দীপাৱলীৰ নিশা মহানগৰীত ভয়ংকৰ পথ দুৰ্ঘটনা! থিতাতে নিহত যুৱক-যুৱতী

দীপাৱলীৰ নিশা মহানগৰীত দুৰ্ঘটনাত দুগৰাকীৰ মৃত্যু৷ খানাপাৰাত দুখনকৈ স্ক’ৰপিঅ’ বাহনৰ মাজত মুখামুখি সংঘৰ্ষৰ ফলত সংঘটিত হয় এই দুৰ্ঘটনা ৷ অতি ভয়াৱহ দুৰ্ঘটনাটোত থিতাতে নিহত যুৱক-যুৱতী৷ দুৰ্ঘটনাগ্ৰস্ত দুখন স্ক’ৰপিঅ’ৰ এখনৰ নাছিল নম্বৰপ্লেট৷ দুৰ্ঘটনাত গুৰুতৰভাৱে আহত আন এগৰাকী যুৱতী। গুৰুতৰভাৱে আহত চালকসহ আনগৰাকী যুৱতীক GMCHত ভৰ্তি।

হোটেল ভিভাণ্টাৰ সন্মুখৰ ফুটব্ৰীজৰ তলত সংঘটিত হয় এই দুৰ্ঘটনা।  এখন ক’লা আৰু এখন বগা ৰঙৰ স্ক’ৰপিঅ’ৰ মাজত সংঘৰ্ষ হয়। ৰেলিং ভাঙি ফুটব্ৰীজৰ ওপৰলৈ উঠি গৈছিল ক’লা স্কৰপিঅ’খন। ফুটব্ৰীজৰ ওপৰত খুন্দা মাৰি পুনৰ তলত পৰে বাহনখন। মাত্ৰ তিনিদিন পূৰ্বে ক্ৰয় কৰিছিল ক’লা ৰঙৰ স্কৰপিঅ’খন। খানাপাৰাৰ দিশৰ পৰা আহিছিল ক’লা ৰঙৰ স্কৰপিঅ’খন।দুৰ্ঘটনাটোত যুৱক-যুৱতী নিহত হোৱাৰ লগতে হাস্পতালত মৃত্যুৰে যুঁজি আছে আনগৰাকী যুৱতী।

দীপাৱলীৰ নিশা বাৰৰ পৰা ওলাই আহিছিল ক’লা স্কৰপিঅ’খনত থকা তিনি যুৱক-যুৱতী। তিনি যুৱক-যুৱতীৰ হাতত আছিল বাৰৰ এণ্ট্ৰী টেগ। ইউ-টাৰ্ণ লোৱাৰ সময়তে নিয়ন্ত্ৰণ হেৰুৱাই আনখন বাহনত প্ৰচণ্ড খুন্দা মাৰে স্কৰপিঅ’খনে। দ্ৰুতবেগী স্কৰপিঅ’ৰ খুন্দাত ভাঙি চূৰমাৰ হয় খানাপাৰাৰ ফুটব্ৰীজ। ক’লা স্কৰপিঅ’খনত আছিল দুগৰাকী যুৱতীসহ এজন যুৱক। স্কৰপিঅ’খনত থকা দুই যুৱক-যুৱতীৰ থিতাতে মৃত্যু হয়। বাহনখনত থকা আন এগৰাকী যুৱতী আহত হয়। গুৰুতৰভাৱে আহত যুৱতীগৰাকীক সংকটজনক অৱস্থাত GMCHত ভৰ্তি কৰোৱা হৈছে।

দুৰ্ঘটনাগ্ৰস্ত বগা ৰঙৰ স্কৰপিঅ’খনৰ নম্বৰ AS01EG0820। গুৰুতৰভাৱে আহত বগা ৰঙৰ স্কৰপিঅ’খনৰ চালকজনো গুৱাহাটী চিকিৎসা মহাবিদ্যালয় হাস্পতালত ভৰ্তি কৰোৱা হৈছে। উদ্ধাৰ হৈছে দুৰ্ঘটনাত নিহত দুই যুৱক-যুৱতীৰ পৰিচয়। নিহত যুৱতীগৰাকীৰ নাম কনামিকা নাৰ্জাৰী। কনামিকাৰ ঘৰ কোকৰাঝাৰৰ ঝাড়াগুৰিত। গুৱাহাটীৰ ছয়মাইলত থাকে নিহত কনামিকা নাৰ্জাৰী। নিহত যুৱকজনৰ নাম দীপিত দে’। খ্ৰীষ্টানবস্তিৰ শ্ৰীনগৰত ঘৰ দীপিতৰ। প্ৰাপ্ত খবৰ অনুসৰি গুৱাহাটীত কোচিং কৰি আছিল নিহত কনামিকাই।

আনফালে দুৰ্ঘটনাত আহত যুৱতীগৰাকীৰ নাম নেহা বসুমতাৰী। মৃত্যু হোৱা কনামিকাৰ বয়স ১৯ বছৰ আৰু দীপিত দে’ৰ নাম ২২ বছৰ। দীপাৱলীৰ দিনটোতে ঘটা এই দুৰ্ঘটনাই শোকাহত কৰি তুলিছে সকলোকে।