UGC NET পৰীক্ষাৰ নতুন তাৰিখ ঘোষণা, এতিয়া এই দুটা তাৰিখত অনুষ্ঠিত হ’ব পৰীক্ষা
UGC NET পৰীক্ষাৰ সংশোধিত তাৰিখ প্ৰকাশ কৰিছে। এতিয়া এদিনৰ পৰীক্ষা ২১ জানুৱাৰী আৰু ২৭ জানুৱাৰীত দুদিনত অনুষ্ঠিত হ’ব। আচলতে পোংগল আৰু মকৰ সংক্ৰান্তি উৎসৱৰ বাবে ৰাষ্ট্ৰীয় পৰীক্ষণ সংস্থাই ১৫ জানুৱাৰীত অনুষ্ঠিত হ’বলগীয়া পৰীক্ষাটো পিছুৱাই দিছিল।
UGC NET পৰীক্ষাৰ নতুন তাৰিখ ঘোষণা
ৰাষ্ট্ৰীয় পৰীক্ষা সংস্থায়ে(NTA) শেহতীয়াকৈ ২০২৫ চনৰ ১৫ জানুৱাৰীত অনুষ্ঠিত হ’বলগীয়া ইউ জি চি নেট পৰীক্ষা পিছুৱাই দিছিল। এতিয়া এই পৰীক্ষাৰ সংশোধিত তাৰিখ প্ৰকাশ কৰা হৈছে। নতুন সময়সূচী অনুসৰি এতিয়া ২০২৫ চনৰ ২১ আৰু ২৭ জানুৱাৰীত পৰীক্ষা অনুষ্ঠিত হ’ব, অৰ্থাৎ আগতে এদিনত অনুষ্ঠিত হোৱা এই পৰীক্ষা এতিয়া দুদিনত অনুষ্ঠিত হ’ব। চৰকাৰী অধিসূচনা অনুসৰি শীঘ্ৰে এই পৰীক্ষাসমূহৰ বাবে এডমিট কাৰ্ড প্ৰদান কৰিব ৰাষ্ট্ৰীয় পৰীক্ষণ সংস্থাই।
নতুন সূচী অনুসৰি, ২০২৫ চনৰ ২১ জানুৱাৰীত পুৱা ৯ বজাৰ পৰা দুপৰীয়া ১২ বজালৈ পুৱা পৰীক্ষা অনুষ্ঠিত হ’ব, আনহাতে ২৭ জানুৱাৰীত বিয়লি ৩ বজাৰ পৰা সন্ধিয়া ৬ বজালৈ পৰীক্ষা অনুষ্ঠিত হ’ব। ২১ জানুৱাৰীত ভাৰতীয় জ্ঞান ব্যৱস্থা, মালয়ালম, উৰ্দু, ক্ৰিমিনো আৰু লোক সাহিত্য আদি বিষয়ৰ পৰীক্ষা অনুষ্ঠিত হোৱাৰ বিপৰীতে ২৭ জানুৱাৰীত সংস্কৃত, গণসংযোগ আৰু সাংবাদিকতা, জাপানীজ, electronic science, আইন আৰু নেপালী পৰীক্ষা অনুষ্ঠিত হ’ব।
কিয় পিছুৱাই দিয়া হৈছে পৰীক্ষা?
পোংগল আৰু মকৰ সংক্ৰান্তি উৎসৱৰ বাবে NTAই ২০২৪ চনৰ ডিচেম্বৰ মাহৰ পৰীক্ষা পিছুৱাই দিছিল। চৰকাৰী জাননীখনত লিখা আছিল, ‘ৰাষ্ট্ৰীয় পৰীক্ষণ সংস্থাই ২০২৫ চনৰ ১৫ জানুৱাৰীত অনুষ্ঠিত হ’বলগীয়া UGC NET পৰীক্ষা পিছুৱাই দিয়াৰ সিদ্ধান্ত লৈছিল। পৰীক্ষাৰ নতুন তাৰিখ পিছত ঘোষণা কৰা হ’ব। কিন্তু ১৬ জানুৱাৰীত অনুষ্ঠিত হ’বলগীয়া পৰীক্ষাটো পিছুৱাই দিয়া হোৱা নাই। এই পৰীক্ষা নিৰ্ধাৰিত সময়সূচী অনুসৰি অনুষ্ঠিত হ’ব।
সমগ্ৰ দেশৰ বিভিন্ন পৰীক্ষা কেন্দ্ৰত দুটা শ্বিফটত মুঠ ৮৫টা বিষয়ৰ বাবে UGC NET 2024 পৰীক্ষা অনুষ্ঠিত কৰা হৈছে। ২০২৫ চনৰ ৩ জানুৱাৰীৰ পৰা আৰম্ভ হোৱা পৰীক্ষাটো ১৬ জানুৱাৰীত শেষ হ’ব লাগিছিল যদিও ১৫ জানুৱাৰীৰ পৰীক্ষা স্থগিত ৰখাৰ বাবে এতিয়া ২৭ জানুৱাৰীত শেষ পৰীক্ষা অনুষ্ঠিত হ’ব।