পুনৰ গুৱাহাটীৰ মাজমজিয়াত চাঞ্চল্যকৰ হত্যাকাণ্ড…হানি-খুঁচি হত্যা এগৰাকী মহিলাক !

গুৱাহাটীত পুনৰ সংঘটিত হৈছে এক চাঞ্চল্যকৰ হত্যাকাণ্ড । সূত্ৰ খবৰ অনুসৰি, গুৱাহাটী মহানগৰীৰ ভাস্কৰ নগৰৰ ২ নং উপ পথত এগৰাকী মহিলাৰ মৃতদেহ উদ্ধাৰ হোৱাৰ পাছতে এই চাঞ্চল্যকৰ হত্যাকাণ্ড পোহৰলৈ আহে । জানিব পৰা মতে, ঘৰৰ সন্মুখতে উদ্ধাৰ কৰা হৈছে মহিলা গৰাকীৰ মৃতদেহ । ইতিমধ্যে ঘটনাস্থলীত স্থানীয় আৰক্ষীৰ এটা দল উপস্থিত হৈ প্ৰাথমিক অনুসন্ধান অব্যাহত ৰাখিছে বুলি জানিব পৰা গৈছে ।

উল্লেখ্য যে, শাহুৰেকৰ সৈতে হোৱাৰ কাজিয়াৰ পৰিণতিতে এই হত্যাকাণ্ড সংঘটিত হোৱা বুলি সন্দেহ প্ৰকাশ কৰিছে স্থানীয় লোকে । সূত্ৰই সদৰী কৰা মতে, হত্যাৰ বলি হোৱা মহিলাৰ গৰাকীৰ নাম হৈছে নাজমা খাতুন । নাজমাৰ স্বামী কৰ্মসূত্ৰে বাহিৰত থাকে বুলি সদৰী কৰিছে স্থানীয় লোকে । স্থানীয় সূত্ৰই সদৰী কৰা মতে, নিজ শাহুৰেকৰ সৈতে নাজমা খাতুনৰ পাৰিবাৰিক কিছু কথাত কাজিয়া হৈছিল । এই সংঘাতৰ ফলতে নাজমা খাতুন নামৰ মহিলা গৰাকীক হত্যা কৰা বুলি সন্দেহ প্ৰকাশ কৰা হৈছে ।

সূত্ৰই উল্লেখ কৰিছে যে, মহিলাগৰাকীৰ মৃতদেহত স্পষ্টভাৱে আঘাতৰ চিন দেখা গৈছে । ইতিমধ্যে আৰক্ষীয়ে এই ঘটনাৰ সন্দৰ্ভত প্ৰাৰম্ভিক তদন্ত আৰম্ভ কৰিছে । এই ঘটনাৰ সন্দৰ্ভত আৰক্ষীয়ে কয় যে, ‘এই ঘটনাৰ সন্দৰ্ভত এতিয়াই কোনো কথা স্পষ্টকৈ ক’ব নোৱাৰি । আমি তদন্ত আৰম্ভ কৰিছো ।’ ইয়াৰ লগতে চোকা অস্ত্ৰৰে মহিলা গৰাকীক আক্ৰমণ কৰি হত্যা কৰা বুলি সন্দেহ প্ৰকাশ কৰিছে আৰক্ষীয়ে । জো ৰোডৰ ভাস্কৰ নগৰত সংঘটিত হৈছে এই হত্যাকাণ্ড ।

ইফালে আজি গুৱাহাটী মহানগৰীত সংঘটিত আন এটা ম’ৰেল পুলিচিঙৰ ঘটনাই জোকাৰি যায় সমগ্ৰ ৰাজ্য। সোমবাৰৰ পুৱাৰ ভাগতে গাখীৰ চুৰি কৰাৰ অভিযোগত একাংশলোকে অতি নিৰ্মমভাৱে এজন কিশোৰক প্ৰহাৰ কৰাৰ খবৰ লাভ কৰা গৈছিল । এই ঘটনাত গুৰুতৰভাৱে আহত হোৱা কিশোৰটি বৰ্তমান চিকিৎসাধীন হৈ আছে বুলি জানিব পৰা গৈছে  ।

কাহিলীপাৰাৰ জটিয়াৰ ৰাজপথত সংঘটিত এই ঘটনাৰ দুই অভিযুক্ত হিমাংশু বৈশ্য আৰু জয়ন্ত তালুকদাৰত নামৰ দুজনক আটক কৰি আৰক্ষীয়ে জেৰা অব্যাহত ৰাখিছে । সূত্ৰৰ খবৰ অনুসৰি, কিশোৰটিয়ে এখন দোকানৰ পৰা এটা গাখীৰৰ পেকেট চুৰি কৰাৰ অভিযোগ উত্থাপন হৈছিল । কিন্তু কিশোৰটিক হাতে লোটে ধৰা পেলাই দোকানৰ গৰাকীয়ে। তাৰ পাছতেই কিশোৰটিক নিৰ্মমভাৱে প্ৰহাৰ কৰে দোকানখনৰ গৰাকীয়ে । এই সমগ্ৰ ঘটনাৰ ভিডিঅ’ ইতিমধ্যে সামাজিক মাধ্যমত ভাইৰেল হৈ পৰিছে ।