নাই ষ্টপেজ ! বন্দে ভাৰত-ৰাজধানী নহয়, একেৰাহে ৫০০ কিলোমিটাৰ যাত্ৰা কৰে এই ৰ’লখনে…

বৰ্তমান সময়ত ভাৰতীয় ৰে’লৱে বিশ্বৰ অন্যতম বৃহৎ ৰে’লৱে নেটৱৰ্ক হিচাপে পৰিগণিত হৈছে । বৰ্তমানৰ ভাৰতৰ ৰে’লৱে ব্যৱস্থা আৰু ১০-২০ বছৰ পূৰ্বৰ ৰে’লৱে ব্যৱস্থাৰ মাজত ডাঙৰ পাৰ্থক্য দেখা যায় । যোৱা কেইবছৰত আধুনিক প্লেটফৰ্মৰ পৰা আৰম্ভ কৰি ৰে’লপথৰ ১০০ শতাংশ বৈদ্যুতিকৰণলৈকে ৰে’লৱেত এক বৃহৎ পৰিৱৰ্তন দেখা গৈছে ।

ভাৰতত প্ৰতিদিনে চলাচল কৰে ১৩ হাজাৰৰো অধিক ৰে’ল । কিছুমান ছুপাৰফাষ্ট আৰু কিছুমানে সাধাৰণ গতিৰে যাত্ৰীক সেৱা আগবঢ়ায় । কিন্তু আপুনি জানেনে, এখন বিশেষ ৰে’ল আছে, যিখনে কোনো ষ্টেচনত নৰখাকৈ প্ৰায় ৫০০ কিলোমিটাৰ দূৰত্ব অতিক্ৰম কৰে । দেশৰ আটাইতকৈ দীৰ্ঘ দূৰত্বৰ ননষ্টপ ৰে’লখন হৈছে মুম্বাই চেণ্ট্ৰেল-হাপালৈ চলা দুৰন্ত এক্সপ্ৰেছ । মুম্বাইৰ পৰা আহমেদাবাদলৈ যোৱা এই ৰে’ল পথটোত কোনো ধৰণৰ ষ্টপেজ নোহোৱাকৈ ৪৯৩ কিলোমিটাৰ অবিৰত দূৰত্ব অতিক্ৰম কৰে ৰে’লখনে ।

মাত্ৰ ৫ ঘন্টা ৫০ মিনিটতে মুম্বাইৰ পৰা আহমেদাবাদলৈ যাব পাৰি এই ৰে’লযোগে । এই ৰে’লখনৰ বাবে আহমেদাবাদলৈ মুঠ তিনিটা ষ্টপেজ আছে যদিও মুম্বাই পোৱাৰ আগতে নাই কোনো ষ্টপেজ ।

ইয়াৰ পূৰ্বে আটাইতকৈ দীঘলীয়া ননষ্টপ ৰে’ল আছিল ত্ৰিবান্দ্ৰম-নিজামুদ্দিন ৰাজধানী এক্সপ্ৰেছ । এই ৰে’লখন দিল্লীৰ হজৰত নিজামুদ্দিন ৰে’লৱে ষ্টেচনৰ পৰা যাত্ৰা আৰম্ভ কৰি কেৰালাৰ ত্ৰিবান্দ্ৰমত উপস্থিত হয় । ২৮৪৫ কিলোমিটাৰ দীঘলীয়া দূৰত্ব অতিক্ৰম কৰিবলৈ ৪২ ঘণ্টা সময় লাগে এই ৰে’লখনক ।

ৰাজস্থানৰ কোটাৰ পৰা গুজৰাটৰ বদোদৰালৈ ৫২৮ কিলোমিটাৰ দূৰত্বত কোনো ষ্টপেজ নাছিল । কোনো ষ্টেচনত নৰখোৱাকৈ ৫২৮ কিলোমিটাৰ যাত্ৰা কৰে এই ৰে’লখনে । পাছত মধ্যপ্ৰদেশৰ ৰাটলামত এটা ষ্টপেজ সংযোজন কৰা হয় ।