যোৰহাটৰ শ’লমৰাত ভয়ংকৰ ঘটনা, লিফ্ট দিয়া বাইক চালকক ডিঙি কাটি হত্যাৰ চেষ্টা!

যোৰহাটৰ শ'লমৰাত লিফ্ট দিয়া বাইক চালকক ডিঙি কাটি হত্যাৰ চেষ্টা!

আপুনি নিশা কোনো অচিনাকি ব্যক্তিক লিফ্ট দিয়ে নেকি? তেন্তে লিফ্ট দিয়াৰ পূৰ্বে ১০০ বাৰ চিন্তা কৰক। অসহায় যাত্ৰীৰ ছদ্মবেশত থকা ডকাইতে প্ৰাণ পৰ্যন্ত কাঢ়িব পাৰে আপোনাৰ।  লিফ্ট বিচৰাৰ অযুহাত লৈ সকলো শেষ কৰিব পাৰে আপোনাৰ। যোৰহাটৰ শ’লমৰাত এক চাঞ্চল্যকৰ ডকাইতি কাণ্ড। লিফ্ট দিয়া বাইক আৰোহীক পিছফালৰ পৰা ডিঙি কাটি হত্যাৰ চেষ্টা।

ৰাজ্যত এতিয়া চলিছে নিৰ্বাচনৰ গৰম বতাহ। আজি ৰাজ্যৰ ৫ সমষ্টিত উপ-নিৰ্বাচনৰ ভোটগ্ৰহণ। ভাগ্য নিৰ্ণয় হ’ব ৩৪ গৰাকী প্ৰাৰ্থীৰ।পুৱা ৭ বজাৰ পৰা আৰম্ভ হৈছে ভোটগ্ৰহণ প্ৰক্ৰিয়া। বিহালী, চামগুৰি, বঙাইগাঁও, ধলাই, ছিদলীত সমষ্টিত হৈছে ভোটগ্ৰহণ। ভোটগ্ৰহণৰ দিনটোতে ঠায়ে ঠায়ে সংঘটিত হৈছে বিক্ষিপ্ত ঘটনা। যাক লৈ কঠোৰ হৈছে প্ৰশাসন। নিৰ্বাচনৰ হিংসাত্মক ঘটনা প্ৰতিৰোধ কৰিবলৈ ৰাজ্যত কটকটীয়া কৰা হৈছে নিৰাপত্তা ব্যৱস্থা।

কিন্তু ইয়াৰ মাজতে মঙলবাৰে নিশা পশ্চিম যোৰহাটৰ শ’লমৰাত সংঘটিত হৈছে এক ভয়ংকৰ ঘটনা। ৰাজপথত বাইকৰে আহি থকা অৱস্থাত প্ৰসেনজিৎ বৰুৱাক এজন ব্যক্তিয়ে বিচাৰিলে সহায়। মানৱতাৰ খাতিৰত প্ৰসেনজিৎ বৰুৱায়ো আগ-পিছ নাভাবি অচিনাকি ব্যক্তিজনক বাইকত বহুৱাই। ইয়ালৈ সকলোবোৰ ঠিকে আছিল। তাৰ পাছত সংঘটিত হ’ল অনাকাংশিত ঘটনাটো।বাইকত লিফ্ট দিয়াৰ পিছতেই প্ৰসেনজিৎ বৰুৱাক পিছৰ চিটত বহি যোৱা লোকজনে হঠাৎ আক্ৰমণ কৰে। পিছফালৰ পৰা ডিঙিত চোকা অস্ত্ৰৰে আক্ৰমণ কৰি গুৰুতৰভাৱে আহত কৰে প্ৰসেনজিৎ বৰুৱাক।

জানিব পৰা মতে প্ৰসেনজিৎ বৰুৱাৰ ঘৰ যোৰহাটৰ সোণাৰী গাঁৱত। বিশেষ কিবা কামত শ’লমৰালৈ গৈছিল ব্যক্তিজন। বাটতে তেওঁক ক’লা ৰঙৰ কাপোৰ পৰিহিত এজন অচিনাকী ব্যক্তিয়ে লিফ্ট বিছাৰে। ব্যক্তিজনক লিফ্ট দি অলপ আগুৱাই যোৱাৰ পিছফালে চিটত বহি যোৱা ব্যক্তিজনে সংঘটিত কৰে এই ভয়ংকৰ ঘটনা। কোনোমতে প্ৰাণৰক্ষা পৰে প্ৰসেনজিৎ বৰুৱাৰ ইতিমধ্যে গুৰুতৰ ভাৱে আহত ব্যক্তিজনক যোৰহাট চিকিৎসা মহাবিদ্যালয়লৈ প্ৰেৰণ কৰা হৈছে। এই সমগ্ৰ ঘটনা ডকাইতৰ বাবে সংঘটিত কৰা হৈছে বুলি সন্দেহ কৰা হৈছে। ইতিমধ্যে সমগ্ৰ ঘটনাৰ সন্দৰ্ভত তদন্ত আৰম্ভ কৰিছে আৰক্ষীয়ে।

দূৰ্বৃত্তটোৱে চোকা অস্ত্ৰৰে আক্ৰমণ কৰাৰ পিছত লুটপাত চলোৱাৰ চেষ্টা কৰে আৰু ভাবুকি দি বাইটখনো বলপূৰ্বক ভাবে লৈ যাব বিছাৰিছিল। কিন্তু কৌশলেৰে প্ৰাণ বচাই পলাই আহিবলৈ সক্ষম হোৱা প্ৰসেনজিত বৰুৱাক ইতিমধ্যে চিকিৎসালয়লৈ চিকিৎসাৰ বাবে প্ৰেৰণ কৰা হৈছে। বাইক চালক প্ৰসেনজিত বৰুৱা নামৰ লোকজনক লুটপাত চলোৱাৰ বাবে অচিনাকী লোকজনে সংঘটিত কৰে এই ঘটনা।