পুনৰ জনতাৰ মূৰত মাধমাৰ! ঔষধৰ পাছত এইবাৰ বৃদ্ধি হ’ল টোল কৰ

মঙলবাৰে মাজনিশাৰ পৰা বাঢ়িল টোল গেটৰ কৰ। হিচাপ কৰি চালে,  পূৰ্বে সোণাপুৰৰ নাজিৰাখাট টোলগেটত লঘু ব্যক্তিগত বাহনত লৈছিল ১৪০ টকা। এতিয়াৰে পৰা তাৰ ঠাইত দিব লাগিব ১৪৫ টকা। পূৰ্বৰ লঘু ব্যক্তিগত বাহনৰ অহা যোৱাৰ বাবদ ২০৪ টকাৰ সলনি দিব লাগিব ২১৫ টকা। একেদৰে লঘু বাণিজ্যিক বাহনে ২২০ টকাৰ ঠাইত দিব লাগিব ২৩০ টকা। এদিনত অহা যোৱাৰ নামত পূৰ্বে লৈছিল ৩৩৫ টকা কিন্তু এতিয়া হ’লগৈ ৩৪৫ টকা। পূৰ্বে বাছ-ট্রাকৰ বাবে টোলগেট দিব লাগিছিল ৪৬৫ টকা, এতিয়া দিব লাগিব ৪৮০  টকা।

নগাঁওৰ ৰহা টোলগেটত পূৰ্বে লঘু ব্যক্তিগত বাহন, কাৰৰ (একেদিনাই ঘূৰি আহিলে) বাবে দিব লাগিছিল ১৭৫ টকা, সেই ঠাইত এতিয়া দিব লাগিব ১৮৫ টকা। লঘু বাণিজ্যিক বাহন, মিনি বাছৰ পূৰ্বৰ নিৰিখ আছিল ৪০০ টকা, এতিয়া হ’লগৈ ৪১০ টকা। বাছ-ট্রাকৰ বাবে আগতে দিব লাগিছিল ১৯০ টকা , এতিয়া লাগিব ১৯৫ টকা।  বাণিজ্যিক বাহন (থ্রী এক্সেলছ)ৰ বাবে পূৰ্বে লৈছিল ৪৩৫ টকা আৰু এতিয়া ভৰিব লাগিব ৪৫০ টকা।

ইয়াৰ মাজতে অসমত পুনৰ তিনিখনকৈ টোলগেট মুকলি কৰাৰ বাবে সিদ্ধান্ত গ্ৰহণ কৰিছে কেন্দ্ৰীয় চৰকাৰে । ৰাষ্ট্ৰীয় ঘাইপথ প্ৰাধিকৰণৰ গুৱাহাটীস্থ আঞ্চলিক কাৰ্যালয়ৰ এগৰাকী কাৰ্যবাহী বিষয়াই সদৰী কৰা অনুসৰি ৰাজ্যখনত স্থাপন কৰিবলগীয়া প্ৰস্তাৱিত টোলগেটসমূহ মুকলি কৰাৰ বাবে চলাই থকা হৈছে প্ৰস্তুতি । জনোৱা অনুসৰি শীঘ্ৰেই মুকলি কৰা হ’ব কলিয়াবৰ আৰু তেজপুৰৰ মাজত চুলুঙত, দেৰগাঁৱৰ সমীপৰ ৰঙামাটিত আৰু বিশ্বনাথ চাৰিআলিৰ সমীপৰ মোনাবাৰীত টোলগেট । এই তিনিওখন টোলগেটৰ নিৰ্মাণ সম্পূৰ্ণ হোৱাৰ পাছত ৰাষ্ট্ৰীয় ঘাইপথ প্ৰাধিকৰণে শীঘ্ৰে কাৰ্যকৰী কৰাৰ বাবে যাৱতীয় প্ৰক্ৰিয়া আৰম্ভ কৰিছে ।