গুৱাহাটী ম’ৰেল পুলিচিং! একাংশৰ প্ৰহাৰত সংকটজনক কিশোৰৰ অৱস্থা, আটক দুজন…

সোমবাৰে গুৱাহাটী মহানগৰীত সংঘটিত ম’ৰেল পুলিচিঙৰ ঘটনাই জোকাৰি গৈছে সমগ্ৰ অঞ্চল। আজি পুৱাৰ ভাগত গাখীৰ চুৰি কৰাৰ অভিযোগত একাংশলোকে অতি নিৰ্মমভাৱে প্ৰহাৰ কৰে এজন কিশোৰক। এই ঘটনা গুৰুতৰভাৱে আহত হৈ বৰ্তমান চিকিৎসাধীন হৈ আছে কিশোৰটি। জানিব পৰা মতে কিশোৰটিৰ অৱস্থা সংকটজনক। ইফালে ঘটনাৰ সবিশেষ পোহৰলৈ অহাৰ পাছতেই আৰক্ষীয়ে তদন্ত আৰম্ভ কৰি দুজন লোকক আটক কৰিছে। ঘটনাৰ দুই অভিযুক্ত হিমাংশু বৈশ্য আৰু জয়ন্ত তালুকদাৰত আটক কৰি আৰক্ষীয়ে জেৰা অব্যাহত ৰাখিছে।

আজি পুৱাৰ ভাগত গুৱাহাটী মহানগৰীৰ  কাহিলীপাৰাৰ জটিয়াৰ ৰাজপথত সংঘটিত হয় এক নাৰকীয় ঘটনা। দোকানৰ সন্মুখত এজনলোকে এজন কিশোৰক নিষ্ঠুৰভাৱে প্ৰহাৰ কৰে। চুৰিৰ অভিযোগত এই কাণ্ড সংঘটিত কৰি লোকজনে কয় যে, “চুৰি কৰিবলৈ আহিছ হা, মাৰি পেলাম তোক আজি, চিনি পোৱা নাই”। কেৱল এজনেই নহয়, কেইবাজনো লোকে কিশোৰটিক প্ৰহাৰ কৰে।

অভিযোগ অনুসৰি, দোকানৰ পৰা এটা গাখীৰৰ পেকেট চুৰি কৰিছিল কিশোৰটিয়ে। কিন্তু গাখীৰ চুৰি কৰা কিশোৰটিক হাতে লোটে ধৰা পেলাই দোকানৰ গৰাকীয়ে। তাৰ পাছতেই তেওঁ  কিশোৰটিক  নিষ্ঠুৰভাৱে  নিৰ্যাতন চলাবলৈ আৰম্ভ কৰে। এই সমগ্ৰ ঘটনাৰ ভিডিঅ’ ইতিমধ্যে ছ’চিয়েল মিডিয়াত ভাইৰেল হৈ পৰিছে য’ত কিশোৰটিক নিৰ্মমভাৱে প্ৰহাৰ কৰা দেখা গৈছে।

ভাইৰেল হোৱা ভিডিঅ’ত দেখিবলৈ পোৱা গৈছে যে প্ৰথমে দোকানৰ গৰাকীয়ে শিশুটিক মাটিত পেলাই লৈ গচকি গচকি প্ৰহাৰ কৰে। ইমানতেই ক্ষান্ত নাথাকি তেওঁ  কিশোৰটিক শিলৰ ওপৰত পেলাই মূৰত গচকি ধৰে আৰু পাছত লঠিয়াই নিৰ্মম অত্যাচাৰ চলায়। এই খিনিতো সন্তুষ্ট নহয় দোকানৰগৰাকীয়ে বাইকৰ চাবিৰে কিশোৰটিৰ চকু ফুটাই দিয়ে। ইয়াৰ লগে লগে কিশোৰটিৰ মুখমণ্ডল তেজেৰে ৰাঙলী হৈ পৰে আৰু প্ৰাণৰ মমতাক চিঞৰিবলৈ আৰম্ভ কৰে। এই সময়চোৱাত আন একাংশলোকেও কিশোৰটিক প্ৰহাৰ কৰে।

কিশোৰটিৰ কান্দোন শুনি নিৰ্দয়ভাৱে প্ৰহাৰ কৰি আসুৰিক তৃপ্তি লাভ কৰা লোকসকলৰ হৃদয় গলা নাছিল। তাৰ পাছত সেই সময়ত ঘটনাস্থলীত উপস্থিত থকা একাংশলোকে ভগদত্তপুৰ আৰক্ষীক খবৰ দিয়ে। আৰক্ষীয়ে ঘটনাস্থলীত উপস্থিত হৈ কিশোৰটিক উদ্ধাৰ কৰি হাস্পাতাললৈ প্ৰেৰণ কৰে। বৰ্তমান চিকিৎসা চলি আছে কিশোৰটিৰ।

এই ঘটনাৰ ভিডিঅ’ ইতিমধ্যে আৰক্ষীৰ হাতত পৰিছে। সেই ভিডিঅ’ ফুটেজৰ ভিত্তিত আৰক্ষীয়ে ঘটনা সন্দৰ্ভত তদন্ত অব্যাহত ৰাখিছে। এই ঘটনাত এতিয়ালৈকে ২ জনলোক আটক হৈছে যদিও পৰৱৰ্তী সময়ত অন্যলোকো গ্ৰেপ্তাৰ হোৱাৰ সম্ভাৱনা আছে। গতিকে তদন্তৰ অন্ততহে জানিব পৰা যে এই ঘটনাত আৰু কোন কোন জড়িত আছিল।