Pobitora Wildlife Sanctuary : বন্যপ্ৰাণীৰ সুৰক্ষাৰ স্বাৰ্থত কাম কৰা ২৫ টা গাঁওৰক্ষী বাহিনীক প্ৰদান কৰা হ’ল ফিল্ড গিয়াৰ…

পবিতৰা বন্যপ্ৰাণী অভয়াৰণ্যৰ এশিঙীয়া গঁড়কে ধৰি বন্যপ্ৰাণীৰ সুৰক্ষাৰ ক্ষেত্ৰত অতি গুৰুত্বপূৰ্ণ ভূমিকা গ্ৰহণ কৰি আহিছে গাঁওৰক্ষী বাহিনীয়ে । উল্লেখ্য যে, বন্যপ্ৰাণীৰ সুৰক্ষাৰ ক্ষেত্ৰত গুৰুত্বপূৰ্ণ পদক্ষেপ গ্ৰহণ কৰাৰ বাবে শনিবাৰে গাঁওৰক্ষী বাহিনীৰ সদস্যসকলক অত্যাৱশ্যকীয় ক্ষেত্ৰৰ সামগ্ৰী প্ৰদান কৰা হয় । এই সামগ্ৰীসমূহ প্ৰদান কৰে আৰক্ষী আৰু অসমৰ মৰিগাঁও জিলাৰ এটা জৈৱ বৈচিত্ৰ্য সংস্থাই ।

শনিবাৰে প্ৰকাশ কৰা এক প্ৰেছ বিজ্ঞপ্তি অনুসৰি, শেহতীয়াকৈ মায়ং থানাত অনুষ্ঠিত এক কাৰ্যসূচীত ২৫ টা গাঁওৰক্ষী বাহিনীৰ ৫০ জন সদস্যক অত্যাৱশ্যকীয় ফিল্ড গিয়াৰ – টৰ্চ আৰু ৰেইনকোট আদি প্ৰদান কৰা হয় । বন্যপ্ৰাণী সুৰক্ষা আৰু নিৰীক্ষণৰ ক্ষেত্ৰত তেওঁলোকৰ প্ৰচেষ্টা বৃদ্ধিৰ বাবে বিশেষকৈ পবিতৰা বন্যপ্ৰাণী অভয়াৰণ্যৰ এশিঙীয়া গঁড় সুৰক্ষাৰ বাবে অত্যাৱশ্যকীয় ফিল্ড গিয়াৰ যোগান ধৰা হৈছে বুলি জিলা আৰক্ষী অধীক্ষক হেমন্ত কুমাৰ দাসে জানিবলৈ দিয়ে।

মৰিগাঁও জিলা আৰক্ষীৰ সহযোগত আৰু ডেভিড শ্বেফাৰ্ড বন্যপ্ৰাণী ফাউণ্ডেশ্যনৰ সহযোগত জৈৱ বৈচিত্ৰ্য সংৰক্ষণ সংস্থা আৰণ্যকে এই কাৰ্যসূচী আয়োজন কৰিছিল । এই কাৰ্যসূচীৰ সন্দৰ্ভত অতিৰিক্ত আৰক্ষী অধীক্ষক ধ্ৰুবজ্যোতি নাথে জানিবলৈ দিয়ে যে, মানুহ আৰু বন্যপ্ৰাণীৰ সংঘাত আৰু চোৰাং চিকাৰৰ সৈতে জড়িত প্ৰত্যাহ্বানসমূহ মোকাবিলা কৰাৰ লক্ষ্যৰে এই পদক্ষেপ লোৱা হৈছিল ।

অনুষ্ঠানটোত গাঁওৰক্ষী বাহিনীৰ সদস্যসকলে মৰিগাঁও জিলাখনৰ মায়ং অঞ্চলত বন্যপ্ৰাণী সম্পৰ্কীয় সংঘাতৰ সৈতে মোকাবিলা কৰাৰ অভিজ্ঞতা ভাগ-বতৰা কৰে । উল্লেখ্য যে, শেহতীয়াকৈ মায়ং অঞ্চলত পবিতৰা বন্যপ্ৰাণীৰ অভয়াৰণ্যৰ পৰা ওলাই অহা এটা গঁড়ৰ আক্ৰমণত এজন লোকৰ মৃত্যু হৈছিল । ইফালে জীৱ-জন্তুৰ আচৰণ বুজি সতৰ্কতামূলক ব্যৱস্থা গ্ৰহণ কৰি এনে সংঘাত হ্ৰাস কৰাৰ কৌশল সম্পৰ্কেও আলোচনা কৰে জিলা আৰক্ষী অধীক্ষকগৰাকীয়ে।

এই অনুষ্ঠানত আৰণ্যকৰ সাধাৰণ সম্পাদক বিভৱ কুমাৰ তালুকদাৰে আঙুলিয়াই দিয়ে যে, ভিডিপিৰ সদস্যসকলৰ সতৰ্কতাই নিশ্চিত কৰিছে যে বিগত আঠ বছৰত পবিতৰা বন্যপ্ৰাণী অভয়াৰণ্যত কোনো ধৰণৰ চোৰাং চিকাৰৰ ঘটনা সংঘটিত হোৱা নাই।