাবে ডাঙৰ খবৰ। বৃদ্ধি পালে অসম চৰকাৰ কৰ্মচাৰী আৰু পেঞ্চনাৰ  DA। কেবিনেটৰ অন্তত এই ঘোষণা মুখ্যমন্ত্ৰী ড০ হিমন্ত বিশ্ব শৰ্মাৰ। ৰাজ্যিক কৰ্মচাৰীৰ DAৰ বৃদ্ধিত অনুমোদন কেবিনেটৰ।

শুকুৰবাৰে অনুষ্ঠিত হৈছে অসম চৰকাৰৰ কেবিনেট বৈঠক। বৈঠকৰ অন্তত লোকসেৱা ভৱনত সংবাদমেল সম্বোধন কৰে মুখ্যমন্ত্ৰী ড০ হিমন্ত বিশ্ব শৰ্মাই। সংবাদমেলত কেবিনেটত লোৱা কেইবাটাও সিদ্ধান্তৰ কথা সদৰি কৰে মুখ্যমন্ত্ৰীয়ে। অসম চৰকাৰৰ অধীনৰ কৰ্মচাৰীসকলৰ বাবে ২ শতাংশ DA আৰু পেঞ্চনাৰসকলৰ বাবে ২ শতাংশ DR বৃদ্ধিৰ সিদ্ধান্ত গ্ৰহণ কৰা হয় কেবিনেটত। সংবাদমেলযোগে এই ঘোষণা মুখ্যমন্ত্ৰীৰ।

এই বৃদ্ধিৰ ফলত ৫৩ শতাংশৰ পৰা ৫৫ শতাংশ হ’ব অসম চৰকাৰৰ কৰ্মচাৰী আৰু পেঞ্চনাৰৰ DA আৰু DR । যাৰ ফলত বৃদ্ধি পাব অসম চৰকাৰৰ কৰ্মচাৰীসকলৰ  দৰমহা। ২০২৫ বৰ্ষৰ ১ জানুৱাৰীৰপৰা কাৰ্যকৰী হ’বঅসম চৰকাৰৰ কৰ্মচাৰীৰ এই মৰগীয়া বানচ বৃদ্ধি। অসম চৰকাৰৰ কৰ্মচাৰীয়ে এই বৰ্ধিত দৰমহা এপ্ৰিল মাহতেই অৰ্থাৎ ৰঙালী বিহুৰ পূৰ্বেই লাভ কৰিব বুলি সদৰি কৰে মুখ্যমন্ত্ৰী ড° হিমন্ত বিশ্ব শৰ্মাই।

উল্লেখ্য যে, ২০২৪ চনৰ জুলাই মাহত অন্তিমবাৰৰ বাবে DA বৃদ্ধি কৰা হৈছিল অসম চৰকাৰৰ কৰ্মচাৰীসকলৰ। ৫০ শতাংশৰ পৰা ৫৩ শতাংশ কৰা হৈছিল DA। নিয়ম অনুসৰি সপ্তম বেতন আয়োগৰ অধীনত কেন্দ্ৰীয় চৰকাৰৰ কৰ্মচাৰীৰ দৰে অসম চৰকাৰৰ কৰ্মচাৰীসকলৰো DA বছৰত দুবাৰ বৃদ্ধি হয়। চৰকাৰী কৰ্মচাৰীসকলক মুদ্ৰাস্ফীতিৰ পৰিস্থিতিৰ সৈতে খাপ খোৱাকৈ জীৱন-যাপনৰ নিশ্চিতি প্ৰদান কৰিবলৈ আৰ্থিক সুবিধা প্ৰদান কৰাই ইয়াৰ লক্ষ্য। কেন্দ্রীয় চৰকাৰৰ কৰ্মচাৰী আৰু পেঞ্চনাৰসকলৰ বাবেও ২ শতাংশ বৃদ্ধিৰে ডিয়াৰনেছ ৰিলিফত অনুমোদন জনোৱা হৈছে। এই বৃদ্ধি ২০২৫ চনৰ ১ জানুৱাৰীৰ পৰা কাৰ্যকৰী হোৱা বুলি বিবেচিত হ’ব। প্ৰধানমন্ত্ৰীৰ অধ্যক্ষতাত ২০২৫ চনৰ ২৮ মাৰ্চত অনুষ্ঠিত কেবিনেট বৈঠকত এই সিদ্ধান্ত গ্ৰহণ কৰা হৈছে।