Guwahati: গুৱাহাটীত ম’ৰেল পুলিচিং! নিৰ্মমভাৱে প্ৰহাৰ কৰি চকু ফুটাই দিলে কিশোৰৰ, অৱস্থা সংকটজনক…

গুৱাহাটী

পুৱাই গুৱাহাটী মহানগৰীত সংঘটিত এক জঘন্য ঘটনা। ৰাজ্যৰ বিভিন্ন প্ৰান্তত সংঘটিত অপৰাধজনিত ঘটনাৰ পাছতেই এইবাৰ গুৱাহাটী মহানগৰীৰ মাজ মজিয়াত সংঘটিত হৈছে ম’ৰেল পুলিচিঙৰ দৰে ঘটনা।  চুৰিৰ অভিযোগত এটা কিশোৰক বেয়াকৈ প্ৰহাৰ কৰিলে একাংশই। প্ৰথমে এজন, আৰু পাছত কেইবাজনোলোকে প্ৰহাৰ কৰে কিশোৰটিক। এই সমগ্ৰ ঘটনা এজনলোকে মোবাইলত আৱদ্ধ কৰি ৰাখে যাৰ পাছত ই ভাইৰেল হৈ পৰে। এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।

সোমবাৰে পুৱা গুৱাহাটীৰ কাহিলীপাৰাৰ জটিয়াৰ ৰাজপথত সংঘটিত হয় এক নাৰকীয় ঘটনা। আজি পুৱাৰ ভাগত হঠাতে জটিয়াৰ এখন দোকানৰ সন্মুখত হুলস্থুল লাগে। এজনলোকে এজন কিশোৰক নিষ্ঠুৰভাৱে প্ৰহাৰ কৰে। চুৰিৰ অভিযোগত এই কাণ্ড সংঘটিত কৰি লোকজনে কয় যে, “চুৰি কৰিবলৈ আহিছ হা, মাৰি পেলাম তোক আজি, চিনি পোৱা নাই”।

এই ঘটনাই সমগ্ৰ অঞ্চলটোত উত্তপ্ত পৰিস্থিতিৰ সৃষ্টি কৰে। পৰৱৰ্তী সময়ত এজন দুজনকৈ লোক আহি ঘটনাস্থলীত গোট খাই আৰু পাছত বিভিন্নজনে কিশোৰটিক গালি গালাজ কৰিবলৈ আৰম্ভ কৰে। কেৱল ইমানেই নহয়, ভিৰৰ মাজৰ পৰা একাংশই কিশোৰটিক দুই এটা চৰ সোধায়। এই সময়চোৱাত কিশোৰটিয়ে প্ৰাণ ভিক্ষা কৰি কান্দি কান্দি কয় যে, মোক এৰি দিয়ক ,আজিৰ পৰা আৰু এনে কাম নকৰো। কিন্তু, এই কথালৈ কাণ নি একাংশই কিশোৰটিক নিৰ্মমভাৱে প্ৰহাৰ কৰি থাকে।

অভিযোগ অনুসৰি, দোকানৰ পৰা এটা গাখীৰৰ পেকেট চুৰি কৰিছিল কিশোৰটিয়ে। কিন্তু গাখীৰ চুৰি কৰা কিশোৰটিক হাতে লোটে ধৰা পেলাই দোকানৰ গৰাকীয়ে। তাৰ পাছতেই তেওঁ  কিশোৰটিক নিৰ্মম নিৰ্যাতন চলাবলৈ আৰম্ভ কৰে। ভাইৰেল হোৱা ভিডিঅ’ত দেখিবলৈ পোৱা গৈছে যে প্ৰথমে দোকানৰ গৰাকীয়ে শিশুটিক মাটিত পেলাই লৈ গচকি গচকি প্ৰহাৰ কৰে। ইমানতেই ক্ষান্ত নাথাকি তেওঁ  কিশোৰটিক শিলৰ ওপৰত পেলাই মূৰত গচকি ধৰে আৰু পাছত লঠিয়াই নিৰ্মম অত্যাচাৰ চলায়। ইমানতেই সন্তুষ্ট নহয় দোকানৰগৰাকীয়ে বাইকৰ চাবিৰে কিশোৰটিৰ চকু ফুটাই দিয়ে। ইয়াৰ লগে লগে কিশোৰটিৰ মুখমণ্ডল তেজেৰে ৰাঙলী হৈ পৰে আৰু প্ৰাণৰ মমতাক চিঞৰিবলৈ আৰম্ভ কৰে। এই সময়চোৱাত আন একাংশলোকেও শিশুটিক প্ৰহাৰ কৰে।

অৱশ্যে ইমানৰ পাছতো শান্ত হোৱা নাছিল দোকানীজন। প্ৰহাৰ কৰিয়েই গৈছিল কিশোৰটিক। পৰৱৰ্তী সময়ত একাংশলোকে ঘটনা সন্দৰ্ভত ভগদত্তপুৰ আৰক্ষীক খবৰ দিয়ে। আৰক্ষী উপস্থিত হৈ কিশোৰটিক উদ্ধাৰ কৰি হাস্পাতাললৈ প্ৰেৰণ কৰে। জানিব পৰা মতে চিকিৎসালয়ত চিকিৎসাধীন হৈ থকা কিশোৰটিৰ অৱস্থা সংকটজনক। এই সমগ্ৰ ঘটনা সন্দৰ্ভত বৰ্তমান আৰক্ষীয়ে তদন্ত অব্যাহত ৰাখিছে। তদন্তৰ অন্ততহে জানিব পৰা যাব কিশোৰটিক প্ৰহাৰ কৰা লোকজনৰ বিৰুদ্ধে কি ব্যৱস্থা গ্ৰহণ কৰে আৰক্ষীয়ে।