Police firing: নিশা চুৰিৰ অভিযুক্তক লৈ অভিযানত গৈছিল আৰক্ষী; পলায়নৰ চেষ্টা কৰোঁতেই চলিল গুলী

প্ৰতীকী ছবি

ৰাজ্যত পুনৰ গুলীচালনাৰ ঘটনা । অভিযুক্তলৈ লক্ষ্য কৰি পুনৰ গুলী ফুটালে অসম আৰক্ষীয়ে । পুৱতি নিশা গৰজি উঠিল অসম আৰক্ষীৰ আগ্নেয়াস্ত্ৰই । মহানগৰীৰ যোৰাবাটত বশিষ্ঠ আৰক্ষীয়ে গুলী চলায় চুৰিৰ অভিযোগত অভিযুক্ত এজন ব্যক্তিলৈ । দিব্যজ্যোতি শইকীয়া নামৰ অভিযুক্তটোলৈ উদ্দেশ্যি বশিষ্ঠ আৰক্ষীয়ে গুলীচালনা কৰে । আৰক্ষীৰ গুলীত আহত হয় চোৰটো ।

উল্লেখ্যে যে, চুৰিৰ গোচৰত আটক কৰা দিব্যজ্যোতি শইকীয়াক লৈ নিশা অভিযান চলাবলৈ গৈছিল বশিষ্ঠ আৰক্ষী । যোৰাবাটত অভিযানকালতে আৰক্ষীক আক্ৰমণ কৰি পলাবলৈ চেষ্টা চলায় অভিযুক্ত দিব্যজ্যোতিয়ে । ফলত অভিযুক্তটোক ৰখাবলৈ আৰক্ষীয়ে গুলীচালনা কৰিবলৈ বাধ্য হয় । ভৰিত গুলী লগাৰ ফলত আঘাতপ্ৰাপ্ত হয় চোৰটো ।

ইফালে এই ঘটনাত আৰক্ষীৰ লোকো আঘাতপ্ৰাপ্ত হোৱা বুলি জানিব পৰা গৈছে । বৰ্তমান গুৱাহাটী চিকিৎসা মহাবিদ্যালয় হাস্পতালত চিকিৎসাধীন হৈ আছে দিব্যজ্যোতি শইকীয়া ।

জানিবপৰা মতে, নিশা আৰক্ষীয়ে আটক কৰিছিল দিব্যজ্যোতি শইকীয়াক । তাৰ পাছতে পুৱতি নিশা চোৰটোক লৈ অভিযান চলাবলৈ গৈছিল বশিষ্ঠ আৰক্ষীৰ এটা দল । কিন্তু যোৰাবাটত আৰক্ষীৰ জিম্মাৰ পৰা পলায়নৰ চেষ্টা চলায় অভিযুক্ত দিব্যজ্যোতিয়ে । ফলত আৰক্ষীৰ গুলীত গুলীবিদ্ধ হয় অভিযুক্তটো । কিছুদিন পূৰ্বেও আন এটা অভিযুক্ত আহত হৈছিল আৰক্ষীৰ গুলীত । ডকাইতিৰ অভিযোগত আটক কৰা অভিযুক্তটোকো পলায়নৰ চেষ্টা কৰোতেই গুলীয়াইছিল আৰক্ষীয়ে ।