পূৰণ নহ’ব আশা ! ২ লাখ টকা পৰ্যন্ত বৃদ্ধি পাব আইফোনৰ দাম…

বহুতৰে সপোন থাকে, এটা আইফোন কিনাৰ । কিন্তু মন কৰিলেই জানো হ’ব, ধনোতো লাগিব । আইফোনৰ দামৰ বাবেই বহুতে এই সপোন পূৰণ কৰাত ব্যৰ্থ হয় । তথাপিও একাংশ গ্ৰাহকে ব্যক্তিগত বেংকৰ ইএমআইৰ সুবিধা গ্ৰহণ কৰি ক্ৰয় কৰে আইফোন । বৰ্তমান সময়ত ভাৰতত আইফোন ব্যৱহাৰকাৰীৰ সংখ্যাও বৃদ্ধি পাইছে । সুৰক্ষা দিশৰ পৰাও আইফোনৰ জনপ্ৰিয়তা বৃদ্ধি পাইছে গ্ৰাহকৰ মাজত ।

কিন্তু এইবাৰ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ এটা সিদ্ধান্তই চিন্তাত পেলাইছে আইফোন ব্যৱহাৰকাৰীক । ট্ৰাম্পে যি হাৰত নতুন শুল্ক আৰোপ কৰিছে, সেই হাৰত আইফোনৰ মূল্যও প্ৰায় ৩০ৰ পৰা ৪০ শতাংশ বৃদ্ধি পোৱাৰ সম্ভাৱনা আছে । এই আশংকাই দেখা দিছে বজাৰত । এপল আমেৰিকাৰ কোম্পানী হ’লেও কম খৰচত মোবাইল ফোন উৎপাদন কৰিবলৈ কোম্পানীটোৱে নিজৰ বেছিভাগ ফোন নিৰ্মাণ কৰিছিল চীনত । বেছিভাগ আইফোন চীনত নিৰ্মিত । ইয়াৰ মূলতে কম খৰচী শ্ৰম আৰু ইলেক্ট্ৰনিক সামগ্ৰীৰ উপলব্ধতা । কেৱল এপলেই নহয়, বহু কোম্পানীয়ে খৰচ ৰাহি কৰিবলৈ চীনত নিৰ্মাণ কৰে ফোন ।

এইবাৰ চীনৰ ওপৰত সৰ্বাধিক কৰ আৰোপ কৰিছে ড’নাল্ড ট্ৰাম্পে । বিশেষজ্ঞসকলৰ মতে, এপলে অতিৰিক্ত কৰ দিবলগীয়া হ’লে উৎপাদিত সামগ্ৰীৰ দাম বৃদ্ধি কৰিব লাগিব । ১ এপ্ৰিলৰ পৰা চীনৰ পৰা আমদানি কৰা সামগ্ৰীৰ ওপৰত ৫৪ শতাংশ শুল্ক আৰোপ কৰিছে ড’নাল্ড ট্ৰাম্পে । যিটো তুলনামূলকভাৱে বৃদ্ধি পাইছে প্ৰায় ২০ শতাংশ । আমেৰিকাৰ ব্যৱসায়ীসকলৰ উৎপাদন ইউনিটসমূহ চীনৰ পৰা আমেৰিকালৈ ঘূৰাই আনিবলৈ বিচাৰিছে ট্ৰাম্পে । ইয়াৰ মূলতে আমেৰিকাত নিয়োগ বৃদ্ধি কৰা । আনহাতে, চীনকে ধৰি আন দেশসমূহেও যুক্তি অনুসৰি এই সিদ্ধান্ত এক কথাত আমেৰিকাৰ শক্তি আৰু ট্ৰাম্পৰ জেদৰ প্ৰতিফলন ।

বৰ্তমান বজাৰত উপলব্ধ আটাইতকৈ জনপ্ৰিয় আইফোনটো হৈছে iPhone 16 । যাৰ বজাৰ মূল্য ৭৯৯ মাৰ্কিন ডলাৰ বা ভাৰতীয় মূল্যত প্ৰায় ৬৮ হাজাৰ টকা । যদি দাম বৃদ্ধি পায় তেন্তে প্ৰতিটো আইফোনৰ দাম হ’ব প্ৰায় ৯৭ হাজাৰ টকা । অৰ্থাৎ এবাৰতে ৪৩ শতাংশ মূল্য বৃদ্ধি পাব । iPhone 16 প্ৰ’ মেক্সৰ মূল্যই ২ লাখ টকা অতিক্ৰম কৰা সম্ভাৱনা আছে । ইয়াৰ পূৰ্বে কৰৰ ক্ষেত্ৰত ৰেহাই লাভ কৰিবলৈ সক্ষম হৈছিল এপলে । কিন্তু এইবাৰ সেই বাট বন্ধ । সাংঘাতিক ধৰণে প্ৰভাৱিত হ’ব আইফোন ব্যৱহাৰকাৰীসকল ।