By-Elections 2024: : চাৰিটা সমষ্টিৰ ২৪ গৰাকী প্ৰাৰ্থী মনোনয়ন বৈধ, আজি পৰীক্ষা কৰা হ’ব চামগুৰিৰ ১৪ গৰাকী প্ৰাৰ্থীৰ মনোনয়ন…

উপ-নিৰ্বাচনৰ অনুষ্ঠিত হ’বলগীয়া ৰাজ্যৰ পাঁচটা সমষ্টিৰ ভিতৰত চাৰিটা বিধানসভা সমষ্টিৰ ২৪ গৰাকী প্ৰাৰ্থী মনোনয়ন ইতিমধ্যে বৈধ ঘোষণা কৰিছে নিৰ্বাচন আয়োগৰ বিষয়াসকলে । মনকৰিবলগীয়া যে, বাকী থকা আনটো সমষ্টি চামগুৰিৰ ১৪ গৰাকী প্ৰাৰ্থী মনোনয়ন আজি পুনৰ পৰীক্ষা কৰা হ’ব । ধলাই, বিহালী, বঙাইগাঁও আৰু চিদলী সমষ্টিৰ ২৪ গৰাকী প্ৰাৰ্থীৰ মনোনয়ন সোমবাৰে বৈধ ঘোষণা কৰে নিৰ্বাচন আয়োগে ।

চামগুৰি সমষ্টিৰ ১৪ গৰাকী প্ৰাৰ্থীৰ মনোনয়ন বৈধতাৰ সন্দৰ্ভত অসমৰ মুখ্য নিৰ্বাচনী বিষয়া অনুৰাগ গোৱেলে পিটিআইক জনোৱা মতে, দুজন নিৰ্দলীয় প্ৰাৰ্থীৰ নথি-পত্ৰত কিছু সমস্যাৰ থকাৰ বাবে চামগুৰি সমষ্টিৰ ১৪ জন প্ৰাৰ্থীৰ পৰীক্ষা স্থগিত ৰখা হৈছে । এই প্ৰাৰ্থী কেইজনৰ মনোনয়ন মঙলবাৰে পৰীক্ষা কৰা হ’ব। উল্লেখ্য যে, মনোনয়ন পত্ৰ দাখিলৰ অন্তিম দিনটোলৈকে ৰাজ্যৰ পাঁচটা সমষ্টিৰ উপ-নিৰ্বাচনৰ বাবে মুঠ ৩৮ গৰাকী প্ৰাৰ্থীয়ে মনোনয়ন পত্ৰ দাখিল কৰিছিল ।

যোৱা লোকসভা নিৰ্বাচনত এই সমষ্টি কেইটাৰ বিধায়কসকল সাংসদ হিচাপে নিৰ্বাচিত হোৱাৰ বাবে এই সমষ্টি কেইটাত উপ-নিৰ্বাচন অনুষ্ঠিত কৰিবলগীয়া হৈছে । এই সমষ্টি কেইটা হৈছে- ধলাই, চিদলী, বংগাইগাঁও, বেহালী আৰু চামগুৰি বিধানসভা সমষ্টি।

এই পাঁচটা সমষ্টিত ভোটগ্ৰহণ অহা ১৩ নৱেম্বৰত অনুষ্ঠিত হ’ব আৰু ২৩ নৱেম্বৰত ভোট গণনা কৰা হ’ব। মনোনয়ন প্ৰত্যাহাৰৰ শেষ তাৰিখ ৩০ অক্টোবৰ। এই উপ-নিৰ্বাচনৰ বাবে ধলাই সমষ্টিত ৯ জন প্ৰাৰ্থীয়ে মনোনয়ন দাখিল কৰিছিল । ইয়াৰ সমান্তৰালভাৱে চিদলী সমষ্টিত ৩ গৰাকী, বঙাইগাঁৱত ৮ গৰাকী, বিহালীত ৪ গৰাকী আৰু চামগুৰি সমষ্টিত ১৪ গৰাকী প্ৰাৰ্থীয়ে মনোনয়ন দাখিল কৰিছিল ।

নিৰ্বাচনী বিষয়া গোৱেলে কয় যে, ধলাই, চিদলী, বঙাইগাঁও আৰু বেহালীৰ সকলো মনোনয়ন পত্ৰ বৈধ ঘোষণা কৰা হৈছে । দুজন নিৰ্দলীয় প্ৰাৰ্থীৰ দুজন প্ৰস্তাৱকৰ স্বাক্ষৰৰ সন্দৰ্ভত অমিল থকাৰ বাবে চামগুৰিত দাখিল কৰা মনোনয়ন পত্ৰৰ পৰীক্ষা মঙলবাৰে কৰা হ’ব বুলি জানিবলৈ দিছে নিৰ্বাচনী বিষয়া গৰাকীয়ে ।