Magh Bihu 2025: কাইলৈ উৰুকা, পৰিয়ালৰ সৈতে মাঘ বিহু উদযাপন কৰিবলৈ ঘৰমুৱা হৈছে মহানগৰবাসী…

শীতৰ বোকোচাত উঠি আকৌ পালেহি হেঁপাহৰ ভোগালী । অসমীয়া সংস্কৃতিক সমৃদ্ধ কৰি ৰখা ভোগালী বিহুৰ মেজিৰ জুইৰ আশিস ল’বলৈ সাজু প্ৰতিজন অসমীয়া ।  এইবাৰ ১৩ জানুৱাৰীত মাঘ বিহুৰ উৰুকা আৰু ১৪ জানুৱাৰীত পালন কৰা হ’ব মেজি জ্বলোৱা পৰ্ব। ইয়াৰ ৰাজ্যজুৰি চলিছে ভোগৰ উৎসৱ ভোগালীক আদৰাৰ ব্যাপক প্ৰস্তুতি। আটকধুনীয়াকৈ নিৰ্মাণ কৰিছে ভেলাঘৰ। ইতিমধ্যে সম্পূৰ্ণ হৈ উঠিছে ভোগালীৰ প্ৰস্তুতি। আখলত ব্যস্ত হৈ পৰিছে অসমীয়া জীয়ৰী-বোৱাৰী। বিভিন্ন খাদ্য সম্ভাৰেৰে ভৰিছে ভোগালীৰ বজাৰ। উৰুকাৰ বজাৰ কৰিবলৈ ওলাই আহিছে সকলো।

কাইলৈ অসমীয়াৰ বাপতিসাহোন ভোগালী বিহুৰ উৰুকা। আমাৰ সংস্কৃতিত ভোগালী বিহুৰ উৰুকাৰ আছে বিশেষ মাদকতা৷ এইবাৰৰ মাঘৰ উৰুকালৈ মাজত মাত্ৰ এটা দিন বাকী৷ আমাৰ জনজীৱনত সেই দিনটোত একেলগ হৈ এসাঁজ খোৱাৰ পৰম্পৰাই সমৃদ্ধ কৰে অসমীয়াক৷  পুহত শালি ধান, মাহ, তিল, মগু, আদি শস্য চপাই মানুহে ভঁৰাল ভৰায়। এই সময়ত কৃষকসকলে খেতি চপাই ভঁৰাল উপচাই ৰাখে বাবে এই বিহু ভোগালী বিহু ৰূপে প্ৰচলিত। এই সময়ত ধনী-দুখীয়া সকলোৰে ঘৰত দুমুঠি ধান-চাউল খাবলৈ থাকে। সেই বাবে এই বিহুত খোৱা বোৱাৰ ওপৰত বেছি গুৰুত্ব দিয়া হয়। এই বিহুত সান্দহ, চিৰা, নানা ধৰণৰ পিঠা, লাডু, আখৈ, আদি মানুহৰ ঘৰে ঘৰে উপচি পৰে।

ইফালে বিহুৰ বাবে ঘৰলৈ যাবলৈ উথপথপ হৈছে অসমীয়াৰ মন৷ উৰুকা নিশা লগে-ভাগে এসাজ খাবলৈ সাজু হৈছে প্ৰতিগৰাকী অসমীয়া।  ইতিমধ্যে কৰ্মৰ তাগিদাত ঘৰৰ পৰা দূৰত থকা প্ৰায় প্ৰতিগৰাকী লোক হৈছে ঘৰমুৱা। মহানগৰীৰ পৰা উজনিৰ ঘৰলৈ ৰাওনা হৈছে বহু লোক৷  বাছৰ বাবে পুৱাৰে পৰা খানাপাৰাত অপেক্ষা কৰিছে যাত্ৰীয়ে। খানাপাৰাত উজনিমুৱাৰ  ব্যাপক ভিৰ কৰিছে যাত্ৰীৰ। হয়তো কাইলৈ জনশূন্য হৈ পৰিব মহানগৰীৰ ৰাজপথ। এয়াই যে ভোগালী আনন্দ।

কামসূত্ৰে মাহ মাহ ধৰি ঘৰ পৰা দূৰত থাকিব লগা হয়। কিন্তু ভোগালী বিহুৰ সময়ত নিজৰ ঘৰখনলৈ এপাক যাবলৈ অধীৰ আগ্ৰহেৰে ৰৈ থাকে অসমীয়া। আধুনিকতাৰ ধামখুমীয়াৰ পৰা আঁতৰি গাঁৱৰ নিভাজ পৰিৱেশৰ ভোগালীৰ আনন্দই যেন সূকীয়া। কোনেও যেন এই ক্ষণৰ আনন্দ হেৰুৱাব নিবিচাৰে। সেইবাৰে ঘণ্টা ঘণ্টা ধৰি অপেক্ষা কৰি হলেও ঘৰমুৱা হয় সকলো। সকলোৰে এটাই  আশা পৰিয়ালৰ সৈতে লগে-ভাগে এসাজ খাব। যাব শিক্ষাৰ্থীৰ পৰা আৰম্ভ কৰি বিভিন্ন কৰ্মত নিয়োজিত থকা লোকসকলে মহানগৰী এৰি ঢাপলি মেলিছে আপোন ঘৰখনলৈ বুলি।