গুৱাহাটীত উদ্ধাৰ যুৱতীৰ মৃতদেহ! মহানগৰীত নিজা ঘৰ থকাৰ পাছতো কিয় আছিল ভাড়াঘৰত?

ৰাজ্যত প্ৰতিদিনে বৃদ্ধি পাইছে অপৰাধমূলক ঘটনা। অপহৰণ, হত্যা, লুণ্ঠন আদিৰ ঘটনা যেন প্ৰতিদিনে সংঘটিত হয়। ইয়াৰ মাজতে গুৱাহাটী মহানগৰীৰ পৰা পোহৰলৈ আহিছে এক ভয়ংকৰ ঘটনা। নৱবৰ্ষৰ প্ৰথম দিনটোতে গুৱাহাটীৰ এটা ভাড়াঘৰত উদ্ধাৰ হয় এগৰাকী যুৱতীৰ মৃতদেহ। মহানগৰীৰ চানমাৰীস্থিত এটা ঘৰত মৃতদেহটো উদ্ধাৰ হয়। মৃতদেহটো পায়েল শইকীয়া নামৰ এগৰাকী যুৱতীৰ বুলি চিনাক্ত হৈছে।  যুৱতীগৰাকীৰ মৃতদেহ উদ্ধাৰৰ পাছতেই সমগ্ৰ অঞ্চলটোত তীব্ৰ চাঞ্চল্যৰ সৃষ্টি হয়।

জানিব পৰা মতে পায়েল শইকীয়া নামৰ যুৱতীগৰাকীৰ ঘৰ গুৱাহাটীৰ ছাত্ৰীবাৰীত। কিন্তু বান্ধৱীৰ সৈতে তেওঁ চানমাৰীৰ ‘ব্লু বেল ৰেঙণি- দয়া সাগৰ’ নামৰ এটা এপাৰ্টমেন্টৰৰ চতুৰ্থ মহলাৰ H4 ব্লকত ভাড়াতীয়া হিচাপে আছিল। এই ঘৰটোতে পায়েলৰ মৃতদেহ উদ্ধাৰ হয়।

ঘটনাৰ বিৱৰণী অনুসৰি ১ জানুৱাৰীৰ দিনা পায়েলৰ মাতৃয়ে কেইবাবাৰো কন্যাক ফোন কৰিছিল। কিন্তু বাৰে বাৰে ফোন কৰি ৰিচিভ নকৰাৰ পাছত মাতৃয়ে খবৰ দিছিল এপাৰ্টমেন্টৰ চিকিউৰিটি গাৰ্ডক। লগে লগে চিকিউৰিটি গাৰ্ডজন পায়েলৰ ৰুমলৈ গৈ কলিং বেল বজায়। কিন্তু বাৰে বাৰে কলিং বেল বজোৱাৰ পাছতো পায়েলৰ তৰফৰ পৰা কোনো সঁহাৰি নাপাই দুৱাৰ ভাঙি কোঠাত প্ৰৱেশ কৰে আৰু প্ৰত্যক্ষ কৰে পায়েলৰ মৃতদেহ। চিপ লৈ আত্মহত্যা কৰিছিল পায়েলে।

এই ঘটনাৰ পাছতেই লগে লগে আৰক্ষীক খবৰ দিয়া হয়। পৰৱৰ্তী সময়ত আৰক্ষী উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। ঘটনা সন্দৰ্ভত স্থানীয়লোকে জনাই যে, ঘৰটোলৈ যুৱতীগৰাকীৰ প্ৰেমিকৰ লগতে আন বহুলোকে অহা যোৱা কৰিছিল। প্ৰায়ে নিচাসক্ত অৱস্থাত থকা দেখা যায় পায়েল। আনকি প্ৰায় ৩ মাহমান পূৰ্বে এপাৰ্টমেন্টৰ তলত প্ৰেমিকৰ সৈতে কাজিয়াত লিপ্ত হৈছিল পায়েল। গতিকে এয়া কোনো প্ৰেমজনিত কাৰণ হ’ব পাৰে বুলি সন্দেহ কৰা হৈছে।

পায়েলৰ মৃত্যুৰ পাছতে এতিয়া বহু প্ৰশ্নৰ উত্থাপন হৈছে। গুৱাহাটীৰ ছাত্ৰীবাৰীত নিজা ঘৰ থকাৰ পাছতো কিয় চানমাৰীত আছিল পায়েল?  সঁচাকৈ তেওঁ আত্মহত্যা কৰিলে নে কোনোৱে হত্যা কৰিলে ? যদি আত্মহত্যা কৰিছে ইয়াৰ কাৰণ কি?   এই সমগ্ৰ প্ৰশ্ন এতিয়া ৰহস্যৰ আৱৰ্তত। ইতিমধ্যে ঘটনা সন্দৰ্ভত আৰক্ষীয়ে আৰম্ভ কৰিছে তদন্ত। পায়েলৰ মোবাইল নম্বৰৰ চিডিআৰ ৰিপোৰ্টো পৰীক্ষা কৰি আছে আৰক্ষীয়ে। গতিকে পৰৱৰ্তী সময়ত অধিক তথ্য পোহৰলৈ অহাৰ সম্ভাৱনা আছে। তদন্তৰ অন্তত জানিবলৈ পৰা যাব যে কেনেকৈ মৃত্যু হ’ল পায়েলৰ বা ইয়াৰ আঁৰত কোন আছে।