মৰিগাঁৱত শোকাৱহ ঘটনা! ঈদ খাবলৈ গৈ প্ৰাণ হেৰুৱালে ৩ বন্ধুৱে

অসহনীয়, বেদনাদায়ক, হৃদয়বিদাৰক। ক’বলৈ যেন ভাষাৰ অভাৱ। ঈদৰ দিনটোতে ৰাজ্যত সংঘটিত এক শোকাৱহ দুৰ্ঘটনাই ম্লান পেলালে সকলো আনন্দ। ইফালে যদি উৎসৱৰ আনন্দ আনফালে কান্দোনৰ ৰোল। নিয়তিয়ে কাৰ ভাগ্যত কি লিখিছে কোনেনো জানে? বাকী সকলো মাথোঁ নিৰব দৰ্শক। ঈদ খাবলৈ আনন্দ মনেৰে গৈছিল, কিন্তু ঘূৰি আহিল নিথৰ দেহ হৈ। ঈদ-উল-ফিতৰৰ আনন্দ উল্লাসৰ মাজতেই মৰিগাঁৱত নিশা বলেৰ’ আৰু মটৰচাইকেলৰ মুখামুখি সংঘৰ্ষত প্ৰাণ হেৰুৱালে আটাইকেইজনে।

এখন গাঁৱত এতিয়া কান্দোনৰ ৰোল। সমনীয়াৰ ঘৰত ঈদ খাবলৈ গৈ ঘূৰি নাহিল তিনি বন্ধু। । মৰিগাঁৱৰ সোণাৰিগাঁৱত নিশা সংঘটিত ভয়ংকৰ দুৰ্ঘটনাত অকাল মৃত্যুক সাৱটিলে ছাবিদ, ছাজিদুল আৰু দ্বীপমনি। শোকাৱহ ঘটনাটোক লৈ অঞ্চলজুৰি পৰিছে শোকৰ ছাঁ। জানিব পৰা মতে মৰিগাঁও-নগাঁও ৰাজ্যিক ঘাইপথৰ সোণিৰিগাঁৱত সংঘটিত ভয়ংকৰ পথ দুৰ্ঘটনাটো। দুজন যুৱক থিতাতে নিহত হোৱাৰ লগতে আন এজনৰ গুৱাহাটী মেডিকেল কলেজ হাস্পতালত মৃত্যু হয়।

প্ৰাপ্ত তথ্য অনুসৰি ঈদ খাবলৈ গৈছিল মৰিমুছলমান গাৱঁৰ তিনি বন্ধুয়ে। ঈদ খাই নিজ ঘৰলৈ বুলি বাইকেৰে ঘৰলৈ আহিছিল একেলগে। সেই সময়তে মৰিগাঁও নগৰৰ সোণাৰিগাঁৱত একে দিশৰ পৰা অচিনাক্ত বাহনে মটৰ চাইকলখনক মহটিয়াই নিয়ে। দুৰ্ঘটনাত পতিত বাইকখনৰ নম্বৰ আছিল AS01-FL-5689। দুৰ্ঘটনাটো সংঘটিত হোৱাৰ লগে লগে  থিতাতে নিহত হয় দুজনকৈ যুৱক। ঘটনাস্থলীতে দুজন বাইক আৰোহী দ্বীপমনি আৰু চাবিদ আলীৰ। আন এজনক সংকটজনক অৱস্থাত মৰিগাঁও অসামৰিক চিকিৎসালয়ত ভৰ্তি কৰোৱা হয়।

কিন্তু চিকিৎসকে উন্নত চিকিৎসাৰ বাবে গুৱাহাটী মেডিকেল কলেজ হাস্পতাললৈ প্ৰেৰণ কৰে চাজিদুল ইছলাম নামৰ যুৱকজনক । অৱশেষত গুৱাহাটী মেডিকেল কলেজ হাস্পতালত চিকিৎসাধীন অৱস্থাতে চাজিদুল ইছলাম নামৰ যুৱকজনৰো মৃত্যু হয়। এই ঘটনাই এতিয়া শোকস্তব্ধ কৰি তুলিছে মৰিমুছলমান গাৱঁৰ লগতে সমগ্ৰ ৰাজ্যবাসীক।

ইফালে বাইকখনত খুন্দিয়াই পলায়ন কৰে অচিনাক্ত বাহনখনে। বৰ্তমানেও দুৰ্ঘটনা সংঘটিত কৰা বাহনখন আৰু গৰাকীৰ পৰিচয় উদ্ধাৰ কৰিবলৈ সক্ষম হোৱা নাই আৰক্ষী। অব্যাহত আছে তদন্ত।