আহিন মাহত অস্বাভাৱিক গৰমে দহিছে ৰাজ্যবাসীক, আজি পুৱা ৭.৩০ বজাৰ পৰা আৰম্ভ হৈছে বিদ্যালয়ৰ পাঠদান

প্ৰতীকী ফটো

প্ৰচণ্ড গৰমে দহিছে ৰাজ্যবাসীক । ছেপ্টেম্বৰ মাহ শেষ হ’বৰ হ’ল যদিও ৰাজ্যত গৰমৰ প্ৰকোপ এতিয়াও অব্য়াহত আছে । প্ৰচণ্ড গৰমৰ বাবে ৰাজ্যৰ কামৰূপ মহানগৰ আৰু কাছাৰ জিলাত বিদ্যালয়ৰ পাঠদানৰ সময় আজিৰে পৰা সলনি কৰা হৈছে । যোৱা শুকুৰবাৰে দুয়োখন জিলাৰ প্ৰশাসনে জাৰি নিৰ্দেশনাৰ অনুসৰি,আজিৰে পৰা দুয়োখন জিলাৰ সকলো বিদ্যালয়ত পুৱা ৭:৩০ বজাৰ পৰা পাঠদান আৰম্ভ হৈছে । পৰৱৰ্তী জাননী নিদিয়ালৈকে প্ৰশাসনে নিৰ্ধাৰণ কৰি দিয়া সময় মতেই বিদ্যালয়ৰ পাঠদান অব্যাহত থাকিব ।

আজিৰ পুৱাৰ ৭.৩০ বজাৰ পৰা দুয়োখন জিলাৰ বিদ্যালয়সমূহত পাঠদান আৰম্ভ হৈছে । ৰাজ্যৰ অস্বাভাৱিক গৰমৰ প্ৰকোপৰ ওপৰত গুৰুত্ব প্ৰদান কৰি দিনৰ ১২.৩০ বজালৈকে বিদ্যালয়ৰ পাঠদান চলিব বুলি জাননীখনত উল্লেখ কৰিছে প্ৰশাসনে । ইয়াৰ সমান্তৰালভাৱে এই নিৰ্দেশনা সকলো চৰকাৰী আৰু বে-চৰকাৰী শিক্ষানুষ্ঠান সমূহৰ ক্ষেত্ৰত প্ৰযোজ্য হ’ব ।

নিৰ্দেশনা অনুসৰি, বিদ্যালয়ৰ পুৱা প্ৰাৰ্থনা সভা শ্ৰেণীকোঠাৰ ভিতৰত অনুষ্ঠিত কৰিব লাগিব । ছাত্ৰ-ছাত্ৰীসকলে পৰ্যাপ্ত খোৱাপানীৰ সুবিধা লাভ কৰাটো নিশ্চিত কৰিব লাগিব আৰু পৰ্যাপ্ত পানীৰ সুবিধা প্ৰদান কৰিব লাগিব। ইয়াৰ উপৰিও ছাত্ৰ-ছাত্ৰীসকলক কোট বা টাই পিন্ধিব নালাগে বুলিও পৰামৰ্শ দিয়া হৈছে । লগতে বিদ্যালয়সমূহে নিশ্চিত কৰিব লাগিব যে সকলো শ্ৰেণীকোঠাত থকা ফেন কাৰ্যক্ষম, শ্ৰেণীকোঠাত ভালদৰে বায়ু চলাচল কৰা আৰু বিচ্ছিন্ন হ’লে বিকল্প বিদ্যুতৰ উৎস উপলব্ধ কৰা ওপৰত গুৰুত্ব প্ৰদান কৰা হৈছে ।

গুৱাহাটীৰ আঞ্চলিক বতৰ বিজ্ঞান কেন্দ্ৰৰ তথ্য অনুসৰি, শুকুৰবাৰে মহানগৰীৰ সৰ্বোচ্চ তাপমাত্ৰা ৩৮ ডিগ্ৰী চেলছিয়াছত ৰেকৰ্ড হৈছে । এই তাপমাত্ৰা এই সময়ৰ স্বাভাৱিক তাপমাত্ৰাতকৈ ৫.৬ ডিগ্ৰী বেছি আছিল । ইফালে সৰ্বনিম্ন তাপমাত্ৰা ২৭ ডিগ্ৰী চেলছিয়াছ ৰেকৰ্ড কৰা হৈছে। একেদৰে যোৱা শুকুৰবাৰৰ দিনটোত শিলচৰত সৰ্বোচ্চ উষ্ণতা ৩৮.২ ডিগ্ৰী চেলছিয়াছ ৰেকৰ্ড কৰাৰ বিপৰীতে সৰ্বনিম্ন ২৮.২ ডিগ্ৰী চেলছিয়াছ ৰেকৰ্ড কৰা হৈছে । সৰ্ব্বোচ্চ তাপমাত্ৰা স্বাভাৱিকতকৈ ৫ ডিগ্ৰী চেলছিয়াছ বেছি ।