পূৰ্বৰ ৰেকৰ্ড ভাঙিছে OYO ই ! হোৰাহোৰে বৃদ্ধি পাইছে ৰাজহ

চতুৰ্থ ত্ৰৈমাসিকত OYO ই বৃহৎ লাভৰ মুখ দেখিছে। প্ৰতিবেদন অনুসৰি কোম্পানীটোৱে আশা কৰিছে যে ২০২৫ চনৰ জানুৱাৰী-মাৰ্চ ত্ৰৈমাসিকত ইয়াৰ ৰাজহ ৬০ শতাংশতকৈ অধিক বৃদ্ধি পাই ২১০০ কোটি টকা হ’ব। এই তথ্য কোম্পানীটোৰ প্ৰতিষ্ঠাপক তথা মুখ্য কাৰ্যবাহী বিষয়া ৰিতেশ আগৰৱালাই সোমবাৰে কোম্পানীটোৰ শীৰ্ষ নেতৃত্বলৈ ই-মেইলযোগে প্ৰেৰণ কৰিছে।

মুখ্য কাৰ্যবাহী বিষয়াগৰাকীয়ে কয় যে, “২০২৪-২৫ বিত্তীয় বৰ্ষৰ চতুৰ্থ ত্ৰৈমাসিকত ৬০ শতাংশতকৈ অধিক ৰাজহ বৃদ্ধি হোৱাৰ সম্ভাৱনা আছে, যিটো ২১০০ কোটি টকাৰো অধিক হ’ব। এয়া সংগঠনটোৰ বাবে এক গুৰুত্বপূৰ্ণ মাইলৰ খুঁটি হ’ব।”

প্ৰতিবেদন অনুসৰি, কোম্পানীটোৰ ৰাজহ ২৭৫ কোটি টকা বৃদ্ধি পাইছে। ইয়াৰ পূৰ্বে ৰাজহ আছিল ১৮৮৬ কোটি টকা। মুঠতে ৪২ শতাংশ ৰাজহ বৃদ্ধি পাইছে। ২০২৪ চনত ব্লেকষ্টোনৰ সৈতে চুক্তিবদ্ধ হয় OYO, যাৰ G6 হস্পিটালিটিৰ মালিক। কোম্পানীটোৱে মোটেল ৬ আৰু ষ্টুডিঅ’ ৬ ব্ৰেণ্ডৰ অধীনত আমেৰিকা আৰু কানাডাৰ প্ৰায় ১৫০০টা স্থানত লজিং সেৱা আগবঢ়ায়ছে।

কোম্পানীটোৱে ২০২৫-২৬ বিত্তীয় বৰ্ষত ১১০০ কোটি টকাৰ নিকা লাভৰ আশা কৰিছে। ২০২৪-২৫ বিত্তীয় বৰ্ষৰ তৃতীয় ত্ৰৈমাসিকত OYO ৰ ৰাজহ ১৬৩৬ কোটি টকা হোৱাৰ বিপৰীতে ২০২৩-২৪ বিত্তীয় বৰ্ষৰ তৃতীয় ত্ৰৈমাসিকত ১,২৯৬ কোটি টকা লাভ কৰিছিল। অৰ্থাৎ আয় ২৬ শতাংশ বৃদ্ধি পালে। মন কৰিবলগীয়া যে OYO ই শেহতীয়াকৈ নতুন চেক-ইন নীতি প্ৰৱৰ্তন কৰিছে। এই নীতিৰ অধীনত অবিবাহিত দম্পতীয়ে আৰু OYO হোটেলত চেক-ইন কৰিব নোৱাৰিব।