টিকট বুকিং আৰু ৰে’ল ট্ৰেকিঙৰ পৰা আৰম্ভ কৰি অভিযোগলৈকে ৰে’লৱেই আনিছে এটা বিশেষ এপ, জানক সবিশেষ

টিকট বুকিং আৰু ৰে'ল ট্ৰেকিঙৰ পৰা আৰম্ভ কৰি অভিযোগলৈকে ৰে'লৱেই আনিছে এটা বিশেষ এপ

ভাৰতীয় ৰে’লৱেৰ সৈতে প্ৰতিদিনে লাখ লাখ যাত্ৰীয়ে যাত্ৰা কৰে। এই সময়ছোৱাত তেওঁলোকক বহু সুবিধাৰ প্ৰয়োজন হয়। ইয়াৰ বাবে তেওঁ প্লে ষ্ট’ৰৰ পৰা বিভিন্ন এপ ডাউনলোড কৰে, যাতে তেওঁ নিজৰ ৰে’লৰ অৱস্থা আৰু অন্যান্য সবিশেষ জানিব পাৰে। এতিয়া এই সমস্যা সমাধানৰ বাবে ভাৰতীয় ৰে’লৱে শীঘ্ৰে ‘ছুপাৰ এপ’ মুকলি কৰাৰ প্ৰস্তুতি চলাইছে, যাৰ বাবে ৰে’ল যাত্ৰীসকলৰ বিভিন্ন এপ ডাউনলোড কৰাৰ প্ৰয়োজন নহ’ব। এই ছুপাৰ এপৰ জৰিয়তে যাত্ৰীসকলে টিকট বুকিং, পিএনআৰ ষ্টেটাছ, ট্ৰেইন ষ্টেটাছ আৰু কেটাৰিং আদি সকলো সেৱা একেটা প্লেটফৰ্মতে লাভ কৰিব। বছৰৰ শেষৰ ফালে এই এপটো মুকলি কৰিব পাৰে।

বিভিন্ন এপৰ প্ৰয়োজন

বৰ্তমান ৰে’ল যাত্ৰীসকলে টিকট বুকিঙৰ বাবে ‘আই আৰ চি টি চি ৰেল কানেক্ট’, খাদ্য সেৱাৰ বাবে ‘ই-কেটাৰিং ফুড অন ট্ৰেক’, আৰু ৰে’লৰ অৱস্থা জানিবলৈ ‘নেশ্যনেল ট্ৰেইন ইনকুৱাৰী চিষ্টেম’ আদি বিভিন্ন এপৰ আশ্ৰয় ল’বলগীয়া হয়। অৱশ্যে এই ছুপাৰ এপটো অহাৰ পিছত যাত্ৰীসকলে এটা এপতে নিজৰ সকলো সুুবিধা চাব পাৰিব।

এয়াই ৰে’লৱেৰ পৰিকল্পনা

এই ছুপাৰ এপটো ৰে’লৱেৰ বিভিন্ন তথ্য ব্যৱস্থাৰ ডিজাইন আৰু বিকাশৰ কাম চোৱাচিতা কৰা চেণ্টাৰ ফৰ ৰে’লৱে ইনফৰ্মেশ্যন চিষ্টেমছ (চি আৰ আই এছ)ৰ দ্বাৰা প্ৰস্তুত কৰা হৈছে। এই এপটোৱে আই আৰ চি টি চি (ভাৰতীয় ৰেলৱে কেটাৰিং আৰু পৰ্যটন নিগম)ৰ বৰ্তমানৰ ব্যৱস্থাৰ সৈতে একেলগে কাম কৰিব। টিকট বুকিং, কেটাৰিং, পৰ্যটন সেৱাৰ দৰে বহু সেৱা এই এপৰ সৈতে একত্ৰিত কৰা হ’ব। আই আৰ চি টি চিয়েও এই এপটোক নিজৰ উপাৰ্জন বৃদ্ধিৰ মাধ্যম হিচাপে বিবেচনা কৰিছে। ২০২৩-২৪ বিত্তীয় বৰ্ষত আই আৰ চি টি চিয়ে ১,১১১.২৬ কোটি টকাৰ শুদ্ধ লাভ অৰ্জন কৰে, ইয়াৰে ৩০.৩৩ শতাংশ কেৱল টিকট বিক্ৰীৰ দ্বাৰা অৰিহণা যোগোৱা হয়।

বৰ্তমান আই আৰ চি টি চিৰ ৰে’ল কানেক্ট এপত সংৰক্ষিত টিকট বুকিঙৰ একচেটিয়া অধিকাৰ আছে আৰু এই এপটো ১০ কোটিতকৈও অধিক বাৰ ডাউনলোড কৰা হৈছে। কিন্তু, নতুন এপৰ আগমনৰ লগে লগে ৰে’লৱেই নিজৰ সেৱাসমূহ একত্ৰিত কৰি যাত্ৰীসকলৰ ওচৰলৈ পোনপটীয়াকৈ যোগান ধৰিব পাৰিব। এই এপটোৱে যাত্ৰীসকলক সুবিধা প্ৰদান কৰাই নহয়, ৰে’লৱেৰ ৰাজহ বৃদ্ধি কৰাৰ সম্ভাৱনাও আছে।