শোকাৱহ! শ্রীভূমিত কৰ্তব্যৰত অৱস্থাতে মহটিয়াই নিলে ট্রাকে, থিতাতে নিহত আৰক্ষী কনিষ্টবল

ৰাজ্যত অব্যাহত আছে ট্ৰাকৰ দৌৰাত্ম। যাৰ বাবে নিতৌ সংঘটিত হৈ আহিছে ভয়ংকৰ ঘটনা। শ্রীভূমি জিলাত সংঘটিত হৈছে এক শোকাৱহ ঘটনা। তালাচীৰ সময়তে কৰ্তব্যৰত আৰক্ষীক মহটিয়াই নিলে ট্রাকে। ট্ৰাকৰ খুন্দাত থিতাতে মৃত্যু আৰক্ষী কনিষ্টবল উজ্জ্বল বৰাৰ। দুৰ্ঘটনাত সামান্য পৰিমাণে আহত হৈছে OC।

ঘটনা অনুসৰি শ্রীভূমিৰ অসম-ত্ৰিপুৰা সীমান্তৰ চুৰাইবাবাড়ীত নিজৰ কৰ্তব্য সম্পাদন কৰি আছিল আৰক্ষী কনিষ্টবল উজ্জ্বল বৰাই। তালাচীৰ সময়তে এখন ট্ৰাকে আৰক্ষী কনিষ্টবলগৰাকীৰ খুন্দা মাৰি পলায়ন কৰে। খবৰ অনুসৰি দুৰ্ঘটনাত পতিত হৈছে OCৰ বাহন। ট্রাকখন খেদি যাওঁতে দুৰ্ঘটনাত পতিত ৰাতাবাৰী আৰক্ষী থানাৰ OCৰ বাহন। দুৰ্ঘটনাত সামান্য পৰিমাণে আহত হৈছে OC বিমল চেত্রী। এই ঘটনাক কেন্দ্ৰ কৰি অঞ্চলটোত সৃষ্টি হৈছে উত্তপ্ত পৰিৱেশৰ।

ইফালে দুর্ঘটনা সংঘটিত কৰা ট্রাকখনত আছিল নিচাজাতীয় সামগ্ৰী। দুর্ঘটনা সংঘটিত কৰা ট্ৰাকখনৰ নম্বৰ TR 01 AU 1672। কনিষ্টবলগৰাকীক খুন্দা মাৰি পলায়ন কৰে ট্ৰাকখনে। দুল্লভছড়া নিভিয়া ঘাইপথত দুৰ্ঘটনাত পতিত হয় ট্ৰাকখন। তাৰ পাছতে ড্ৰাগছসহ গ্ৰেপ্তাৰ কৰা হয় ট্রাকৰ চালক-হেণ্ডিমেনক। চালক অভিজিত আৰু হেণ্ডিমেন গিয়াছুদ্দিনক গ্ৰেপ্তাৰ কৰে আৰক্ষীয়ে। চালক অভিজিতৰ ঘৰ ত্ৰিপুৰাত বুলি জানিব পৰা গৈছে।

এই ঘটনাই এতিয়া চাঞ্চল্য সৃষ্টি কৰিছে ৰাজ্যখনত। বৰ্তমান শ্রীভূমিৰ হাস্পতালৰ মৰ্গত ৰখা হৈছে উজ্জ্বল বৰাৰ মৃতদেহ। ঘটনা সন্দৰ্ভত তদন্ত অব্যাহত ৰাখিছে শ্রীভূমি আৰক্ষীয়ে। কিহৰ বাবে ট্রাকখনে আৰক্ষী কনিষ্টবলগৰাকীক মহটিয়াই নিলে সেয়া এতিয়ালৈ ৰহস্যৰ আৱৰ্তত। ট্রাকখনত নিচাজাতীয় সামগ্ৰী থকাৰ বাবেই কনিষ্টবলগৰাকীক খুন্দা মাৰি পলায়ন কৰিব বিচাৰিছিল নেকি ট্রাকখনৰ চালক-হেণ্ডিমেনে?  নে আন কিবা কাৰণ? আৰক্ষীৰ তদন্তত হে পোহৰলৈ আহিব সত্যতা।

ইফালে বাঘবৰত ট্ৰেক্টৰৰ খুন্দাত প্ৰাণ গ’ল ১২ বছৰীয়া কণমানিৰ। চাইকেলেৰে গাখীৰ বিক্ৰী কৰি ঘৰলৈ ওভতাৰ সময়তে শোকাৱহ পথ দুৰ্ঘটনাটো সংঘটিত হয়। এই ঘটনাক কেন্দ্ৰ কৰি অঞ্চলটোত সৃষ্টি হৈছে উত্তপ্ত পৰিৱেশৰ। ট্ৰেক্টৰখন জ্বলাই দিয়া  হুংকাৰ ৰাইজৰ।