স্বামী চিকিৎসক, পুত্ৰ ইঞ্জিনিয়াৰ, কন্যা দিল্লীত! জীৱন্তে অগ্নিদগ্ধ হৈ শোৱনিকোঠাৰ ভিতৰত মৃত্যু মহিলাৰ…

স্বামী-স্ত্ৰী আৰু ল’ৰা-ছোৱালী।  সুখী পৰিয়াল বুলি ক’লে হয়তো এনে এক ধাৰণাই বিভিন্নজনৰ চকুত ঘূৰি ফুৰে। তাতে যেতিয়া আকৌ সেই পৰিয়ালটোৱে সফলতাৰ দৌৰত আগবাঢ়ে তেতিয়া হয়তো পৃথিৱীৰ সমস্ত সুখখিনি দুহাতত আহি পৰা যেন অনুভৱ হয়। পিতৃ-মাতৃৰ বাবে আটাইতকৈ গুৰুত্বপূৰ্ণ কি? নিজ সন্তানৰ ভৱিষ্যত! ল’ৰা-ছোৱালীৰ সফলতাতেই পূৰ্ণতা পাই পিতৃ-মাতৃৰ সপোনে!  কিন্তু তাৰ পাছত? জীৱনত বিচৰা ধৰণে ল’ৰা-ছোৱালী আগবঢ়া, এজন অধ্যবন্ত স্বামী থকা মানে জানো সুখ বুজায়? হয়তো নুবুজায়। সেয়ে হয়তো মহানগৰীৰ মাজ মজিয়াত জীৱন্তে অগ্নিগদ্ধ হৈ সংসাৰেৰে পৰিপূৰ্ণ এগৰাকী অকলশৰীয়া মহিলাই প্ৰাণ হেৰুয়ায়।

এই ঘটনা গুৱাহাটী মহানগৰীৰ বেলতলাৰ ছাৰ্ভেৰ। জানিব পৰা মতে, ছাৰ্ভেৰ ৪ নং বাইলেনৰ এটা অট্টালিকাত সংঘটিত হয় ভয়কৰ অগ্নিকাণ্ডৰ ঘটনা। স্থানীয়লোকে জনোৱা অনুসৰি, সোমবাৰে ঘৰটোত প্ৰথমে শ্বৰ্ট চাৰ্কিটৰ ফলত অগ্নিকাণ্ডৰ সূত্ৰপাত হয় আৰু পাছত ছিলিণ্ডাৰ বিস্ফোৰণ হয়। সেই সময়ত ঘৰটোত আছিল এগৰাকী মহিলা। জুইৰ শিখাই চাৰিওফালে আগুৰি ধৰাৰ পাছতে মহিলাগৰাকীয়ে বিকট চিঞৰ মাৰে।

এই ভয়ংকৰ জুই দেখি ভয় খাই প্ৰণীতা ডেকা নামৰ মহিলাগৰাকীয়ে। সেই সময়ত ঘৰৰ বাহিৰলৈ ওলাই যোৱাৰ সলনি মহিলাগৰাকীয়ে শোৱনি কোঠাত আশ্ৰয় লয়। কিন্তু মূহুৰ্ততে জুইয়ে সমগ্ৰ ঘৰটো আগুৰি ধৰে। প্ৰথমে পাকঘৰ, পাছত ডাইনিং ৰুম আৰু শোৱনি কোঠালৈ জুই বিয়পি পৰে। অৱশেষত শোৱনিকোঠাত আশ্ৰয় লৈ থকা মহিলাগৰাকীয়ে এই ভয়ংকৰ অগ্নিকাণ্ডত প্ৰাণ হেৰুয়ায়। অতি কৰুণভাৱে সহায়ৰ বাবে চিঞৰি থকা মহিলাগৰাকীয়ে শোৱনি কোঠাতে জীৱন্তে অগ্নিদগ্ধ হৈ মৃত্যুক সাৱতি লয়।

ঘৰটোত অকলশৰীয়াকৈ বাস কৰিছিল প্ৰণীতা ডেকাই। অৱশ্যে তেওঁৰ আছিল ল’ৰা-ছোৱালী, স্বামীৰে পৰিপূৰ্ণ এখন সংসাৰ। জানিব পৰা মতে,মহিলাগৰাকীৰ স্বামী ডাঃ নৰেন ডেকা নগাঁৱৰ এখন ব্যক্তিগত হাস্পাতালত কৰ্মৰত। ইয়াৰ বিপৰীতে মহিলাগৰাকীৰ একমাত্ৰ পুত্ৰ দুলীয়াজানৰ অইলত কৰ্মৰত আৰু এগৰাকী কন্যা দিল্লীত থাকে। ইয়াৰোপৰি আন এগৰাকী  বিবাহিতা কন্যা থাকে গুৱাহাটী।

এনে পৰিস্থিতিক এই বিশাল অট্টালিকাটোত অকলে বাস কৰিছিল ৬০ উৰ্ধৰ মহিলাগৰাকীয়ে। স্থানীয়লোকে জনোৱা অনুসৰি মহিলাগৰাকী অতি অমায়িক আৰু ধৰ্মপ্ৰাণ আছিল। প্ৰায়ে নাম-প্ৰসংগত ব্যস্ত থাকিছিল মহিলাগৰাকী। কালিও মহিলাগৰাকীৰ ঘৰত নাম-প্ৰসংগ হোৱাৰ কথা আছিল। কিন্তু তাৰ পূৰ্বে সংঘটিত এই কাণ্ডই সমগ্ৰ অঞ্চল জোকাৰি গৈছে।

স্থানীয়লোকে জনোৱা মতে, অগ্নিকাণ্ড সংঘটিত হোৱাৰ পাছত ঘটনাস্থলীত অগ্নিনিৰ্বাপক বাহিনী উপস্থিত হৈছিল যদিও ঘৰটোত যোৱা পথ সৰু বাবে গাড়ীখন প্ৰৱেশ কৰিব নোৱাৰিলে। ইয়াৰোপৰি অঞ্চলটোত বিভিন্ন ধৰণৰ বিদ্যুতৰ তাঁৰ ওলমি আছে, যাৰ ফলত গাড়ীখন অঞ্চলটোত প্ৰৱেশ কৰাত অসুবিধাৰ সৃষ্টি হৈছিল।  এই সমগ্ৰ ঘটনাত আজিও অঞ্চলটোত চাঞ্চল্য অব্যাহত আছে। ঘটনা সন্দৰ্ভত আৰক্ষীৰ তদন্ত অব্যাহত।